حادث على الدايري الشرقي كاد يكون ضحيته 8 اشخاص والسبب!!!!!

السلام عليكم ورحمته الله وبركاته
كيف حالكم علوكم واخباركم مع الشهر الفضيل
الله يعيده علينا وعليكم بالصحه والعافيه
صراحه في خاطري كلام كثير ودي اقوله وفي عيوني دموع شوي انثرها على خدي وشوي تتخجر في مكانها وغصه في قلبي من مشهد مريتبه وعشته لحظه بلحظه وثانيه بثانيه الوقت الي عشت فيه من اصعب الاوقت الي مرت علي بحياتي


انا مدري من وين ابدا ولا ادري وش ودي اكتب احس اني ضايعه عقلي مهب معي والله اني اكتب ودموعي تهل وصدري ضايق

اولا ابي اكتب لكم قصتي مع الموقف الي صار لي وانتم احكموا هل معي حق بالي كتبته ولا انا ابالغ

في يوم الثلاثاء الموافق16/9/1429
قدر الله ان حنا ننعزم بعد صلاة العشاء طلعنا نبي نروح لمشوارنا الي نبيه
وكان طريقنا على الدايري الشرقي متجهين الى حي السلام طبعا طريقنا من جنوب الرياض الى حي السلام
ومالنا من الشر طاري واللهم لاعتراض على حكمك انا سمعت زوجي يذكر الله بصوت علي التفت اقسم بالله منظر شفته ماانساه الين اخر يوم في حياتي جمس صالون يتقلب وباقصى سرعه مته لنا انا التفت على صوت رجلي اا غبره وجمس دبببببببببببببببببببببب في كبوت السياره طبعا من قدام طبعا واجة اسياره انعدمت تمام يعني كانت السياره باقي شوي وتلصق في وجهي
تخيلو معي السياره جمي يعني جس صغير وفيه خمسة اطفال ونا وزوجي يعني سبعه وصاحب الجمس الثامن
طبعا في لحظه من اصعب لحظات حياتي حسيت اني خسرت كل شي خسرت زوجي واولادي حسيت اني جسد بلى روح في لحظه حسيت اني مااقدر اتكلم بدى شي داخلي يتكلم بطرف عيني بدون ماالتفت شفت خرقه بيضاء خلاص ايقنت اني خسرت ابو عيالي وعيالي معه ونا مااقدر اتحرك لاتحسبون اني انشلت لا والله اني شي ماسكني ومثبتني ورابط على قلبي والله ان ذيك الساعه مانزلت ولادمعه من عيني طبعا مازلت تحت تاثير الروعه

سمعت صوت يناديني زوجي يقول لي شيلي عيلانك ونزلي بسرعه انزلي حسيت اني حييت ارجعت الروح لي بكيت نزلت دموعي قلت فيه احد حي طبعا ماتكلمت كل هذا كلام داخلي كان جنبي طفل ماكمل الثلاث سنوات اخذته انفظه بين اديني اشوف فيه حياة ولا لا والحمد لله حمد الشاكرين حسيت انه حي مع العلم انه ماتكلم ولا بكى
انا الي ذبحني السياره فيها صمت رهيب قاتل كنت احاول افتح الباب وماهو راضي يفتح بكل قوتي ادز فيه لحد مافتح وانفتح بعد مانهد حيلي شفت امة لااله الله متجهه لي وخرتهم عني حاولت افتح باب عيالي ولا رضى ذا الثاني يفتح
حاولت وحاولت وانفتح امازلت انتظر صوت من عيالي ماقدرت افتش وجهي عشان الرجال اشوفهم وعيالي ساكتين لا صوت ولا حركه جلست ابكي وجليني ماتشيلني من الخوف والاوجاع واذ بالامل الاخر ولدي الي ماكمل الثمان اشهر يصيح واخذه والمه وابكي انه حي ونادي ولدي الكبير ويرد علي واولدي الثاني وبنتي ردو علي كني مت ورجعت اروح مره ثانيه ناس ا واجد الي اسعفني انا وعيالي والي نزل رجلي من السياره والي اسعفو الرجال الثاني والحمد لله انقلونا بسيراتهم للمستفى وتلقينا العلاج الازم

ومازالت الجروح والالم والخوف ودموع تنهال علي من كل جهه حتى عالي يقولون كرهنا ذاك الشارع


زبدة الموضوع تدرون وش السبب او من هو المتسبب بالحادث لاتقلون صاحب الصالون او الجمس لا والله لا

صاحب الجمس ماشي في طريقه شاب عاقل ماوراه خربطه ولا شي يقول هو على السانه بعد التحقيق يقول انا امشي في طريقي الاشباب وراي يكبسون يقولون وخر عن الطريق نبي نمشي بالله ذولا وين عايشين فيه هو شارعهم ولا شارع ابوهم يقول انا مااقدر اصلا الدايري زحمه وبعدين هم اذا بغو يصقطون علي يروحو يسار ولا يمون ويكملون بس ذولا في راسهم شياطين الانس والجن ويقول ويحطوني في راسهم وراي وراي الين صارو بجنب الدريشه وااكبر حديده وارقعوها بوجهي والقزازه مسكره الشاب المسكين يقول اطلعت السياره عن صيطرتي
وصار الي صار



بالله عليكم وش تسمون التصرف هذا هل هو هبال سكرانين مخ مافيه


لكن اقولها وان شاء الله يارب ياصلهم صوتي


حسبي الله عليكم دنيا واخره حسبي الله عليكم دنيا واخره حسبي الله عليكم دنيا واخره
الله ياخذ حقي وحقي رجلي وعيالي وذا الشاب المسكين
يالله يارب مالي الا انت اللهم اني مظلوم فانتصر يالله يارب انك تعلم انهم بغو يموتنونا ويرملوني ولا يتمون اولادي ولا يقتلوننا كلنا بدون ذنب انك تاخذ حقنا منهم

معليش على الاطاله وترا كتبتها بختصار عشان مااطول عليكم


والحمد لله كما ينبغي لجلال وجهك وعظيم صلطانك اللهم قدرنا على شكرك وحسن عبادتك وعفو عنا وغفر لنا انا كونا من الظالمين