تعالوا احكموا بيني وبين زوجي

انا وزني 57 ماشاء الله تبارك الله
وكل من شافني مدح رشاقتي ماشاء الله
واحاول قد ما اقدر احافظ على وزني
فقلت لزوجي لا يجيب حلويات وشوكلاته
لا لي ولا لبنتي
ودايما اذا رحت مع السوبرماكت اشتري من اغراض الدايت
ومعظم اكلي صحي ماشاء الله.. مالي بالدهون

المشكله ان زوجي رافع ضغطي
اذا تغديت وانسدحت
قال لي: السدحة بعد الاكل تطلع كرش
واحيانا وانا اكل الرز يقول خلاص كلي لحم
يقول ترى الرز يسمنك
وانا اطنشه.. لان تعليقاته يقولها وهو يمزح
واحيانا ارد واقول له: الحمدلله جسمي سمبتيك
والا اضحك و اقول: بالعكس انا محتاجه كيلو زياده

بس احس طفشت منه ومن سخافته
اليوم كنا بنطلب عشاء
قال: تبين بروستد؟
قلت: لا كله دهن.. ابي مشاوي
ولما جاء اللحم المشوي اخذت قطعه خبز
على اساس اسوي لي شاورما
الا يقول لي: لا تاكلين خبز ينفخك.. كلي لحم بس
وكان يتكلم بنفس شينه

انا تضايقت وقلت: انعم الله عليك.. وتركت الاكل
وهو عصب علي!
يقول: هذا جزاي اشجعك واخاف على جسمك!
قلت له: جسمي عاجبني وكان خاطري اتهنى باللقمه
بس ماقصرت.. عن اذنك

وهو جلس يبرير ويقول حياه نكد وحياه قرف ومدري ايش
تركته ورحت غرفتي


السؤال: هل هو وقح ولا انا اللي حساسه؟
علما بأني اول مره اتنرفز من تعليقه.. بس لاني مليت
ولانه كان يتكلم بنفس شينه.. حسسني اني فيل او انه متورط فيني