تبين تغيرين ريلج ؟؟

السلام عليكم ورحمة الله وبركاته
صباح الخير يا اجمل اخوات في الدنيا
صحيح اني مش مزوجه دعواتكم حبيباتي بالتوفيق والزواج
ولكن دائما في مدينتي محاضرات مجانيه عن الزواج والاطفال وغيره وغيره وفي جامعات طالباتها اتيهم دعوه للحضور
وفي اليوتيوب والكتب وغيره وغيره
طبعا حضورنا في البدايه هروب من روتين المحاضرات ونحب نروح ونغير جو وهكذا بس لقينا المحاضرين يقولون كلام
اول مره نعرفه !!!
مافي شي في الحياه تقدرين توصلين للكمال به الا بالعلم والتعلم وعشان تعرفين كيف تعيشين حياه سعيده لازم انتي الي تتغيرين مب زوجج !!
كيف تبينه يتغير اذا انتي نفس ما انتي شو بيستفيد هوه من تغيره الايجابي وانتي ما زلتي شخص تنقصه الخبره والحنكه والمعرفه ؟؟
ماادعي اني وصلت للمعرفه ولكن تفتح عقلي شويتين الحمدلله وصرت اعرف ان كل شي في الحياه تبين توصلينه للكمال يباله جهد ومثابره وتعب
قبل كل شي
في قانون اذا ما طبقتيه بحب ما بتوصلين لاي مكان
انج ترضين الله عشان الله يخلي عباده راضين عليج
تعبدي بحب
ابحثي في القران والسنه النبويه عن كل شي يزيد محبة الزوج وعن الرزق وعن الراحه وعن الهدوء والاطمئنان
كنا عندنا مشاكل وهموم ولولى املنا بالله كبير ما اعرف وين بنوصل
فانتي تبين زوجج يتغير انتي اتغيري
كوني ايجابيه
كوني قنوعه بسيطه
اتعلمي حسن التدبير في الحياه في جميع امرج
بقولكم مثال وحده كانت تشتكي من زوجها ما يصلي يفوت يجمع وامور كثيره بس تقول ريلي طيب ذهب اخاف اخسره
قالها المحاضر هوه يصليلج ولا يصلي لربه ؟؟ هيه قالت لا الامر بالمعروف والي تارك الصلاه يجوز اني اطلق
قالها هوه متكاسل ولا هوه ناكر الصلاه
قالت لا متكاسل ومتهاون
قالها اذا كان شخص فيه حمى ومريض بتتركينه في البيت
ولا بتوقفين معاه وبتعالجينه بحب
ولا بتعصبين عليه وبتقوليله انتي محموم لازم تاخذ العلاج اذا ما خته بتموت وياويلك من الحمى؟؟
ذكريه
كوني قدوه له
عامليه بحب ولطافه وهدوء
يوم يكون القلب مملوء بالقهر والعتب والمشاعر السلبيه عمره الزوج ما بيسمع كلامج
قالها الحين انتي تبينه يقوم يصلي الجمعه
تاهلينه قبل ؟؟؟
هل تقومين وتبخرين البيت الساعه 10 الصبح ودخلين المدخن ثواني وهوه نايم وتطلعين وتنبهين حواسه ان اليوم يوم مميز ريحه معينه يوم الجمعه
هل تقومين وتجهزين ملابسه على الكرسي وتبخرينهن وتعطرينهن ويوم يصحى تقولين له جهزتلك ملابس ليوم الجمعه بس شكلك تعبان باذن الله الجمعه اليايه تقدر تحضرها وتعوض
هل تكلمينه بحترام وادب وحب لانج تبينه يكون شخص يفوز بالجنه ولا يالسه تحاسبينه جنج منكر ونكير !!!
يقول الزوجه الذكيه هيه الي تعرف تبرمج زوجها من اول ويديد ويكون شخص يديد بالصبر وطول البال مافي شي بيغير زوج عاش 25 سنه قبلج في سنه ولا 10 سنين
قال اذا سويتي هالشي لله وخليتيه يشوفج تقومين الليل ويسمعج تدعين له وتبتسمين له بيتغير وبيخجل من نفسه وبيصلي
انتي ابتدي بالتغير لان لكل فعل ردت فعل معاكسه
مستحيل تتغيرين وتكون ردت فعله مثل ردته الفعل القديمه
1 + 1
اجابته تختلف عن
2+1
رغم انى غيرنا عدد واحد مش عددين
ولو تغير العديدين بتكون النتيجه بعد مختلفه
قال في ازواج مخدرات وحشيش وبلاوي وسكر وزنا بعد فتره اصبحو من ارقى وافضل الناس لانه رزق بزوجه صالحه محبه تسوي كل شي لله
ما ابتلى بناكر ونكير وجلاد ما يقول له الا عذاب القبر جهنم ياويلك من ربك قال ابتدن بالترغيب ولا تدخلن على الريال بالترهيب الا اذا احتاج الامره في فشل جميع المحاولات ومب انتي تكلمينه بشكل مباشر
لا ارسليله مقطع
قال كوني ذكيه ولطيفه ومحبه بيتغير الزوج للافضل
حاولت انياكتبلكم كل شي لان المعلومات فرش في راسي قبل لا انساها
الحياه الزوجه بكاملها معتمده على الزوجه في كل شي ومافي شخص ما يتغير للافضل لانها فطره عند الانسان
واخر قولي صلو على سيدنا محمد صل الله عليه وسلم
واذكرو الله كثيرا سبحان الله والحمدلله ولا اله الا الله والله اكبر
ماشاءالله تبارك الله