تعالوا شوفوا العين وش سوت بأختي الي عمرها 22سنه يارب ارفع عنها واشفيها

السلام عليكم ورحمة الله وبركاته


أخواتي في الله ,هالموضوع مو جديد لكن صار له اكثر من 8شهور معاناة أختي الصغيره التي تبلغ من العمر 22سنه فقط ولكن رؤيتي للوقفه الرائعه لبعضكن والدعوات التي قد تصادف ساعات اللإجابه أطمعتني ان أكتب لكم قصة أختي ومرضها بالعين وأرجوا منكم الدعاء لها بان الله يرفع عنها ويشفيها ويبلغ أمي تزوجها هي واختي الثانيه ونفرح فيهم وتشوف اطفالنا يارب العالمين ,,



في ليلله من الليالي اقيم زواج أحد الأقارب وكان زواج كبير جدا لوجود أكثر من عائله العرسان اولاد عم والعرايس كل وحده من عيله مختلفه وكان في أكبر قاعات المدينه المنوره المهم طبعا كل وحده فينا (4بنات 2متزوجات و2 بدون)من صباح الله خير نحوس ونلوس في دي الخشش وندهر في أنسنا وماخلينا شي تقولون حنا الي بنعرس ومافضينا حتى نتغدى او نتعشى يادوبك الفطور سندوتشات على الطاير ومن برا لأننا كنا بالسوق (من يومنا لازم نحتاج السوق الين آخر لحظه حتى بعرسي غبيه ادن العشا وأنا أراكض في سوق قبى يوم سمعت الأدان شهقت ديك الشهقه أشوى ماطلعت روحي معاها فجعت الحريم اللي حولي يحسبون شي صار )المهم ورجعنا البيت طبعا الي عليها الدوره الله يكرمكم ماخده راحتها واللي لازم يصلون متوضين من صلاة الفجر ومحافين على الوضوء لصلاة الفجر الثاني خخخخ ويالله ماغير الكل يركض في البيت أدكر أخوي معدي بالصاله وشوي اصقعه من جهه وانا طايره مامداه يثبت من الهزا تجيه اختي الثانيه طايره وتثبته بالجدار هدا وهو فحل طول بعرض وحنا عنده غزلان جنب بعير مع احترامي له لكن ساعة الحوسه والركض الغزلان تحولوا الى بعائيرات ومو اي بعائيرات أما أخواتي الصغار عشانهم اصلا يخافون منه لايجيهم كف طاير (حنا المتزوجات مايقدر علينا )فكانوا ادا صادفوه وهم طايرين فحطوا ديك التفاحيط الي تخليهم يتكرفسون ويالله غرفتنا صارت عباره عن حراج بن قاسم مصغر(لغير اهل الرياض حراج بن قاسم اشهر حراج بالرياض من كبره وكثر البضاعات الي فيه بس ادري للحين فيه او لا)كل انواع اللإستشوارات الهوائيه والكوي والفيرات متحدفه في كل مكان وكل ما وحده تخلص وهي بمكانها تحدف للثانيه ما عندنا وقت للدوق واللباقه لأن الوالده الله يحفظها من يوم صحينا من النوم شغلت موال ماقبل الخرجات وخاصة الزواجات (ها مو طولون ها تراكم موب انتوا العرايس ها ان تأخرتوا بروح واخليكم ولا بحلف متعتبون باب البيت )وكل 5دقايق من بعد ماصلينا العصر تطل براسها ياعساني فديته يووووووه توكم ماسويتوت شي ماتدرون كم الساعه جابت لنا الروعه كل منفتح الباب ماغير نشهق من الخوف وكل كوم والمكياج من ارواج وشدو وبلاشر وماسكرا واي لاينر يوم نجلس نحوس عليهم (حراج بن قاسم بالله كيف بنلاقي هالأشياء الصغيره)طبعا الفساتين مكويه ومتعلقه بكل ركن بالغرفه والله يكرمكم الجزم والشناط والعبايات حتى اخوي يوم انفتح باب الغرفه وهو مار يقول حشا موب غرفة بنات وطبعا الوحده منى ادا فكرة تقوم وتجيب شي مضطره تعالوا شوفوا المعاناه عشان نتشقح الموكيت الي عباره عن كل مالد وطاب من عدة الخرجات وفي النهايه بعد ماقطعنا شعورنا ومرمطنا وجيهنا بالمكياج وسوينا حرب مع لبس العدسات وخرقنا عيونا فيها وتجهزنا خرجنا من الحراج تقولون كنى البخت والغلطه الكبيره اللي سويناها اننا متحصنا وخاصة أختي الصغيره لأن عليها الدوره يعني احنا على القل متوضين (نفس وضوء الفجر )والوضوء معروف انه يحفظ بقدرة الله من العين وطبعا بعد كل فرض طبيعي الواحد بيقرى آية الكرسي وبعد المغرب طبعا حسبي الله الدي لااله الا هوعليه توكلت وهو رب العرش العظيم صحيح مو على السجاده لكن المهم قلناها فطبعا اختي الي متصلي طاحت براسها ماحد دكرها ولا حصنها وكانت لااله الا الله القمر في تمامه أحلى وحده فينا ومابقول اوصافها لأن كل من هب ودب يدخل المنتدى, وبالزواج طبعا من يوم وصلنا وشلنا العبايات داااااااايركت على المنصه تقولون خبلات ونسينا حت نسلم على الناس وصرنا نرقص ونتفاجأ فيهم ونضطر نقطع ونسلن ياخزياه وربي مالنا داعي ,يالله طبعا نزلنا ندور على طاولة الوالده ويالله حصلناها والوالده ربي يحفظها عاقده الحواجب ومو رادها من دبحنا الا أمة محمد الي جالسه أثاريها تحسبنا وراها وحنا لفينا على طول للمنصه وجلست تدور الين وحده قالت لها بناتك شوفيهم فوق المنصه وخلص الزواج ورجعنا البيت وحنا منتهين من اللي سويناه بالزواج وصلينا الفجر ونمنا حتى بدون منشيل المكياج (طبعا راح في المخدات واخدنا تهزيء من الوالده وعاقبتنا بأننا نغسل المخدات بيدينا موبالغساله ,ومن يومتها بدت أختي الله يكرمكم تستفرغ شوي وشوي الله يكرمكم اسهال وشوي تدوخ قلنا حق التعب وقلة الأكل وقلب الجو ومن هالكلام وكل يوم تسؤ الحاله الى ان بدت تستفرغ اي شي تاكله وتصيح باعلى صوتها من جمره في بطنها وساعتها خالتي يوم جات شافتها بهالحاله على طول قالت شكلكم ماحصنتوها بالعرس مابقى أحد ما سأل عنها الي يبي يخطب والي لقافه (من هي بنت من وش جنسيتها وأسئله يا كثرها ومع دلك مافكرنا نوديها للشيخ أو نرقيها وصرنا نجرجرها من دكتور للدكتور وكل دكتور يحلل ويسوي اشعه ويعطي علاج على كيفه الين سائت الحاله بزياده واضطريت اسافر ارجع امريكا لأني مقيمه فيها ورحت وقلبي عندها وصرت كل ما أكلم أمي اسأل عنها تقول الحمدلله بخير ومافيها الا العافيه بس قلبي يقولي شي ثاني وخاصة اني اشوف لها كثير أحلام مرعبه وقلبي يصحيني من كثر الخفقان وفي النهايه قررت اني اروح زياره لهم سريعه لمدة شهر واحد وفعلا يوم قلت لأمي تراني حجزت وجايتكم قالت طيب اسمعي ترى مو تخافين اختك شوي تعبانه وصارت مره نحيفه بس مافيها الا العافيه ان شاء الله ساعتها قلبي انقرص قلت امي جالسه تمهد لي شي ومن يوم وصلت واشوفهم كلهم الا هي واسأل عنها يوم سكتوا ساعتها رجولي ماشالتني وجلست وانهرت من البكاء خفت مادري وش بيقولون لي المهم شوي واسمعه صوتها يناديني بس مو داك الصوت الي اعرفه صوت وحده كنها تنازع بسم الله عليها واروح الغرفه الا قيها مدده على جنب وماسكه بيدها بطنها يوم شافتني صارت تبكي بكا غير طبيعي قالت امي ليه تخوفين اختك ماكان فيكي شي تقول ربي بس يدري الي فيني الألم صارت تعور القلب كنها عجوز منتهيه الله يحفظها نحفت بشكل يخوف صارت جلد وعظم لدرجة ان راسها بان اكبر من جسمها والبشره الي كنها بشرة اطفال صارت مبقعه وخشنه ومتلت حبوب وغمقت وهي الي يشوفها يحسبها سوريه والأظافر صار فيها لون غريب وتصلي وهي جالسه ان قدرى ولا تنسدح وطول اليوم مرميه في الصاله او في الغرفه ماعندها قوه تسوي اي شي لنفسها حتى الأكل يا ويلها ان كلت ثارت معدتها وقالونها وان ماكلت ياويلها وسوينا المنظار قالوا كل شي سليم,,صرخت على امي قلت لها ليه متودونها للدكتوره قالت ماخلينا قلت لها وديتوها للشيخ قالت كل مانوينا شي يردنا وحاولنا كم مره يصير شي يحول بينا وبين روحتنا للشيخ والمصيبه انها حتى موية زمزم ماتقدر تشرب تقول اشم ريحتها كريهه وطعمها مر تخيلوا موية زمزم لاحول ولاقوة الا بالله وفي النهايه قلت لأمي خلاص انا باخدها اليوم للشيخ (الشيخ الردادي معروف في المدينه وخارج المدينه وبيته قريب مننا بس مدري وش اللي يمنعهم يروحون)اتصل عليه زوجي عشان ياخد موعد وكانت الصدمه (الشيخ توفى الله يرحمه )لاحول ولاقوة الا بالله بصراحه هدا الوحيد الي ثقه بالنسبه لي قلنا خلاص بندور غيره وللأسف انتهى الشهر وماسوينا شي والحال على ماهو عليه لكن ناويه انزلها بعد متخلص بنتي نفاسها وبسوي المستحيل ان شاء الله عشان ارجعها مثل ماكانت,,

ادري طولت يابنات سامحوني بس أبغاكم تعيشون معاي الحاله وتدعون لها ان الله يشفيها ويرفع عنها وترجع مثل ماكانت دعوه لأختكم في ظهر الغيب لعلها توافق ساعة استجابه ,,:44: