تقدم لأختي شاااب ... موضوعه محير جدا صراحة !! / استوفى الردود

السلام عليكم يابنات

بدخل بالموضوع على طول من غير مقدمات

تخيلوا معايا يابنات

============================

تقدم لأختي الصغيرة عمرها 21 سنة .. شاب عمره 23 سنة

الولد من عائلة معروفه .. وكلم ابوي انه يبغى يخطب اختي .. ابوي طبعا طلب فرصه على بال مايسال عنه وعن دينه وعن اخلاقه

واحد من اصدقاء الطفوله لهذا الشاب هذا خبرنا بكل شي عنه

خطيب اختي لمن كان عمره 10 سنوات ... اهله كلهم سافروا بالسيارة للتمشية ماعدا هو رفض يروح معاهم وجلس عند واحد من اقاربه

اهله طبعا ابو وام و3 اخوان و4 اخوات

قدر الله على اهله وصار عليهم حادث .. توفيت اختين من اخواته واخ .. والبقيه دخلوا العنايه المركزة

بقية اهله خلال 6 شهور وهم بالعنايه كانت حالتهم خطرة .. وكان كل فتره واحد من اهله يمووت في العناية

يعني خلال 6 شهور ماتوا اهله كلهم واحد ورا الثاني الله يرحمهم اجمعين .. وهو عمره كان 10 سنوات

لدرجه انه صاحب هذا الولد اللي هو خطيب اختي .. يقول اخر جنازتين كان متبلد

الولد راح سكن عند جدته وعاش هو وياها لحالهم .. جدته اهتمت فيه لمده 3 سنوات الين ماصار عمره 13 سنة .. وكان خلال هالفتره يراجع دكتور نفسي ومستواه الدراسي تدهور ونفسيته تغيرت <<< مالومه والله مسكين

وبعد 4 او 5 سنوات جدته ماتت الله يرحمها ومن يومها وهو ساكن لحاله .. يعني من يوم كان 15 سنة وهو ساكن لحاله

يقول بصراحه الولد صار انعزالي مرة ومايحب يطلع .. لكن كبر شوي وصار عمره 18 او 19 وبدا يطلع واهتم بدراسته بالثانويه وماشاء الله دخل الجامعه والحين متوظف وراتبه تقريبا 12 الف ريال


احنا بصراحه محتارين يابنات .. الولد صحيح مر بحياة قاسية .. لكن طول وقت طفولته ومراهقته ماكان فيه احد يربيه .. مع انها اهم مرحلتين لازم يكونوا الوالدين موجودين فيها

الحين اللي يكون يتيم الاب او يتيم الام تربيته تتأثر .. كيف هذا الولد اللي كان عنده عائلة كبيرة وفقدهم مرة وحدة

اخاف اختي تتورط معاه ويطلع مريض نفسي او شي .. الناس اللي سالناهم عنه يقولون لا مافيه شي والحمدالله قدر يتجاوز الازمة .. لكن برضوا اصحابه مايكونوا معاه بالبيت او 24 ساعة

كمان من ناحية الاخلاق .. الولد اخلاقه عاديه يعني محافظ على صلاته ولا يدخن .. لكن ماهو لدرجه انه مطوع

احنا خايفين انه يطلع فيه شي غير اللي وصلنا عنه .. يعني الحوادث اللي هو مر فيها بحياته الا ماتأثر عليه

ابوي مو مره متحمس انه يوافق .. لانه يقول اخاف الولد فيه شي .. وبعدين الاهل عزوة وهذا مقطوع من شجرة .. بكره لاجا لبنتي عيال يبغون اعمام وعيال عم .. مابيحصلون

=========================

اتمنى مشورتكم .. واذا فيه احد منكم يعرف ناس مروا بمصايب بحياتهم وصاروا عاديين ياليت يخبرونا

هل المصائب اللي حدثت بالماضي راح تأثر على الحياة الزوجية ؟!!