بسم الله الرحمن الرحيم
السلام عليكم ورحمة الله وبركاته
كيفكم يا حلوات / ان شاء الله بخير
العادة اني أكتب بالفصحى لكن هالمرة لقيت نفسي مفتوحة على العامية فقلت على بركة الله خلينا نفلها فل
بلا تعقيد بلا هم << عاد من كثر مواضيعك ...
قبل كم يوم كنت أقرا تجارب هنا عندنا بالمنتدى ولا يروح فكركم بعيد
ترى ما هي تجارب في المعمل مثلاً ولا تجارب نووية تخلي أمريكا مثلاً تنتفض منا ولا شيء من هذا القبيل ...
التجارب الله يعطيكم ألف عافية هي ..........
كبشة أعشاب ( بفتح الكاف وسكون الباء ) ويا حبنا للأعشاب ولكل ما يحوم حول الأعشاب ...
تعالوا شوفوا الأعشاب وش سوت فينا ...
خذي يا فلانة العشبة الفلانية .. وسَفِّي السفوف هذا ...!!
كم ملعقة يا فلانة قلتِ وكم يوم استعملها ؟؟
يا بنات متأكدين ان هذي العشبة ما لها أضرار ...!! :angry2:
توكلي على الله يا أم فلان تراها اذا ما نفعتك ما تضرك ..!!:16:
يا بنات يقول الدكتور جابر القحطاني انها تتلف الكبد ...!! :06:
ما عليكم منه توكلوا على الله سبحانه.. أنا وأخواتي استعملناها وقبل امهاتنا وجداتنا ما ضرتهم ولا
ضرتنا ..
وكله كوووم ويوم تجيك وحده أكاديمية متعلمة ( البعض وليس الكل ) ولا ثقافتها .. حطوا له حلتيته .. وتزيد تفلسف : امرخوووه بزيت الخروع... سَفِّي على الريق ملعقة رشاد واذا ما عندك عليك بالحبة السوداء ( بتاع كله ) .
أما المُرّة وما أدراك ما المرة ( كاسحة الألغام ) فحدث ولا حرج ..
شيء غسول .. وشيئ سفوف على الريق .. وشيء مشروب .. وشيئ لبخات .. وهات وهات ويا رب سلم سلم !!
وكلٍ يشكي ويولول ... :06:
الدبية تبي تنحف في يومين فقط لا غير .. :7_5_131:
والنحيفة تبي تمتن في يوم ما شاء الله تبارك الله .. :f226:
والسمراء تبي تصير لبنانية بالقوة حتى لو بالسلاح وسفك الدم ..
:angry2:
والمريضة ما ودها تروح للمستشفيات بعد ما جاتها الأوامر من جارتها المثقفة يا أم فلان سفي هذا السفوف ترى فيه العافية ..
يا للهووووول !!!:o
البعض يمكن يقول : التجربة أكبر برهان خلونا نجرب ...
طيب حنا حقل تجارب يا ناس !! ... ومعقولة نفوسنا رخيصة كذا نقعد نجرب ونجرب وفي الأخير يمكن وحدة تروح تكشف في المستشفى وتلقى كبدها أو كليتها تلفانه ( بعيد الشر عنكم يا رب ) ..
كله بسبب عشبة والا سفوف ( يا سفة خير ) ..
يا نااااااااااااس ترى الأعشاب عبارة عن أدوية زيها زي العقاقير الطبية واستعمالها بدون وصفه من متخصص وفاهم في الأعشاب احتمال يودينا في خبر كان ويمكن نروح فيها ( لا سمح الله ) ..
مهم يا أخوات معرفة الآتي :
كمية العشبة
وطريقة استعمالها
المدة الزمنية المحددة للعلاج ( يعني فترة معينة ماهي طويلة تستمر لشهور أو سنوات ) .
وهل هناك ضرر من مزجها مع أعشاب أخرى
عمر المريض أو المريضة
هل لدى المريض أمراض مزمنة أخرى
الطريقة الصحيحة لتخزين العشبة وهل هي صالحة للاستعمال
مهم جداً معرفة العطار الجيد لأن بعض العطارين تبقى العشبة عندهم سنوات طويلة فتكون معرضة للبكتيريا والجراثيم مع طول الزمن وفي هذا خطر على الصحة ..
هذي الأشياء لازم نحطها في بالنا قبل أخذ أو تعاطي أي عشبة ..
ومو معنى كذا اننا نقول لكم قاطعوا الأعشاب واتركوها لكن نقول تأكدي ان اللي وصف الوصفة متخصص في هذا الشيئ وواعي وفاهم شغلته 100% ..
أما تجيني وحده مثلاً جارتي أو صديقتي أو وحده في النت ما هي معروفة ولا مشهورة وتقول لي : سَفِّي سفوف مدري وش شكله أو ألبخي لبخة ثم أقول لها بكل ثقة .. شبيك لبيك أنا بين يديك ... لالالالا ( على الله يا أمي أنا فاهمة وواعية وما أسمح لأحد يلعب بعقلي ) ..
شيء ثاني لاحظته وهو ان البعض الله يهديهم تشرح أعراض مرضها على النت وكأن الدنيا ما فيها شيء اسمه مستشفيات ثم تجيها ما شاء الله تبارك الله الفتاوى الجاهزة وكأن الوحده منهم متخرجة من كلية الطب أو الصيدلة ..
يا ناس لا تتساهلون بالأعشاب وتقولون اذا ما فادتنا ما تضرنا...
من اللي قال الكلام هذا !!
وقسماً بالله ان بعض الأعشاب سامة يمكن الوحده تروح فيها وبعضها تتلف أعضاء في الجسم وبعضها تجيب السكر والضغط وتساقط الشعر وتهيج الجلد ويمكن حاجات أخطر من كذا ....
خليك انسانة واعية وفاهمة لاتتأثرين بأي دعاية لأي منتج عشبي مهما مدحه لك المادحون ألا اذا كان الشخص نفسه المنتج للعشبة معروف ونزية والكل يشهد له ...
أعرف أن فيه كثير واعيات ومثقفات لكن ما يمنع هذا اني أذكِّر لأن فيه في المنتدى صغيرات سن وبعضهم قليلات خبرة وبعضهم على نياتها تصدق كل شيء ...
حبي للخير يا أهل الخير هو اللي دفعني للكتابة وحبي لبنات حواء بالذات خلاني أخاف عليهم مثل ما أخاف على نفسي ....
يارب تكونوا استفدتم يا أحلى بنات في أحلى عالم ..:26:
بقلم
جودافا
