حابه أفضفض أتمنى إنكم تهونون علي

السلام عليكم ورحمه الله وبركاته
حياكم الله اخواتي:) والله الهم بلغ فيني مبلغه الله يفرج علي وعلى كل مهموم:( والله قعدت أقرأ قرآن وأدعي وجلست على النت وحاولت أكلم أحد بالتلفون أسولف معاه لكن للأسف اليوم أربعاء ماحد بالبيت:09:
مشكلتي الحمد لله مهي كبيرة للحد الي أنا مكبرته الحمد لله أحسن من غيري بألف مرة وأنا مقتنعه بحياتي وما أطلب شيء بس أبي زوجي يفهمني ويقدرني
مشكلة زوجي ما يشوف غير اهله .. أنا ما عمري قلتله شيء عن اهله بالعكس اللي مافيه خير لأهله ماراح يكون فيه خير لي يعني انا ماني قادره اجمع الكلام لكني بموت قهر من هذي الحركه بالله في وحده منكم ترضى أنه زوجها يربطها بأمه وأخته يعني لو أبغى أروح لمشوار أو لأهلي أو لناس يقولي معليش خليه مرة ثانيه أختي عندنا أو راح تجي أو الوالدة ودها تروح مشوار ( طيب أنا ساكنه بشقة صغيرة فوق أهله لكن طبخي معاهم وأخته ترجع مرت أخوي وتجي عند أهلها في أي يوم وأي وقت وتنام باليومين والثلاث وهذا حقها لكن مو حرام إني أنا اجلس عندها إلين هي تروح بيتها وأسيب مشاويري وزياراتي عشانها مع إنها ما عمرها اتصلت وقالت انا بجي عند اهلي إنت رايحه مكان ودنا نجلس مع بعض والله يا أخوات إني ماني راعيه طلعات ولا أسواق ولا جمعات ولا أتواعد مع احد بسوق ولا ملاهي ولا غيره مع إني اجتماعيه و أحب الناس بس الله يهدي زوجي خلاني اسيب كل صاحباتي لأنه ممنوع تروحين لأحد ما نعرفه ولا يحب كثرة المكالمات فقطعوني هم قبل ما اقطعهم
أنا ماألوم عمتي ولا صهرتي مالهم ذنب اللوم على زوجي يعني أنا ماني قادرة أتخيل أني أعيش باقي عمري ما لي شور في نفسي اليوم اختي عازمتني على الغداء ومتفقين على هذا الكلام قبل أسبوع وهو يدري وماعنده مانع بس اتصلت حرمه من تقول لعمتي اشتقنالكم خلونا نشوفكم تعالوا عندي اليوم فقلت لزوجي مالي خاطر أروح عند المرة انا ماني مقصرة معها دايم اروحلها وهي ماعندها سالفة بس تبينا الحالنا نتقهوا عندها كفايه عليها عمتي وصهرتي وأنا بروح عند اختي إش تتوقعون رده
قالي بكل برود اختك ماهي طايره روحي عند المرة عشان أمي ماتزعل تقول راحت عند اختها وما جت معانا:eek: بالله عليكم ما يفور الدم أنا عندت وقلت يا أروح عندأختي ولا اجلس بالبيت عند المرة ماني رايحه والله ولا همه مش كلامه وخلاني بالبيت وقهرني بعد يجي يقول ليه ماتلبسين البنات يرحون مع الوالده ياحرام راحم بناته وانا لي الله
والله يا أخوات مرة عندي موعد مراجعة و أنا حامل قلي أجليها أختي عندنا بالبيت وعلى ها الحال كل شغلة والثانية قال أختي بالبيت كأننا مانعرفها ولا ضيفه غريبه يبيلها ضيافه وهي لو اتصلنا عليها وقنالها إحنا عند أهلي تعال لأنها ببيت بروحها تقول ان شاء الله وتروح لأهلهاولاأحد يقلها ثلث الثلاثة كم طيب إذا كان هو ماوده يزعل أهله أنا وين ماكاني عندهأنا ما طلبت يعصي أهله ولايزعلهم بس هذي حريتي أروح مكان ما ودي انا ما ضريت احد أسلوبه هذا يخليني احقد عليهم لأنهم احرار ماحد يكلمهم وين ما ودهم يروحون وأنا لا لازم أشاورهم وأكلمهم والله ما أطلب منه شيء مطاعم ما أروح تمشيه معاه لحالي مافيه وإذا صادف وطلعنا بالسنه حسنه مايكون لنا ساعه إلا وهم متصلين تلفون نبي نتعشى تعالوا طلعات مع أهلي وصاحباتي ما فيه إلا قليل القليل وفوق هذا منطقة بالبيت لحالي:angry: مع إنه دوام واحد يعني من الساعة أربع إلى 12ما عنده شغل على الأقل يفضالي وبناتي ساعتين والله ما أشوفه إلا وقت النوم ولو جيتي بتسولفين أو بتتكلمين في موضوع يخصنا قال تعبان خليه بكرة
ومع ما ذكرت لن أكفر العشير زوجي انسان رائع وحبوب وحنون ولو دورت بالعالم ما ألاقي ظفره لكن أناااااااااااااااني يحب يمشي رايه بدون مايكون لي حتى شور
تصدقون أول مرة أطلع كلام البيت بره من كثر مابي ودي أحد يفهمني الوالدة إذا كلمتها تقولي اصبري بعدين العوض و أنا ودي اسوي حد للموضوع حتى فكرت أكلم أهله لازم تكون لي شخصية ما أكون بس سلبيه اللي يبونه يصير ولو كان على حسابي صح ودي أرضي زوجي بس بدون ما يقهرني بدون ما يحسسني إنهم الأهم وإني لازم أمشي على هواهم