حرق لي قلبي... يحق لي ادعي عليه؟؟

السلام عليكم ورحمة الله وبركاته

بدون مقدمات بحكي لكم سالفتي

قبل حوالي سنتين تقدم واحد لي ورفضته...حتى اهلي مايبونه مو عيب فيه لكن لانه متزوج
المهم طول هالفتره وهو يحاول ويرسل لي ناس ويقول انا عندي ظروف خاصه تخليني اتزوج ومستعد اني انا اكلم البنت واقنعها .......طبعا انا كنت مستغربه الاصرار مع انه يقدر يخطب احسن البنات ويوافقون عليه بس مدري ليه كان مصر علي!!يمكن كل ممنوع مرغوب
بعد محاولات انه يكلمني بحجة انه بيعلمني بظروفه ويقنعني ......وافقت اني اكلمه<<<<وهنا الخطأ انا عارفه
لكن بحكم انه رجل معروف ومتزن يعني موشاب طايش وافقت انه يكلمني
كلمني وكان مره مبسوط وحسيت اني معجبته مره وكان يطمني انه ماراح يظلم زوجته وعياله
طبعا اهلي رافضينه وانا كنت اقول في نفسي مستحيل القى رجال شاريني مثله........حاولت اني اقنعه مايتزوج الا انه كان يقولي اذا انتي ماتبيني انا متزوج متزوج!!
انا ارتحت له وتعلقت فيه واي وحده في مكاني بتتعلق فيه لانه كان يعاملني معامله خيالية
وبعدها بدت الحرب مع اهلي عشانه تقريبا جلست شهرين وانا اقنع فيهم ورفضت شاب متقدم لي عشانه
انا كنت صريحه معه لابعد حد <<<<<<هذا الخطأ الثاني
كنت اعلمه بكلام اهلي كللللللللله ويمكن كنت اجرحه بدون ما احس عشان كذا توقعت انه كان يشيل بقلبه
بعد عنااااااااء مع اهلي وافقوا وجا يخطبني رسمي وزعل لانه كان يبي يشوفني بسرعه وطولنا عليه
قمت انا ارسلت له صوري طبعا بحكم انه خطيبي وواثقه فيه
بعد كم يوم جا شافني


تخيلوا وش سوى؟؟

طلع من عندي وكلمني قال معليش ما اقدر اكمل معك!!!!!!!!!
انتي وشلون وافقتي علي؟؟ اهلك صادقين يوم يرفضوني
انتي حلوه وانا ما احس اني اقدر عليك بتتعبيني...انتي يبي لك واحد لك لحالك وطول الوقت معك
وبعدين عيونك كلها غيره صعبه بتتحملين تعيشين معي!!
يابنات كأنه يحاول يقهرني يقولي انتي مره حلووووووووه انا بصراحه تفاجأت من شكلك ويتغزل فيني
ويقول بس ليش ماتزوجتي؟
وبدا يردد كلام اهلي اللي كنت اقوله له

بنات انا كنت اسمعه ومصدومه صوتي تغير ودموعي تنزل بدون ما احس فيها
قلت طيب انا تعلقت فيك
قال انتي تتابعين مسلسلات وافلام كثير اي حب واي خرابيط<<<<<<<هالكلمه مستحيل انساها

بعد هالكلام جلست بسريري كم يوم ماقدر اتحرك من قوة الصدمة علي....كنت اشوف امي تصيح عندي وتترجاني اقوم .....ودي اقوم بس ماكنت اقدر
واحس بنار بصدري .....المويه ماكنت اقدر ابلعها كنت بس اقوم اصلي وانا هزيييييله مره وحالتي حاله
حبيته من كلامه وتصرفاته معي....كان يتكلم معي بكل شي ويقولي كل شي ابيه بسرعه ودي الحين اتزوجك!!
كلاااااااااااااااامه ....يوه ياكلامه.. ماقدر انساه مستحيل فيه ناس عندها قدره على التمثيل والكذب مثله
ليه كذا يسوي لي؟؟
انا بالبدايه مارفضته لعيب فيه..بس لانه كان متزوج

بنات كلامه لي بعد ماشافني كأنه ينتقم مني...كان مابين كلمه وكلمه يضحك!!وحسيت بصوته انه مرتااااااح
مشكلتي اني اشوف الناس مثلي ومثل اهلي وماكنت اتوقع ان فيه ناس مثله

وارجوكم لاتقسون علي بالكلام وتقولون ليه كلمتيه؟انا كلمته بسبب انه كان يقول انا عندي ظروف خاصه وماارضى اقولها الا لها هي بس واكيد بتعذرني ليه انا ابتزوج
انا يابنات كنت خايفه ومتردده عشان كذا كلمته
طبعا هو ماقصر وعيشني باحلااااااااااام

احرق قلبي واحرق قلب اميمتي<<<<كل ماتذكر وجهها وهي تناظرني تخنقني العبره
حاولت ابرر تصرفه
ما ارتاح لي؟؟شلون وهو كلمني وكان طاير من الفرحه ويقولي انتي محبوبتي التي طال انتظارها!!
طيب ما عجبته؟؟الحمدلله ربي منعم علي وناس كثير اعجبهم بس ممكن اكون ماعجبته؟؟طيب شلون وهو شايف صوري قبل!!
كرهت ان احد يمدحني سواء بشكلي او بطبعي او...او....
تحطمت تحطمت
يلاحقني ويحاول يقنعني وبالنهايه كذا يسوي!!
احس انه يقول بنفسه ترفضيني؟؟انا اوريك


يارب المظلومين
ارحمني برحمتك
اللهم اني مغلوبة فانصرني

آآآآآآآآآآآه ياربي تعوضني
(وعسى ان تحبوا شي وهو شر لكم)
انا مؤمنه بقضاء الله وقدره وعارفه ان ماعليه حسافه لكن قلبيييييييي قلبييييي
نفسيتي تعبانه ومجروحه وحالتي حاله
ماعمري بحياتي توقعت انه بيجي يوم وابشيل على احد بقلبي وابقوم الليل اصلي واتحسب الله عليه

حسبي الله ونعم الوكيل