ـ
السلام عليكم ورحمة الله وبركاته
كيفكــــم بنــات ..
عجـــبني الموضــــوع وحبـــيت انقله لكم ..
للتسليه ياطويلات العمر ..:27:
ـ أجيبي لتعرفي ــ
هل زوجك يحبّك// والا مايواطنك
ــ توطئة ــ
هذا استبيان أو اختبار بسيط وهو عبارة عن مجموعة أسئلة وعدة اجابات .. تستطيع الزوجة أن تعرف من خلال الاجابة عليها أين موقعها من قلب زوجها و هل هو يقدِّرها والا وده يدقّ خشتها ..
بسم الله نبدأ
س1 إذ بغى زوجك يناديك : << ياهووه ياعرب خخخخ
أـ يناديك باسم دلع مثل : ( ياحياتي ـ ياعمري ـ ياعيني ) ـ
ب - يناديك باسمك : ( ياسارة ، ياريم ، ياميّ )ـ
جـ يناديك بكنيتك : ( يا أم محمد ، يا أم عبدالله، يا أم خالد )ـ
د ـ يناديك باحدى العبارات الرومانسيه التاليه : ( يامرة ـ ياهيش ـ هو هنا احد ) ـ
س2 وش تلاحظين انه :
أـ معسكر في البيت 24 ساعة واذا راح للعمل يغثـتس بالاتصالات <<< ضنتي لو يسوي كذا بقرأ عليه << حريم مدري وش يعجبهم هههههههه
ب ـ يقضي أغلب وقته في البيت
جـ دايم يختخت للإستراحه ولربعة
د ـ ماتشوفين خشّته الا أوقات الوجبات ولا يجي للبيت الا قبل الفجر بنصف ساعه ـ
س3 اذا صرتي جالسه معه :
أ ـ يسولف عليك دايم ويتميلح ويحاول يستخفّ دمّه عندك ؟
ب ـ يسولف عليك سواليف عاديه .
جـ يسولف عليك الا قلتي له سولف .
د ـ مهوب يسولف أبد والا قلتي له سولف نزرتس و قال وش تبيني أقول ويلقط الجريده ويسد بها وجهه على باله انها يقراها .
س 4 لو تسوين له طبخة ولا تصير مضبوطه .. أما جت محترقه والا خانسه والا مالحة وجيتي تعتذرين له وش يقول : ـ
أ ـ يقول : أي طبخة منك زينه حتى لو تطبخين ضاطور ويجي خانس كلت يديني وراه ـ << اما ضاطور عاد اقلبها ع ضب مو باحسن :35:
ب ـ يقول : اللي يجي منك زين
جـ ـ يقول : افطني لطبختس واضبطي شغلك << جاتس العلم اها بس ؟؟؟؟؟
د ـ يقول : بلاتس الرفالة الواجدة ولاتم تعودين لها يارفيله ـ
س5 الا قلتي له ودّني للسوق وش يقول :ـ
أـ أبشري ولو تبين جبت لك السوق هنا ولا خليتك تتعّبين روحك وتروحين له ـ ؛؛<<< حتى لو تجيبه والله ماني براحمتك يمكن اللي خليته احسن ..
ب ـ إن شاء الله .
جـ كانك ملزومة وديتك هالحين والا خليه عقب .
د ـ معصي .. وماتلاحظين انك ذبحتينا بالسوق الا ماودك تطقين لك خيمةٍ فيه أزين ـ
س 6 ـ الا قلتي له عطني 1000 ريال ابفصّل ثوب لزواج اختي وش يقول :ـ
أـ مغير 1000 غالية والطلب رخيص .
ب ـ خذي ولو ان الألف واجد .
جـ ماتكفيك خمس ميه .
د ـ وشي ألفه ؟ لو تفصلين لك فستانٍ بمية الف منتي زاينه خذي ميتين بس ودوري لك أيّة خلـَق ورجّعي الباقي ـ
س7 ـ الا قعدتي تموّلين وانتي تقطعين السلطة وش يسوي رجلك :ـ
أـ يجي يقطع السلطة بدالك ويقول لك : غني لي شويه شويه .. والسلطة خليهاعليّه ـ ؛؛<< وينه فيه ذا
ب ـ يقول لك ارفعي صوتك وأطربينا
جـ يقول اقصري حسّك شويّ
د ـ يقول لك ورى العنز صجتنا قطتس ماحطيتي لها شعير اليوم ـ
س 8 اذا صار زوجك عندك في البيت وش تحسين انه :
أـ يكشخ ويتمكمك ويتطيّب ويتسنع وكل شويٍ يتنظّر كنه يبي يروح لعرس
ب ـ يكشخ على خفيف
جـ ـ مرٍ يكشخ ومرٍ يطنش
د ـ يطق صروال السنة .. 24 ساعة.. والا خربها وكشخ لبس قميص النوم المقـلــّم ـ <<< واذا ماسواها مو برجال قال يتسنع قال:arb:
س 9 الا قلتي له أبروح أزور أهلي يومين بس .. وش يقول لك :ـ
أ- يومين كاملات !! مايكفي يوم والله يصبرني على فراقك
ب ـ أبشري بس يومين مافيه أكثر
جـ ـ مايخالف وان بغيتي تجلسين أكثر ماعندي مانع
د ـ مغير يومين ؟ ماتسوى العنوة ماودك تقعدين عندهم شهر ترى ذولا أهلك ولهم حقٍ عليك وان قعدتي شهرين بعد مهيب شينه ـ
ياكثر اللي بينفضحون في ذي ـ :35:
س 10 الا قلتي له تحبني وش يقول :
أـ " منيب أحبّك أنا والله من حبّك .. أحبّ حتى ثرى الارض اللي تاطاها " ـ
ب ـ أجل ما احبك
جـ يعني مرّ ومرّ
د ـ ياشين العجز الا جن على بالهن رومانسيات أقول خلي حركات المراهقه عنتس و هذا اللي جنيتيه من المسلسات المصرية .. قومي كبي الجريش بس تراه داقّني الجوع ـ
<<<:35:
س 11 وش تلاحظين انه :
أ ـ يجيب لك هدايا دايم ويكتب فيها أبيات شعر غزل ـ
ب ـ يجيب لك هدايا أحياناً
جـ يجيب لك هدايا الا جاء من السفر ولا هوب قبل بعد .
د ـ ماعمره دخل الا وهو مدودل ٍ يديه ولاعمرك شفتي منه شي عقب الشبكة ـ
س12 إذا كشتّي انتِ واياه في البر وقلتي له وش رايك نمرح فيذا الليلة وش يقول < وش ذا المزاج وانتي مالقيتي تختبرينه الا في ذي
أ- تامرين أمر .. ودامك معي لو تبين نمرح في عشّة غنم ماخالفت
ب - والله ان ماودي مرة بس كانك صاملة مايخالف
جـ - ودي نمرح فيذا الليله بس إني أخاف تغثنا القواريص
د - وش اللي نمرح ، تبين عشان تقرصك عقرب والا دابّ وأبلش بك يالله بس مشينا ماعاد الا خير
وهالحين ناظري النتيجة :
اذا صارت أكثر اجاباتك بحرف الألف : ـ
فترى زوجك ضايعٍ في خرايطك ودايخٍ معك ورايحٍ معك خرخر ولو شبيتي له ضوّ وقلتي طبّ فيها قال آمري بس تبيني أطب ( لقّافي ) والا ( محيفرة ) .. و أنصحك انك تحافظين عليه وتحاولين انك تشوفين وش الأشياء اللي محببته فيك وتستمرين على فعلها .. عشان تستمر هالخقّه
<< ابوك يالحب :35:
واذا صارت أكثر اجاباتك بحرف الباء :ـ
فاعرفي ان زوجك يحبك مرة بس هالحب من المحتمل انه يقل لو ضيقتي صدرة ببعض الاشياء فانتبهي له . ـ:27:
واذا صارت أكثر الاجابات بحرف الجيم :
فاعرفي ان زوجك مهوب يحبك مرة ودوّري الاسباب اللي خلته مايحبك وحاولي تعالجينها .. والا تدرين عطيه أشكل بس أريح لك ( الله من زين النصيحة ) .ـ:35:
أما اذا صارت أكثر الاجابات بحرف الدال :ـ
فإعرفي ان رجلك مهوب يحبك، ولا يواطنتس في عيشة الله .. و أيّسي انه يبي يحبك لو تحطين له الشمس ساعة في يده ، وتنظمين النجوم ( صنقل ) لها .. وتحلبين له خنفسان وتخرفين له من البرسوبس تمر برحي ، مهوب حابك .. هذا شاطبٍ عليك شطبٍ مافيه ملح أكود من شطب مهور الهلال على البلوي ـ؛؛؛<<<
عاد لاتقلبون ع رجاجيلكم خخخخ
وسلامتكم
نقل لعيونكم .....
في حفظ الله ....