حرمه اعتبرها قويه ........ بس مجروحه ( الله يعيننا يالحريم)

هلا بنات وش اخباركم

بنات حبيت انقل لكم سالفة وحده من الحريم وحده من صديقاتي تعرفها شخصياً

السالفه ...
الحرمه هذي تعشق زوجها والكل يعرف بهذا الشيء يعني ماتخش حبها لزوجها عن احد تمدح فيه وعلى قولت صديقتي عيونها تلمع اذا سولفت عنه( تم نقل هذي الجمله حرفياً) المهم .. هو عارف هذا الشي متأكد منه... ابو الشباب صارت تطلع منه حركات غريبه مثل .. صار إذا دخل البيت يقفل جواله وإذا سالته قال ما بي احد يكلمني ( طبعا مع توفر خدمة موجود اكسترا مايحتاج يفقل جواله يحط تحويل واللي يدق عليه راح يطلع الجوال له مقفل )

المهم سكتت لانها تقول مستحيل يسويها ... بعدين صار ما يدخل جواله البيت قالت له ليش يافلان قال عادي ردت ما تبي تشحنه قال شحنته بالشغل ... هذي قويه شوي يعني واثق انها راح تصدقه

وفي يوم من الايام دخل الرجال و جواله طبعا مقفل .. وهو نايم خذته ودخلت الرقم السري

هنا وقفت البنت وقلت كيف عرفته ؟؟؟ ابي اعرف السالفه صح يمكن الحرمه تبالغ وتبي تسوي حدث... قالت ان زوجها دايم ارقامه السريه نفس اخر اربعة ارقام من تلفون بيت اهله وقد دخلته ولافاد وقد شافت زوجها يدخل 6 ارقام مو 4 فزادت صفرين واشتغل الجوال.. دورت فيه ولا لقت شي انبها ضميرها لانها شكت بزوجها... شكل زوجها انتبه وغير الرقم ولا قالها شي لانها تقول جت بعدين تدخل نفس الرقم طلع غلط
المهم بعدها بشهرين وزياده جاء لها ابو الشباب وقال انه بيسافر برى بس مع واحد من الشغل وتاكدت انه رجال وانه ملتزم بعد يعني زوجها مارح يلعب برى... راحت جهزت اغراض ونامت

انتبهو هنا .... قامت الحرمه فجأه وبين عيونها جوال زوجها وخذته وتحلف انها ماتذكر كيف شغلته ولا تذكر الرقم اللي دخلته ... الزبده لقت رساله تقول (( تروح وترجع بسلامه ياحبيب قلبي )) انهارت الحرمه وماتت صياح .. اسكتت شوي وغسلت وجهها وراحت قومته وسوت له فطور وهو يقول لها وش في عيونك حمر قالت توني قايمه وعيوني توجعني ((( هنا تقول حسيت الدنيا كلها فوق راسي بس ما ابي اضايقه وهو رايح يسافر وابي اتأكد قبل كل شي واعرف اتصرف بعقل مو بطيش )))
الله لا يحط احد بمكانها بس لو انا كان اجرمت فيه

راح ابو الشباب من هنا وهي تصب عيونها من هنا قام ولدها وشافها (عمره سنه ونص ) وقعد يقولها (( ماما ..ليه ؟؟ويمسح دموعها )) هنا بكت صديقتي لانها تعرف شكل الولد وتخيلته يمسح دموع امه .. والله توجع القلب
المهم جاء الليل وراحت ادخلت موقع الاتصالات وطلعت فاتورة ابو الشباب و اطبعتها ( ملاحظه قبل ما تطلع لكم الفاتوره راح ترسل رساله لرقم الفاتوره تكتب انه تم تصفح الفاتوره على الموقع ) بس هي قالت ما همني وابي اجمع عليه ادله.... المهم اطبعت الفاتوره والرقم اللي ارسل الرساله حطت عليه خط واطلعت الدقايق بالهبل وهو ما يكلمها حتى دقيقه

اليوم الثاني ما قدرت تصبر .. كلمها ابوالشباب وكلمته باستهتار واضح وكان الحب راح يوم جت تصك قالت بسألك بس هـــي تستاهل انك تخسرني انا و ولدك عشانها .... هنا قام زوجها يبكي ( دموع التماسيح ) وقعد يحلف لها أن البنت هي اللي باليته الزبده قالت له كلام تحلف انها لو شايفته ماراح تقوله له لانها تحبه .. والرجال قاعد يصيح ويبكي

صكت ولا ارتاحت كلمت البنت ( هنا ارتفع ضغطي ) تحلف انها ما سبتها وقعدت تقول لها ياحبيبتي وياعيوني .. المهم الحرمه قالت للبنت انا راح اقدم شكوه للاتصالات لان الرقم هذا مزعجني وكل المكالمات راح تنسمع وحقي راح اجيبه وابشرك كل الرقام اللي دق عليها هذا الرقم راح اجيبها وارسل رساله ان صاحبة الجوال صايعه ومكلمه زوجي ومن هذا القبل >>>> البنت هنا لسا منكره وميته خوف وصوتها يرجف لو منها جميع انواع السب اللي اعرفها واللي ما اعرفها كان قلتها للبنت

أكيد زهقتوا .... جاء زوج الحرمه (( طول السالفه و الحرمه عاجبتني و ماشاء الله عليها قويه ))بس هنا
تخيلوا وش سوت قعد يعتذر ويبكي راحت ضمته وتقول خلاص حصل خير بس لاتعيدها وجابت القران وخلته يحلف انها طالق بالثلاث إذا كلم اي وحده ثانيه

انا هنا يمكن اذبحه ... ولا يمكن عند اهلي من زمان .... بس هي سوت كذا عشانها تحبه ( حبه برص وكسر الضرس )

المهم وخلاصة السالفه ..
الحرمه إذا شكت بزوجها فاكيد فيه شيء ( هذي قايلتها اوبرا .. وصراحه المعلومه احسها صح )

الحرمه إذا بغت شي وصممت عليه جابته ( مثل الفاتوره ماشاء الله عليها جابتها )

الحرمه إذا حبت فانها تحب من كل قلبها آه آه آه آه وتسامح إذا اخطأ من تحب( الله يعيننا على هذي )

بنات ادعوا للحرمه ان الله يسخر لها زوجها ... ويكفيهم شر بنات وعيال الحرام

و عذراً على الاطاله >>>>>>> هي بس اطاله إلا مجلد كاتبه حضرتي:42: :42: :42:

استنى تعليقاتكم (( واهم شي دعاءكم للحرمه ))