جيس كيك مانغو خرافه

السلام عليكم عزيزاتي اليوم جايبه لكم وصفة جيس كيك بالمانغو خرافه عملته جديد وحبيت اشاركم الوصفة حتى تجربوها وصدقوني ما راح تندمو ابدا والوصفة هي كالتالي :
المقادير :-
باكيت بسكوت 120 غم دايجستيف
50 غم زبدة
مغلف كريمة دريم ويب
علبة قشطة
علبة جبنه مثلثات نوع طعمه
مغلف جيلي مانغو
ملعقة صغيرة جيلاتين بودرة
معلقتين سكر بودرة
حبة مانغو كبيرة الحجم
طريقة العمل :-
اول شي نضع البسكوت في محضرة الطعام ونضربه حتى يصير ناعم بس مش كتير ثم نضيف الزبدة ونضربهم عالخفيف بس لتتداخل الزبدة في البسكوت ثم نديرهم في قالب للتشيز كيك متوسط الحجم ونضغط عليهم باليد جيدا ثم ندخل القالب في الثلاجة
2- في نفس محضرة الطعام نضيف مغلف الكريمة + السكر بودرة+الحليب البارد(كوب صغير) ونخفق
3- نضيف القشطة ونخفق
4- نضيف علبة الجبنه ونستمر بالخفق حتى تصبح كريمة متجانسة
5- هلأ شو بنعمل بنذوب مغلف الجيلي في كوب واحد بس من الماء الدافئ ونحرك بالملعقة لحد ما نتأكد انه الجيلي ذاب جيدا وبنضيفه لمزيج الكريمة بس مشكله يعني بنترك كمية منه في الوعاء الي ذوبناه فيه(كمية قليلة تقريبا ملعقتين)
6- بنقشر حبة المانغو وبنقطعها وبنضيف تقريبا نصفها الى مزيج الكريمة ونخفق حتى تصير كريمة متجانسه وكمان بنذوب ملعقة الجيلاتين في ملعقتين ماء ساخن وبنضيفهم عالكريمة وبنخفق وهيك بنكون انهينا من الكريمه هلأ بصبها فوق طبقة البسكوت الي في القالب وبنرجعها عالتلاجة وبنتركها عدة ساعات
7- هلأ بنحضر الصوص تبع التشيز كيك بنضيف كمية المانغو المتبقية في محضرة الطعام وبنضيف معها كمية الجيلي الي تركناها (الجيلي راح تلاقيه جمد لأنه تركناه عدة ساعات مش مشكله ممكن تسخنيه في المايكرو ويف بتلاقيه رجع صار سائل ) المهم بنخفقهم مع بعض بصير عنا صوص جميل من المانغو بنصبه فوق طبقة الكريمة وبنرجعه عالتلاجة كمان عدة ساعات وبعدها بتطلعيه وبتحرريه من قالب التشيز كيك وبتلاقي عندك اطيب تشيز كيك بالمانغو وصحة وعافية
جربوه ما ارح تخسرو ابدا