بنتي والمدرسه /////واحساسي بالفشل

السلام عليكم ورحمة الله وبركاته
خواتي العزيزات انا مقهوره على بنتي وضغطي مرتفع وياليت احد يساعدني وشلون اتصرف معها
بنتي صف اول وعمرها اللحين 6سنوات وخمس شهور
عندي قبلها بنتين ما تعبوني بالمدرسه مع ان الكبيره لما درست ما كانت تعرف احد بالمدرسه بس مشت حالها يعني اسبوع وتعودت على المدرسه والثانيه رحت معها اول يوم وبعدها تعودت
اما هذي اه منها دلعناها لين قالت بس والشي اللي تبيه تحصله حتى لو يخص خواتها اخذه منهن واعطيها المهم السنتين اللي فاتت كانت مره متحمسه للمدرسه واشترينا لها شنطه ومريول وكتب من المكتبه وا ي مناسبه تصير بالمدرسه يعني حفل او يوم وطني او جنادريه تروح من الصبح معهن يعني حماسها غير وحفظت تقريبا نص الحروف والارقام واول يوم بالمدرسه كنت ابروح معها وقالتلي لا تروحين ماني خايفه
لكن بعد الاسبوع الاول نقلناها من المدرسه لان سكنا بحي بعيد عن مدرستها الاولى ومن داومت وهي متضايقه وتقول المعلمه عصبيه وانا من غبائي كنت مره اروح معها او اذا قربت الفسحه اروح لان المدرسه قريبه من البيت المهم يوم عن يوم يزيد صياحها وما تبي المدرسه وابوها كل ما شافها قال افصليها توها صغيره
وانا تعبت من تقويمها الصبح مره اضربها ومره اهاوشها وكل ما نفع اذا صحيتها تروح تخبى عني واقعد ادورها وكل ما لقيتها هربت المهم طاب خاطري من هالسالفه وشكلي ابفصلها مع اني احس اني مقصره او ام فاشله يعني مدري وشلون اتصرف معها مع ان كل بنات خواتي اللي بعمرها درسن وحتى اللي اصغر منها بست شهور درسن
وبعد بنات عماتها
يعني انا ما استنفذت كل الطرق عشان اجبرها على المدرسه لكن ما احد مساعدني قصدي ابوها
الاسبوع هذا ما داومت لاني ضرسي متعبني ونفسيتي زفت يعني السبت غابت والاحد رحت معها وما رضت تدخل الفصل الا بعد صياح وامس غابت واليوم بعد يعني وش رايكم هل اعتبر ام فاشله لاني ما قدرت احبب بنتتي بالمدرسه
وهل اذا فصلتها السنه الجايه ما راح تتعبني بالدراسه
احس نفسيتي زفت منها وندمانه على فصلها من المدرسه وانا متاكده انها شاطره وذكيه
وبنفس الوقت تكسر خاطري لانها عايفه المدرسه من قلب
وطول اليوم تقول نفسي اشيل المدرسه من مخي عجزت استانس بس افكر بها
اللي عندها حل تساعدني
ملاحظه حاولت ازعل عليها وما اكلمها لكن صارت تضرب اخوها الصغير بكل قوه
وبعد ابوها رفض يرجعها للمدرسه الاولى