بنات روحو الدكتور فحصو صدوركم أحسن لكم ودخلو باقول لكم قصتي

السلام عليكم ورحمة الله وبركاته
فتيات المنتدى الغالي أقروا الموضوع أرجوكم لا تصكونه من أول شي لأن الكلام إلي بقوله لمصلحتكم ولصحتكم ولجمالكم وأنا أبتديت بهذي المقدمه لأني كنت دايماً من أدخل موضوع عن الصحه اقرا شوي بدون اهتمام وأطلع.. ليش؟!!! لأن كنت دايماً أظن ان الي يصيد الناس من أمراض أو مشاكل ما تصيدني.. فكروا فيها شوي.. وقولوا الصراحه ما تحسون دايماً اذا أحد تكلم عن مرض أو تحذير من منتج أو شي ما تحسون على طول أن الموضوع ما يعنيكم؟!! ما يكون رد فعلك الأولي على الموضوع إن ((أكيد ما بيصيدني))؟!!! أنا كنت وحده من هذي النوع من أحد يتكلم عن ضروره الأهتمام بالأكل ونظام الحياة وتجنب مسببات الأمراض الخطيره أقول في نفسي ((يوووووووه خلها على الله)) طبعاً خلها على الله بس الواحد يأخذ بالأسباب ويتجنب مصادر الضرر.. المهم مالكم بالطويله أنا قبل 4 أيام كنت أتحمم وأنا أتفرك مرت يدي على صدري اليمين وحسيت بشي مثل الكوره لصغيره اليابسه تحت اللحم.. تحسستها أكثر وتأكدت من وجودها.. طبعاً رد الفعل الي أنا معتاده عليه ((هذي أكيد شي عادي هلكانه ولا تفكرين فيه زياده)) لأن أنا من النوع الي مو وسواسي من ناحية الصحه ودام مافيني ألم معناته أنا ok ومتأكده أن بنات وااااااايد منكم مثلي.. قررت أني ما أحقق في الموضوع وقلت اذا شفتها كبرت عقب فتره باروح أفحص.. وذيك الليله حسيت بتأنيب ضمير قلت في نفسي مو حرام الواحد الله ينعم عليه بالصحه ولا يقدرها؟!! مو حرام أن الله قدر لي أني الاحظ هذي المشكله وأن شاء الله أنها تكون في بدايتها قبل ما أتطور الى أشياء تحصنا بالله خبيثه أو مميته.. مو حرام أني أظيع الفرصه الي ربي أنعم بها علي وفي ناس غافلين ما يدرون أن فيهم شي الا بعد فوات الأوان وتطور الحاله؟!! هذولا الناس ما ودهم ينعاد الزمن ويكونون في نفس الوضع الي أنا فيه ألحين؟!! وتدرون أزيد شي فكرت فيه شنو؟!!! التشويه الي ممكن يصير اذا كان الموضوع خطير ((أسم الله علي وعليكم)) وأستدعى تدخل جراحي وأستأصال لا قدر الله.. وخبركم الصدر من علامات الأنوثه وهذا أحنا مو عارفين شنسوي فيه الي تبي تكبره والي تبي تصغره والي تبي تشده والي تبي تبيضه ومسوي لنا حرب أعصاب عشان نحافظ عليه.. المهم الصبح طبعاً النفسيه تتغير والمزاج يتغير والواحد يحس أنه كان يبالغ فقلت أأجل الموضوع كم يوم((الصراحه أنا أككككككككككره المستشفيات وما أحب أروح للدكتور أبد أبد)) المهم أمس الصبح كنت قاعده ماعندي شي قلت ((الي عليك عليك روحي فحصي يا هلكونه)) ورحت للدكتوره شرحت لها الموضوع وكشفت علي وفعلاً طلع أن في شي مو طبيعي في صدري..

طبعاً سألتني عن أمي وخالاتي وعماتي واذا أحد في العايله كان صايدته أورام أو شي ((الحمدلله كان الجواب لا)) أسألتني نظام أكلك صحي؟!! قلت لها ساعات وساعات وفعلاً أنا ساعات أهتم شوي بغذائي لكن يكون فتره مثل ما نقول((طربه)) لكن الطبع يغلب التطبع ومعظم الأوقات يكون أكلي مو صحي((بيتزا معجنات مكرونات عيوش شوكالاتات حلويات بوتيتو جبس وخرابيط)).. سألتني أتدخنين؟!! قلت لها لا لكن أقعد مع ناس(أبوي وأخوي) يدخنون وصالة بيتنا على طول فيها ريحة سجاير أو فليت أو بخور وعود وأنواع البوليوشن والتلوث.. وفوق ذي كله جنب بيتنا مصنع ويطلع غازات ودخان والله يستر من الي فيهم..المهم أنها حولتني عشان موعد للفحص بالموجات فوق الصوتيه((الترا ساوند)) وقالت لي أن كل شي يبين في الألترا سوند وان اذا كان الشي الموجود تليف بس أو ورم حميد أو خبيث.. طبعاً ما نطرت موعد الألتراساوند لأاني طلبت دكتوره مو دكتور وقالوا لي اذا تبين دكتوره بيتأخر موعدك.. فرحت العصر لعيادة دكتوره تسوي الفحص وسويت عندها الفحص..

النتيجه الحين والي بانت من الفحص أن فيني شي أسمه غدد ليفيه وهذي الأشياء تكون حميده وما منها ضرر لكن في وحده منهم حجمها كبير وعادةً الي حجمهم كبير يزيلونهم بالجراحه فلازم أروح لدكتوره جراحه عشان تقرر تشيلها أو لا.. وفهمت منها أن هذي الغدد لازم على طول أفحصهم عشان لا قدر الله ما يجي يوم ويتحولون الى أشياء خبيثه..
الحين عقب ما قلت لكم قصتي هذي وأن شاء الله لها تكمله لأني قررت أني أغير نظام حياتي حفاظاً على نعمة الصحه وطبعاً الجمال الي مستحيل أيتحقق بدون صحه.. طالبه منكم طلب يا بنات أن كل وحده فيكم تروح تفحص صدرها ترا والله العظيم الفحص ما ياخذ 10 دقايق والدكتوره بتعلمكم كيف تفحصون وأنتو في البيت وقت الدوره كل شهر.. خصوصاً البنات الي فوق الثلاثين.. وأن شاء الله ما عليكم شر لكن عشان تتطمنون وأتجنبون أي مشاكل مستقبليه.. ويا جماعه ترا الجسم سبحان الله يصلح روحه بروحه لكن اذا كانت مصادر التلوث الي محيطه فيه والي تدخل فيه (من كريمات ومواد حافظه والسموم الي أتكون داخل الجسم نتيجه هضم اللحوم أو أكل أنواع من ألادويه أو شرب العصيرات المعلبه أو المشروبات الغازيه) هذي الاشياء كلها تخلي السموم أتكدس في الجسم وتحول طبيعه البيئه داخل الجسم من قلويه الى حامضيه وهذا الشي يأثر في وضايف الخلايا كلها((خلايا الدم خلايا النسيج العضلي والعظمي والعصبي وكل خلايا الجسم)) فمايقدر الجسم أنه يصلح روحه بروحه وعشان اعطيكم فكره ابسط تخيلوا أن الكبد هو ((غسالة الجسم)) هذي الغساله اذا زاد التلوث عليها تخترب وما تقدر تواصل الغسيل بنفس الكفائه وتصير كأنها وحده تغسل صحون وكل ما خلصت 10 صحون جابو لها دفعة من 100 صحن غيرهم فيصير عندها 190 صحن وتغسل 10 ويجيبون 100 زياده ويصير 280 وعلى هلحاله الين خلاص ما تقدر تلحق على تنظيف الكميات الي اتكدس عليها .. وهذا الوسخ الي تجمع وتكدس هو الي يسبب الأمراض لأن جهاز المناعه الي يهاجم أي مرض من بداياته ويقضي عليه ما يقدر يشتغل في ((لخياس)).. فلازم يا بنات لازم تهتمون بنوعية أكلكم وكل شي تحطونه على بشراتكم.. ما أطول عليكم زياده ولنا لقاآت أخرى أن شاء الله والسلام عليكم ورحمة الله وبركاته

بنات الي حابه ترد حياها الله والي مو حابه بعد حياها الله ولكني طالبه من الجميع الرفع عشان يشوفون الموضوع اكبر عدد ممكن م الأخوات وميرسي