تعالوا بنات شوروا علي ويمكن موضوعي يهمكن وينفعكن

السلام عليكم ورحمة الله وبركاته

بدخل على الموضوع على طول ما عندي وقت من كثر التفكير اخواتي الفاضلات انا موظفه ووظيفتي مرموقه مو اي كلام بس اللي قاهرني في الموضوع اني ماني مستفيده شي من الراتب قصدي ما ني قادره اجمع شي صحيح عايشه بمستوى حلو بس ما فيه شي لليوم الاسود على راي الشعب المصري والله بنات اتمنى اسوي لي مشروع يدر علي شي لاني اخاف يجي يوم واترك هالوظيفه واطلع من المولد بلا حمص برضه على راي اخواننا المصريين يعني مو معقوله ما فيه رصيد يستاهل الحمدلله راتبي عالي ويكفي ماشاء الله اشوف الرجال الواحد منهم راتبه خلينا نقول 3000 ريال مثلا او حتى 1500 ريال ومع ذلك تلاقي عنده بيت ملك وشاري سياره وعنده رصيد ويصرف على اهله انا في بداية زواجي ساعدت زوجي كثير وبالهبل لكن في الاخير قطعت هالتبرعات حسيتها رايحه في غير مكانها لاذكر ولاشكر واذا احتديتي عليه حمرت عيونه فخلاص قررت ان ما فيه اعانات نهائي مزنوق والا ماهو مزنوق

البس كثير واشتري كريمات واساعد اهلي لانهم في نظري يستاهلون بس مدري علامي هالشهرين احس اني زهقانه ما فيه رصيد ما فيه شي ودي ادخل بمشروع ودي اسوي لي بيت الدنيا مالها امان والزوج بعد ماله امان ودي اغني اعيالي وبناتي اذا كبروا صراحه ودي احد يجي يكفخني على وجهي لحد ما اصحى من السبات اللي انا فيه

معليش بنات تراي ما اعددت للموضوع بس من زود التفكير قلت ابي بنات حواء يحكون معاناتهم اللي مثل معاناتي ودي يعلمني وش الدبره كيف احافظ على راتبي من الضياع ودي اكون شي للمستقبل رجاءا بنات اللي مرت او تمر بمثل تجربتي تحكي واللي تعدل حالها وصحيت مثل ما صحيت تحكي واللي سوت مشروع طلعت منه ربحانه تحكي يمكن موضوعي له علاقه بالتوفير بس احكوا تجاربكم صراحه فيني صيحه بس مالي حيله اذا قلت لزوجي فكر لي بمشروع قال جمعي فلوسك بالبنك وارقدي عليهم بالله هذا حل :(