تجربتي مع حبوب الشباب .. ان شاء الله تفيدكم

السلام عليكم ورحمة الله وبركاته

كيفكم جميعا

يا حلوين راح اذكر تجربتي بإختصار

انا زمان كانت تطلع لي حبوب شباب .. بس عادي فتره وبعدين راحت لوحدها و صارت بشتري حلوه ماشاء الله

وصارت ماتطلع لي الحبوب الا قبل الدوره او وقتها وبعدين تروح

وجلست اخلط لبشرتي خلطات علشان ترطبها ومدري ايش هذا الكلام قبل الصيف .. وبس رجعت لأهلي ( لأني متغربه عنهم ) كلهم قالوا ماشاء الله بشرتك زي بشرة الأطفال

وبجد صارت حلوه ولينه ماشاء الله

وتخيلوا بس بدا الصيف تظهر لي انواع الحبوب .. صارت خدودي مليااااانه حبوب .. وكبيره .. حتى امي شكت انه عنقز .. بس قد جاني زمان ... قالت اجل اكيد عين

وحاولت استخدم غسولات نيتروجينا ..وكريمات من الصيدليه .. ومقشرات.. والأشياء اللي دايم اقرا عنها لحب الشباب .. ومافاد كل مالها تزيد

تخيلوا طول الصيف 3 شهور وانا في معاناه حتى زواجات مااروح

وبعدين في آخر رمضان قريت في شات قناة بدايه وحده تقول لحبوب الشباب استخدمي صابونه ( اسن أيد ) acne aid
واكثري من شرب عصير البرتقال

انا والله مااهتميت في العصير .. بس شريت الصابونه .. لقيتها بـ 25 ريال

والله يابنات ان الحبوب خفت بالتدريج الى ان اختفت تماما بس بقي اثار لها يعني بقع خفيفه وان شاء الله تروح مع الوقت ..

انا حاليا وقفت استخدام الصابونه لأن الحبوب راحت الحمد لله .. بس لمن كنت استخدمها كنت اغسل وجهي فيها في الصباح والليه واحيانا العصر

واحيانا احطها على وجهي واسوي زي المساج واجلس كذا ربع ساعه اروح اسوي اي شغله وارجع اشطف وجهي بالمويه

طبعا اللي بشرتها جافه ترطبها باستمرار علشان يمكن الصابون يجففها زياده ويطلع قشور من الجفاف

والحمد لله رب العالمين

ماابغى منكم الا الدعاء للأخت اللي كتبت اسم الصابونه في قناة بدايه .. اسأل الله ان يجعل لها من كل ضيق مخرجا ومن كل هم فرجا وان يرزقها من حيث لا تحتسب

<<<< شفتم فايدة الي يفيد غيره .. هي كتبتها هناك ويمكن دعوا لها اللي قروها .. وانا نقلتها لكم واللي استفادت بتدعي لها .. ويمكن انتو برضه نتنقلونها وتطلبون الدعاء لها .. فيمكن لأنها بس ساعدت غيرها وكتبت اسم الصابونه يمكن تلاقي سلسله من الناس تدعي لها الى يوم القيامه


ولا تنسوني انا كمان من صالح دعائكم:27:

واللي ماتفيدها لاتدعي علي . انا قلت لكم تجربتي فقط يمكن ماتناسب الكل .. بس اسأل الله ان يفيد بها الجميع


استودعكم الله