بنات أتمنى نوقف مع بعض لحظة ونشوف لين وين تودينا المظاهر الخداعة .....
حبيت أنزل هذا الموضوع علشان نقدر نواجه غلاء المعيشة إللي كثير من الناس تعاني منه
بس أول شي بفضفض و إذا مالج مزاج للقرائة خذي المضمون وبتحصلينه مكتوب باللون الوردي
1- دلال لابسة ساعة الماركة الفلانية بالقيمة الفلانية ،و أنا لا!!! .ليش؟؟؟ ترا دلال هي وزوجها الله منعم عليهم.
2- حصة سوت حفلة ملجة روعة ، أنا بسوي إللي أحلى عنها وخيــــــال ترى حصة زوجها خيرها إما تسير بيته بعباتها أو تطلق ... لأنه من بعد الملجة خسر وما عنده يسوي حفلة عرس.
3- مهرة سوت عرس الناس تكلمت عنه شهر ، أن بسوي عرس الناس تتكلم عنه العمر كله. تدرين إن مهرة ما قدرت تقضي شهر العسل .. لو في فندق 3 نجوم في بلادها...
4- ميثاء سارت هذا الصيف فرنسا ولندن وسويسرا.... يحليلها يوم رجعوا البلاد الديانة كانت تنتظر زوجها في مركز الشرطة ... لأن عليه شيكات بدون رصيد
5- ميرة لابسة فستان بالقيمة الفلانية ومصممتنه عند المصمم الفلاني ، أنا مب أقل عنها... بخبرج عن ميرة ترى زوجها جيبه يَصفِر وما عنده يشتري روشن للبيت... وحتى الغدا مب لاقين رز وسمن عشان يطبخونه.
6- هند راكبة السيارة الفلانية آخر موديل و رقم 1 ... المسكينة زوجها بايت في السجن ما عنده يدفع أقصاد السيارة.
7- نجلاء سوت بيتها بملاين، بكسر خشمها وبسوي بيت أكبر عن بيتها.... تصدقين إن زوجها المسكين صابه السكري وجاله مرض القلب من كثر التفكير والهم ... كيف يسدد ديونه؟؟
ففكري معاي بس لحظة واسألي نفسج
1- زوجي نصفي الثاني شريك حياتي .... شو يضرني إذا فكرت فيه شوي؟؟
2- شو ذنب زوجي إذا اختارني من وسط البنات وفضلني ... وقبلت فيه وأنا عارفه ظروفة المادية ... ليش ما أراعيه .... ليش أركض وراء المظاهر الزايفة... وأتعبه معاي ... هل هذا جزاه؟؟؟
3- الناس إذا تكلمت عليّ لأني ما لبست ... باجر يوم بجلس في ضيقة وماعندي أتظاهرجدامهم أكثرما بيسمون عليّ ولا بيسألون عني... بالعكس بيدورون أي موضوع ثاني يتكلمون فيه.
4- من متى كانت رضى الناس غاية تدرك؟؟ وإذا أرضيتهم على حسابي وحساب زوجي ونفسي ... شو بستفيد؟؟؟
5- شو بيصير لو ضغطت على عمري فترة ... وأرتاح باقي حياتي؟؟
6- لبست أو ما لبست الكل يعرف أنا بنت منو وزوجة منو؟؟ يعني إللي عندها لو خذت ساعة تقليد الناس تحسبها أصلية ... وإللي ما عندها لو تاخذ الأصليه بيقولون فالصو وتقليد.... وهذا الواقع
بعطيكم مثال لأسوأ الحالات... وأرقام خيالية بس للمثال أوكي ...
وحاولي تجربين بس شهر وحد .... هذي الطريقة .... شوفي شو النتيجة ... صدقيني مابتخسرين شي من التجربة ... يعني خلي إنتي أقل سعر عندج بس بشرط يكفي الأساسيات
وخلي لكل شي ظرف وفي القيمة اللي متوقعتنها وورقة علشان تكتبين كل شي تشترينه
راتب الزوج 8000 درهم + راتب الزوجة 7000 درهم = الميزانية 15000 درهم
قرض البنك 2500 درهم
إيجار الشقة في السنة 3000 فكل شهر حطي في الظرف 2500 درهم خلال سنة بيطلع لج 3000 درهم
الخدامة 700 درهم
فاتورة الكهرباء والماء 700 درهم
المأونة 2000 درهم
بترول سيارتين 500 درهم
علاج إذا لا قدر الله أحد مرض 1000 درهم
طوارئ لأي شغلة ما حاسبه حسابها مثل عطل سيارة أو شي اخترب في البيت ويندرج تحتها المجاملات بعد 1000 درهم
فواتير التلفونات (موبايلج إنتي وزوجج والإنتر نت والهاتف الأرضي) 800 درهم
نثريات للزوج والزوجة 1500 درهم
مثلاً عندج 4 أاطفال كل طفل 300 درهم يعني المجموع للعيال = 1200 درهم
التوفير 600 درهم .... يعني إذا ما صرفتي منهم خلال سنة ممكن تجمعون إنتي وزوجج 7200 درهم ....
وممكن بعض الأشياء اللي باللون البرتقالي قابلة للتغيير فتكون أقل .... فنأخذ الباقي ونخليه في ظرف التوفير ... لكن إذا كان أكثر من المتوقع حاولي تحركين من ظرف الطوارئ أو من أي ظرف ثاني قابل للتقليل ... فمثلاً إذا كانت فواتير الهاتف في هذا الشهر 500 درهم آخذ الـ 300 درهم وأحطهم لفاتورة الكهرباء لأنها هذا الشهر 1000 درهم .... وفي أسوء الأحوال ... أسوء الأحوال ... أسوء الأحوال ... آخذ من ظرف التوفير .... لأن ظرف التوفير المفروظ يكون شي منسي بالنسبة لي
في حالة إن الميزانية ما تكفي أو الزوجة ما تشتغل مب عيب تبحثين عن مصدر دخل آخر لكن العيب إذا اعتمدتي على السلف وحياة الديون والذل .....
ما دام بإمكانج مساعدة زوجك اللي يكد علشانج أنتي وعيالج ... ويستحمل كلام هذا المدير ... وأوامر المسؤول إللي كأنها جبل .... علشان خاطرج إنتي والعيال.... فوين المشكلة؟؟؟
وصدقيني لا تقولين أنا بنت فلان وأنا بنت علان أسوي جذي ؟؟؟ لأنج بتكبرين في عين الناس .... ... وهذا ما بينقص من شأنج أبد .... وعندج عدة مقترحات للمساعدة ... وأهم شيء الإرادة ... طبعاً على حسب الموهبة إللي الله سبحانة وهبج إياها
1- تصميم عبايات وشيل وشنط وأحذية طقم.
2- عمل اكسسوارات وفيونكات أو شباصات
3- عمل أطقم للبيبيات مثل (شنطة – قماط – أغطية السرير للبيبي .... الخ)
4- توصيل أطفال الجيران والعائلة للمدارس والكليات
5- إعطاء حصص خاصة في بيتج حسب المواد إللي انتي شاطرة فيها
6- عمل بعض أصناف الأكل وبيعها
7- عمل خلطات عطور ودخون وكريمات الجسم ... ويا كثر الخلطات المعروضة في النت
8- عمل مكياج أو سشوار أو تسريحات
نصائح للترشيد الإقتصادي
• كلمي عيالج عن وضعكم المادي ... ولو ظروفكم المادية ما عليها كلام ودخلكم كبير ومب محتاجين للتوفير ... وفهميهم إن هذي الفلوس ممكن في يوم وليلة تضيع إما في بورصة أو تجارة أو أو أو .... بس لاتكلمينهم بطريقة ممكن تكسرين بخاطرهم... وتحسسينهم إنهم أقل من غيرهم ... وعلميهم الحياة من صغرهم
<B>• اقتصدي في الكهرباء o أغلقي أي مصباح أو جهاز انتي بغير حاجة له.</B>
o لا تفتحين المصابيح في النهار
o اضبطي درجة التكييف على 25 أو 26
<B>• ممكن الإستغناء عن الخدامة إذا عيالج كبار وقادرين الإعتماد على النفس ... بس في البداية علميهمo اللي ياخذ الشي يرجعه لمكانه</B>
o اللي يصحى من النوم يرتب فراشه
o اللي يخلص أكله ينظف صحنه
o بعد أن تنتهي من غسيل الملابس وجليهم وكويهم أن يضعوها في خزانتهم
• استخدمي الهاتف الأرضي للمحادثات المطولة لكن الموبايل اجعليه فقط للضرورة
• إذا انتي وزوجك دوامكم على خط واحد استخدموا سيارة واحدة لتوفير البترول
وبجذي أتمنى إني قدمت لكم شي مفيد
واكل خبز وماء بس اهم شي زوجي يحبني ويحترمني
والارزاق بيد الله