تتوقعون لي حق اتحسب عليهم!! احسهم سبب بقطع رزقي

انا بنت عمري 28 سنة ماعندي الا خالة متوفية ولها ثلاث بنات كلهم اكبر مني متزوجات وبعيالهم واجتماعيات بشكل ماتتخيلونة مايبقى احد مايعرفهم ويعزمهم
عكسي تماما انا وامي غير اجتماعيات ولا نطلع ولا احد يعرفنا ابدد بشكل يمكن ماتتخيلونة

ماعندي اقارب من جهة ابوي نهائيا

من قبل اتخرج من الجامعة كانت تجيني تلميحات من بنات خالتي تخرجي وبنذكرك للناس وكثير يسألونا عن بنات للزواج ومواصفاتك مطلوبة والخ من هالكلام

ماكنت وقتها مهتمه

تخرجت

وحدة منهم جابت لي عريس اكبر مني ب 25 سنة ورفضتة بسبب العمر
جابت لي ثاني غير مناسب نهائيا يدخن وشهادتة ثنوي ومتواضع

قالت لي ولا يهمك يافلانة اللي جاب هذولي يجيب غيرهم وانا عندي كذا رقم خطابات بكلمهم وارد لك
كلمت وحدة ولقت عندها ناس مناسبين

وخلال هالفترة بنت خالتي كانت جدا جدا متحمسة لي وفرحااانة الله يعطيها على قد نيتها مع اني والله يابنات ماطلبت منها شي بس هي عارفة وضعي وحابة تزوجني

وفجأة .. انقلب حالها معي تماما حتى نبرة صوتها لما تكلمني بالتلفون متغييييرة قلت لها وش صار يافلانة على الخطابة
قالت ماعاد ردت علي واصلا الناس ماعاد يخطبون هالفترة عشان رمضان !!! مع العلم كنا وقتها بشهر
4 هجري!!

سكت وحز بخاطري حسيتها تصرفني

وخلال هالفترة كذا مرة ترمي كلام جارح تقولي يافلانة انتي وشلون بتتزوجين وانتو ماتطلعون (تقولها بضحك وسخريه) واختها الكبيرة مرة دقت علي وقالت فية وحدة تشبهلك ودي اذكرها لولد صديقتي فلانة بس مااتوقع بيقبلون فيها سويمجه شوي !!!! وشلون سويمجه وتقولين تشبهني كأنها تسبني!!!
واختهم الثالثة مره قالت لي اصلا القروي هي اللي تفرح بالزواج وتدورة

وكل هذا يابنات والله ماطلبت منهم يزوجوني او يسعون لي

بس ماعرف وش غيرهم فجاه !!!

خصوصا اللبنت اللي اقولكم جابت لي عرسان وش غيرها فجاه بسم الله انقلبت علي قلببببة

انا طبعا بعد مرور فترة شكيت في اختها اللي اصغر منها الي تقولي الي تدور الزواج هي القروية
لانها فيها غيرة وكذا مره ترمي كلام قدامي انهم ماعاد يبون يذكرون بنات للزواج عشان المشاكل فعرفت انها هي

انا الان ومن وقت المشكلة من سنتين او اكثر وانا اتحسب على اللي خرب بيني وبين بنت خالتي وقطع سبب كان ممكن يكون سبب برزقي

يابنات انا دارية الزواج رزق من ربي محد يمنعة بس الاسباب برضو لاتنسونها

ووالله العظيم انهم لليوم يرمون كلام وانهم زوجوا فلانه وعلانة من صديقاتهم وبنات حمولتهم

انا ابي اسئلكم تتوقعون لي حق اتحسب عليهم ؟؟؟
وليه وانا قريبتهم حاسديني على الزواج والبعيدات لا!!!! اسئلكم بالله يابنات وش تفسرون هالشي!!!! مو غيرة وحسد ؟؟؟
يعني لو انهم خايفات من المشاكل لية يمدحون خوات صديقاتهم وبنات الجيران ؟؟؟ وانا اعرف شخصيا البنات الي تزوجوا عن طريقهم


شغلة ثانية ناس من اقاربي طلع كلام انهم يفكرون يخطبوني لولدهم ... راحت بنت خالتي اللي اقولكم غيوره تكلم اختة وتسألها عن اخوها وتاخذ تفاصيل ... وجاني العلم من اختها قالت السالفه بدون قصد
انا انقهرت الله اعلم وش قالت لها وليه تسأل عنه وش دخلها فيهم !!!!

حسبي الله ونعم الوكيل في الي فسدت بيني وبين بنت خالتي ونجستها علي وقطعت علي باب كان ممكن يكون سبب برزقي