كيف الحال ؟ وكيف العبادات في رمضان ؟ ان شاء الله نكون من عتقاء النار في هذا الشهر الكريم يارب واللي نفسها في شيء الله يعطيها هو واللي تبي وظيفه الله يرزقها واللي تبي زوج الله يرسللها واللي تبي ذريه ( مثلي ) الله يطعمها واللي تبي اي شيء في نفسها الله ييسر لنا وييسر لها .......
اليوم فكرت انزل لكم شي لذييييييييييييذ ويبرد على القلب في الحر دا
صحيح هي اكلة مصريه بس خطيرة وكلنا المفروض نعملها
يلا نبدا
اول شيء تغلي 2 كاسه رز مصري في 5 كاسات ماء بس ترى هالكميه كبيرة تكفيك انتي واهلك والجيران ممكن تخفضي الكميه الى الربع اي نص كاسه رز في 2 كاسه ماء تغليهم على النار
بعد مايستوي الرز نص استوا نصفيه ونحتفظ بماءه
هذا الرز بعد ما صفيناه
ونروح للماء لو انتي عملتي مقدار 2 كاسه رز حنعمل 6 كاسات ماء يعني تضيفي لماء الرز اللي عندك تقريبا 5 كاسات ماء و 10 ملاعق كبيرة حليب بودرة وكاسه ووثلاثه ارباع سكر وفانيليا او هيل او ماء ورد او ماء كادي على حسب النكهه اللي تفضلينها انتي واسرتك
نرفع الحليب في قدر اخر على النار الى ان تختلط المكونات ويسخن
ثم نضيف الرز ونحل 2 م كبيرة نشا في نص كاسه ماء ونضيفها على الخليط
نحرك المزيج مع بعض بمضرب البيض
ونتركه على النار حتي يغلي ونستمر في التحريك حتى لا يحرق الرز
واخيرا نصبه في زبادي صغيرة وممكن تزينييه باللوز او الزبيب او جوز الهند زي ماتفضليه
نخليه شويه خارج الثلاجه وبعدين نضعه في الثلاجه لمده ساعه تقريبا واستمتعي بعدها انتي واهلك وجيران باحلى رز بلبن يبرد على قلوبكم
وبالهناء والعافيه
لاتنسونا من دعواتكم الطيبه