بنات حووواااء الله يسعدكم انصحوني،،حياتي مع زوجي بتنهار،،

السلام عليكم خواتي،،جزاكم الله كل الخير
ابقولكم عن معاناتي مع زوجي وربي تعبت من العيشه معاه،،ابي منكم دعوه صادقه بظهر الغيب ونصيحه تفيدني قبل لا انهار،،
ما ادري وش ابداء فيه،،بالمختصر يابنات زوجي يحب ويعشق اصحابه اكثر مني ومن بيته وولده تخيلوا يقضي معظم وقته معاهم ومايجي الا وقت النوم واذا قلت له ليه كذا حنا لنا حق فيك يقولي خلاص بكره اجلس عندك وطبعا ينام اليوم كله ولما يصحى يقول خلاص جلست عندك واذا اذا جلس يلعب في الجوال ولا يتفرج على التلفزيون او يكلم اصحابه،،
يمكن يجي في بالكم اني نكديه او مو حلوه او ما اهتم بنفسي لا وربي بالعكس احب اسولف واضحك واهتم بنفسي وبلبسي وشكلي واحاول قد مااقدر ارضيه بس بالعكس الاقي منه ردود ثانيه،،
يعني مثلا دايم ينتقد طبخي بالرغم ان طبخي الكل يشهد ويمدح فيه،،
الشهر هذا يابنات طلع للبر يومين وتركني انا وولده لحالنا في البيت وصبرت وسكت وقبل كم يوم فاجأني بسفر لدوله خليجيه بحجة الشغل واخذ معاه لبس كشخه كثيره وطول ثلاث ايام وانا بعد لحالي لا طلعت ولا شي،،
للمشكله اني ما اضيق عليه بطلباتي ولا اقوله امش نتمشى او نسافر ويفاجأني انه يروح يسافر مع اصحابه ينبسط وانا لا،،بجد احسه اناني وقاسي ومايحس فيني،،
والله يابنات اني ماانام الليل من ولدي وفوق كذا شغل البيت وقرف والله نفسيتي تعبانه ومرهقه،،
بنات انا صرت اخاف من احساسي لاني خلاص بديت اكرهه واكره العيشه معاه،،زمان كنت اتكلم واتناقش معاه والحين لا صرت اسكت واكتم في نفسي ابيه يحس،،الحين صار لي اربع ايام مااتكلم معاه بس ولا هو داري عني،،الحين جالسه اكتب لكم وانا جالسه لحالي ودموعي على خدي،،واهلي مو قريبين مني في ديره ثانيه وربي احس اني وحييييييده ومتعذبه،،
يعني احس انه متزوج اصحابه مو متزوجني،،
بنات الله يسعدكم ادعولي ان الله يسخر زوجي لي ويهديه ربي ويصلحه،،
وانصحوني وافيدوني وش اسوي بحالتي
اعذروني طولت عليكم،،،