تعبت من معاملتها لي .. يارب صبرني و فرج همي وعوضني

مساء الخير..
والله ابي افضفض ابي اطلع الي بقلبي .. ابي دعوات تريح قلبي .. ابي ردود تواسيني وتدعي لي ..


الحمدلله على ما ابتلاني به .. شاء القدر واكون مطلقة .. شاء القدر وارجع لاهلي .. شاء القدر واكون محل الاهانه والشماته مو من الناس .. من ((امــي)) ..


كل الناس اقدر اتجنبها كل الناس اقدر اتجاهلها كل الناس اقدر انساها .. لكن يكون الي يشمت ويقهر ويستغل نقاط ضعفي معاي واقرب الناس لي .. بالله كيف اقدر انسى او اتجاهل او اتكلم وارد ..


أمي متغيرررة حيل والله العظيم احس اني احبها واحس اني ارحمها واحس بكل شيء تجاهها لكن هي خلتني اتجرد من كل شيء .. امي اهانتي بطلاقي شمتت فيني واني احسن استاهل الي صار لي .. والله اني تعبت من معاملتها لي ..


بنااات والله العظيم انها تختلق مشكلة معاي من اتفهه اتفهه اتفهه الاسباب حاولت افهم السبب حاولت اعرف ليه كل هذا البغض وسوء المعاملة ليه ..


قلت يمكن فلوس يمكن نفسها بشيء والله العظيم والي خلقني اني اعطيها بدون مقابل بس ابغاها تعرف اني انا احبها واني اقوم بواجبي تجاهها بس علشان تحترمني بس لو شوي مو تستنقص من قدري وتهيني وتذلني وتقهرني ..


والله لما نزل الذهب اشتريت لها بملغ فوق سبعة الالاف بس علشان تكشخ وما تحس انها غير الحريم .. قلت عباياتها بغيرها وبالفعل اخذت لها مثل عبايتي ويمكن اغلى منها ومن احسن الماركات .. بالبيت رغبت او نفسها بشيء والله اعطيها واقول كملي بالفلوس هذي الي ناقصك .. اعطيها فلوس اشحن لها جوالها .. والله ان ماعندي الا الضمان وباقي من مؤخري .. يعني مو مقصرة معاها ماديا ..




لكن المقابل ولا شيء .. يا بنات والله حتى بالبيت والله اني ارتب وانظف ولا اخلي شيء وعلى كذا يا تقول وسخه ما تنظفين ولا تعرفين او انتي ما تشوفين الشغل المهم تفتح سيرة كلام ماله نهاية كلام يوجعني ويبكيني كثييير ..


انا تعبت لاني من النوع الي ما ابين دموعي لاحد ابكي لوحدي واتعب مع نفسي على بالها اني ما تاثرت بطلاقي ولا اهتميت وانا والله العظيم ما يمر يوم الا وابكي فيه واحن لحياتي وبعدي عنهم وعيشتي ببيت لوحدي ..




اللحين والله العظيم ساءت معاملتها لي بالمرررررة .. الغرف كلها مقفلة بالمفاتيح الصاله مستحيل اجلس فيها غرفتي طردتني منها .. صارت تتحسس مني او تغار مني او بالضبط شووو ما ادري .. والله باتجنن تخيلو يا اجلس بالدرج يالسطح يابغرف فوق كلها مستودعات ..




ان تكلمت وناقشتها تقول انا الآمره والناهية بهذا البيت او قالت انتي عاقة انتي تستاهلين الي يصير لك وبدات بالكلام الي ماله نهاية يوجعني ويقتلني ويخلني اذووووق المرارة واتمنى الموت ..


وان سكتت ولا ناقشتها بتجلس تتكلم وتستفزني حتى انفجر .. والله مرة طنشت بالايام وتجاهلت اخر شيء اتهمتني اني اكلم واقابل .. والله بغيت انجن .. وصلت المواصيل لكذا ..
ااااااه ياربي لك الحمد على كل حال ..


حتى اذا قلت لابوي ابي شيء او وصيته باغراض لانه قلبه طيب وحنون ولا يرفض لي طلب .. احسها تنقهر حتى لو ما بينت بالبداية بس بالاخير بتنفجر يعني تعاملني كاني ضره لها مو بنت لها ..


بالطبخ كرهتني فيه اذا طبخت حلى او شيء بتهيني وتذلني وتقول لا عاد تطبخين هذا مو مطبخك .. وانا من عشاااق الطبخ يعني مستحيل وادخل اطبخ .. الحمدلله على كل حال ..


ودها تعاملني مثل الاطفال ودايم تقول اخواني الصغار باقي يسمعون كلامي .. اما انتي لا .. انا والله مو صغيرة ولا مراهقة ولا شيء ودي تعرف اني كبرت عن هالاشياء .. دايم تهددني انها لتكسر لاب توبي انها لتاخذ وتكسر جوالاتي .. حتى جبت لي اغراض من بيتي رمتها بالزباله .. والله انها اوجعتني حركتها لكن طنشت .. انا موصغيرة عمري 29 كبرت عن هالمعاملة .. ومن جد الي تزوجت وعاشت ببيت زوجها كل شيء موجود كل شيء برغبتها صعبة تقدر ترجع تتعامل بهالطريقة ..والله تعبت يارب رحمتك ..




والله بقلبي كثيرررر واحس الوجع فيني يزيد ..
الي يهديني الحمدلله ويخلي في قلبي امل اني دايم اقرا سورة البقرة يوميا بقيام الليل واقرا الرقية الشرعية .. واحلامي الي مبشرة لي بالفرج والزواج ... هذي تعطيني امل بالحياة ان بكرا اجمل .. والا والله العظيم اني بموت من قهري من طلاقي ومن حياتي بيني اهلي .. والله لو الود ودها تطردني بالشارع ليه ليه ليه ...


حتى رسالة الماجستير ماعاد قدرت اكملها ولا ودي انحرم منها دام انا وصلت للنهاية لان في بعض البيانات احتاجها من مناطق ثانية ولا عندي احد يوديني ... يارب يسرها لي يارب


والله تعبت معاه ان تكلمت وناقشتها مافاد او سكتت مافاد .. وكلامها يوجعني بقلبي والله .. اسال الله ان يربط على قلبي ويصبرني ويعوضني يارب ..


يارب اهديني وثبتني وصبرني واربط على قلبي ويارب تهدي امي وتسخرها لي وتصبرني على معاملتها ... يارب عوضني بزوج صالح شاب اعزب يسعدني وارزقني بالذرية الصالحة السليمة المعافى عاجلا غير اجل .. والله اتمنى اتزوج واعيش ببيت لوحدي يارب ارزقني ما اتمنى يارب .. لي ولكل عازبة او مطللقه .. وكل متزوجة ربي يسخر لها زوجها ويسعدها بالدنيا والاخرة ..


دعووووووواتكم لي .. يمكن فيكم الي تدعي لي بظهر الغيب وتستجاب ..