تعبنا من المشاكل,.!

السلام عليكم

اولآ..
اتمنى من ربي يفرج على كل الناس همومهم ومشاكلهم

ثانيا..
ايقنت بالمثل اللى يقول من شاف مصيبه غيره هانت عليه مصيبته..

فعلا مرات اقول الحمد لله مشاكلنا اهون من غيرنا
بس لما تتجدد المشاكل وتكبر اكثر من الثاني اقول مافي احد مثل مشاكلنا

بدخل بالمشكله

اولا امى تزوجت من ابوي ومن زواجها وهي بمنطقه ثانيه عن اهل امي واهل ابوي
طبعا امي ترتيبها 2
وتزوجت قبل خالتى 1
وطبعا كان الكل معارض على هالزواج
وامى اصلا مافرقت معها لانها ال2
بعد واسطات وقناعات من العائله (خال امي_جدتها_خال امها ويصير ابو الزوج)
تزوجت بعد مااقتنع جدي وجدتي وخالتى ال1 ماكان عندها مانع

تزوجت امي وجابت بنتين
بعدها تزوجت خالتى ال1 من رجل غني وكبير بالسن
واجبت منه بنت وحامل
وهي حامل توفي زوجها _الله يرحمه_

طبعا مرت السنين ..

وجدتى انقلب حالها..!
صارت ماتبي تزوج بناته من شباب..!
تبي تزوجهم شياااب..!

خالتى ال 3 تزوجت من شايب غني لاكن ماقدرت تتحمل ذله واهانته لها ..!
بعد سنه وبالاربعين طلقها..!
طبعا جدتى لعنتها ولعنت اليوم اللى ولدتها فيه بسبب طلاقها
قال ايش اجلسي عنده لو خدامه..!

خالتى ال4 تزوجت من شايب وبعد سنه وبالاربعين طلقها

اما خالتى ال5
كانت ملكه جمال ماشاء الله
كانت بالكليه مايوقف الباب من الطق
وكانت ترفض
هذا يدخن هذا وظيفته مو زينه هذا عسكري وووو من الاعذار الواهيه اللى مالها سنع..!
طبعا كل عذر اقبح من ذنب
وطبعها كتوم وساكته ولاتقدر تتكلم..!
تقول وش اقول اقول ابي اتزوج..!
مرت هالسنين وتخرجت البنت
وكل مايطق الباب ترفضهم
لدرجه ان وحده من صديقاتها قالت ابي رقم احد من اهلك اختك او امك على شان
ان كان من جماعتنا بيخطبون اقولهم عنك
عطتها رقم خالتى ال1
ومرت هالايام
ويجيها خطاب لاكن يرفضون من دون علمها..!

ولين المسكينه ماوصلت مرحله خلاص ..!
وعدت ال29
وخطبها ولد خالتها
هنا الطامه جدتى رفضت وسوت مشاكل مالها اول مالها اخر
وكلنا كنا ضد جدتي خلاص مابقى للعمر كثر مامضي
لمتى بتجلسين هالبنت..!
المهم ماخلتنا نفرح فيها ماصار عرس ولا طق ولا وناسه
عزيمه بالبيت ماكان فيها الا حنا وحريم اخوانها 2
وقالت انا غضبانه عليك ليوم الدين ولا احللك
وحلفت حلفان ماتطب العرس على شان كذا كنسلو كل شي
وصباحيتها جت تسلم عليها
وخرتها ودفتها وقالت وخرى عني مااحللك
رجعت تبكي علينا انصعقنا بصراحه..!
قامت خالتى ال 1 وخالتى 4 وقالو مالنا دخل حنا مع امنا..!
ومن هنا انقسمنا حزبين..!

حزب جدتي وخالتى ال 1+4

والقسم الثاني امي وخالاتى ال 3+5
ومن يومنا وحنا (المغضوب عليهم)
بيت العائله اللى فيه جدتي باسم امي وخالتى ال1 وخالتى 4

طبعا محد بالبيت الحين غير جدتي وخالتى ال4 لانها مطلقه
وخالتى الصغيره اخر العنقود
طبعا خالتى ال1 مخليه جدتي تجي لبيتها وتسكر بيت العائله من العصر لين 10 بالليل
وحنا ماسالت عنا ونجي من ديره لديره ولاتعبرنا ولاتكلمنا

والمشكله انها تقول لامي
انتى عقيتي فيني بسبب وقوفك مع اختك ضدي..!
قالت امى مصلحتها لازم تتزوج حرام تعنس وتجلس بالبيت..!
وقالت امى ترى ماينفع اللى تسوينه تفضلين اختى ال1+4 علينا
قالت انتم عاقين فيني وهم لا جعل بناتك يعقوون فيك انتى واختك ال 3
تخخخخيلوو تدعي بكذااا

المشكله انها مصليه مسميه وكل النهار بهالسجااده

وكل ماشافت امى جدعت عليها كلاام يسم البدن
ولا تقول لامي رووحي لاختك سلمي عليها ..!
عقب البهذله والشتايم امى تروح ليه عسى ماشر.!
امى الضيفه هي اللى تنزار ماتزور..!
غير كذا لها مساع ال1 ودها يتقفل البيت وتلهف منه
المشكله ان ال1 كرهت جدتي بامي مرره
وحتى العيالالصغار عارفين الوضع لان فيه تفرقه بين الاطفال ..!
جدتى تسال على عيال ال1 واكلتو لعبتو صار فيكم شي
وحنا مثل الجدران عندها

طبعا كل هذا ليش
لان خالتى ال1 تبي زوج خالتى لبنتها اللى توها تدخل ال20 سنه..!
تخيلو..!
غير حسدها لى وحقدها
تقول لامي بناتك لايلبسون قصير وبناطيل وفساتين عيب عن اهلهم ..!
ووش دخلك وش حاشرك وبنتها كل لبسها بناطيل وبلايز..!
ع الاقل الحمد لله حنا نلبس بلايز طويله مع البناطيل هي لا كل شي ضيق..!
تحب كل شي زين لها ولبنتها..!

وحتى بنتها تغاار مع اننا ماكنا كذا كنا اربعه وعشرين تبن مع بعض نسهر ونطلع ونروح مع بعض

امها بالبدايه غارت لما فرقت بينها وبين امي..
هي تزوجت واحد جلست معاه كم سنه وتوفى وكان متزوج 2 غيرها
وجابنت منه وبعدين تزوجت مره ثانيه من واحد على قولتها بخيل..!
لاكن مرات لما ادخل بيتها واشوف اللى فيه اقول ماشاء الله المطبخ مليان وبيتها ماينقصه شي..!
صرت اقول اتوقع انها من (كفارات العشير)والعياذ بالله..!

وبنتها من قلبت امها وهي قالبه علينا
والغيره حدث ولاحرج..!
اولا قلت انا ابي اشترى كام احسن من كام الجوال
يعني لو اصور مو مشكله مو مثل الجوال
وسالتنى وقلت لها احسن نوع واحسن محل
لانى بحثت لين طلعت عيوني وبالاخير
تشتريها قبلي ولا كانت تقول مو لازم وماتنفع وكذا..!
المره الثانيه
شريت بلاك بيري وعلى طوول شرت بعدي..!
المرحه الثالثه
قلت عندنا سواق انجنوو وليه ومايصلح ومدري وش وكلام فاااضي
بالاخير جابو سواق هم .!
وين اللى بيقنعونا نسفره....!!!

سافرنا للدمام وحنا كل سنه نصيف بالمملكه
قامو وسافرو للدمام وماعلمو الحمد لله والشكر ..!
وخالتى ال4 تقول لا ماسافرو ووش عليكم ..!
الحمد لله حنا شايفين الدنيا والعيشه مو مثلهم يسافرون بالخش والدس..!

ومره راحو للرياض ولا قالو
اللى يسمعهم يقول رايحين باريس ولا روما..!

الزبده

ابي حل لجدتي..!
عنيده +متكبره+قويه عيين +ماتخاف من احد
لاتقولون لى استحي عيب هذي جدتك..!
والله كل هذا فيها ماتبليت..!
عجوز وش كبرها مليانه امراض تتطاول على جدتى وسب وشتم بسبه انه اللى مزوجها
طيب موضوع وانتهى وله فتره خلاص وهو وليها ويزوجها اللى يبي..!
كافي انه طول هالسنين معطيها الخيط والمخيط وساكت على بلاويها وعمايلها وتسوي اللى براسها..!

وبعدين امى وش دخلها بالموضوع
بعيده+ماتدخلت بالموضوع

الحين خالتى الصغيره حاطين الحره فيها
مافي مشكله ماتطيح على راسها
وجدتى اتوقع مصممه لو يجيها شايب تزوجه لها..!
ولا قالو لها لما قالت ليه تعاملوني كذا
قالو نخاف تسوين مثل اختك..!

وماسيرتها غير ابعدو عن الموضوع والله لاادعي عليكم..!

ومره تبلو على خالتى الصغيره
طلعت دولاب صغير لخالتى1
وقالت غرفتي وطلعتها للغرفه الثانيه
قالو ايه تطردينها و ماتبينها وووو
قالت ماجاء هذا ببالى مضيق على الغرفه بسس وطلعته وحطيته الغرفه الثانيه ووش صار يعني..!

ولعنوها وصارت سالفه من شي تااااافه
قالت خالتى الصغيره اذا ظالمتنى حسبي الله عليه,,,!
انجنت جدتى تدعين على اختك ياقليله الخاتمه ياللى فيك ومافيك
قالت خالتى ترضين على وتدعين انتى علي على شان دولاب
ولاترضين عليه..!

المهم والزبده

وش السواات مع جدتي..!
ذبحتنا كل يوم الثاني تدعي علينا
هذا وحنا بعيدين..!

مرات اقول محسودين
ومرات اقول عين..!

ومرات اقول جدتي مسحوره اكيد..!

بنات بجد تعبنا منها كرهنا الروحه لهم..!
وش الحل الله يخليكم
هل فعلا مسحوره..!
وكيف نعرف
ونفرق بين الحسد والسحر والعين..!

لانها اول ماكانت كذا ابدا..!

والله يعين بسسس