حبيباتي الحوامل واللي بالتاسع تعالو انصحكم

السلام عليكم
كيفكم حبايبي
انا والدة جبت بنوته وخلصت الاربعين امس
والله حاسه فيكم بذات البكريات
وحابه انصحكم
حبايبي طول التاسع خليكم علي مويه زمزم والاستغفار وربي عجيب
واشترو ورد الولادة بثلاث ريال من المكتبه اقرو علي مويه زمزم واشربو منه وامسحو بطنكم
والدعاء يابنات ادعو دايما نهايه الليل
واقرو يوميا سورة مريم ويس وسورة البقرة كل يوم ثلاث صفحات
ولا تروحو المستشفي الا باربع حالات نزل دم او مويه او طلق قوي زي الدورة بس اقوى بالظهر والبطن والفخود ووري بعض الالم او اذا قلت حركة النونو
اهم شي وقت الطلقه ماتصرخو
والله اذا صرختو يزيد الالم تدرو ليش؟
لان عضلات الرحم وقت الطلقه تتقلص ويقل فيها الاكسجين
وكل ماصرختي زاد التقلص وزاد الالم
ايش تسوو طيب شدي عالمخدة او حدايد السرير وتنفسي من فمك شهيق وزفير
واذا راحت الطلقه استغفري وادعي لاتنسي الدعاء مستجاب
انا كنت خايفه ونسيت مادعيت بس كنت استغفر
واذا فتح رحمك عشرة كيف تدفعي ؟
استني الدكتورة تقول دفي لاتدفعي من نفسك لاتجيك بواسير
تاخدي نفس عميق وتقفلي فمك وتدفي علي تحت زي الامساك بالضبط
ولاتنسي ان الولادة تكفير ذنوب والله كل الالم يروح اذا شفتي النونو
والمشي من بدايه التاسع كل يوم ساعه عشان تتمرن عضلات الحوض و تنزل الراس
والجماع يوميا لان المني في ماده يحطوها بالطلق الصناعي
واذا حسيتي باي علامه من علامات الولادة الي ذكرتها فوق ايش حتسوي؟
تتروشي بمويه حارة وتجلسي قرفصاء وتشربي الزمزم واذكري الله بدون بكاء وصراخ وعالمستشفي
ةلاتخافو من قياس عنق الرحم
ترا مايعور مرة زي مايبالغو البنات
انا جننت الدكتورة بكاء خايفه من القياس
والله مايستاهل اهل شي تاخدي نفس وحتحسي بس بنغزة خفيفه وخلاص الحمد لله
اللي عندها سؤال تسألني وانا حاضرة
طبعا وقت الولادة ماشربت اعشاب وخرابيط بس شربت كاسه حلبه قبل مااروح
اهم شي زي ماقلنا
مشي+جماع+زمزم +استغفار+تكوني قويه وماتخافي كل الحريم خلفو سبعه وتمنيه وعشرة=ولادة ميسرة بإذن الله
والله كنت ابكي طول التاسع خايفه من الولادة والطلق بس الحمد لله ربي سهلها لاني مشيت عالاشياء اللي فوق وكان ظني انو مهما تعبت حيكون تكفير ذنوب واخرها اشوف طفلي وانبسط
اهم شي يكون املك في الله قوي
اذا حطيتي ببالك ان الولادة صعبه حتصعب عليكي
بس لاتنسي الحديث القدسي انا عند ظن عبدي بي
واذا كان ضنك ان الولادة باذن الله حتتسهل الم كم ساعه واشوف النونة حقي وانبسط بإذن الله ربي مايخيب ظنك وتتسهل عليكي

الله يسهل لكم وتقومو بالسلامه انتو واطفالكم يارب حبايبي

ادعولي الله يحفظ بنوتي ويهديها ويسخرلي زوجي