حكايتي كتبتها للعبرة العنود دشي وقري

مساء الخير

يمكن تخقني العبرة وانا اكتب قصتي وكنت ما ابي اقولها بس قلت خلني اكتبها للفايدة عشان الكل ياخذ حذره ويدعى لي الله ينسيني ويعوضني خير ويعطيني على قد نيتي


قصتي بدأت من خمس سنين كنت مشتركة في جمعية عندنا كانت علاقتنا بالشباب اللى معانا عادية يعني مكان مختلط وهالشي عادي بالنسبة للمجتمعنا.

تعرفت عليه كان اكبر مني بسنة وحدة علاقتنا كانت جدا عادية بحكم الزملة في الجمعية كان عمري 21 حزتها وكان اهو يدرس بره كان يي الجمعية في الصيف بس وفي عطلة نص السنة الدراسية

المهم تحسنت علاقتي فيه في فترة من الفترات وكنت اكلمه واهو بره على المسنجر كانت المسائلة عادية كلش وما كان في بالي لا حب ولا خرابيط

في فترة من الفترات تتطوت علاقتي معاه وتطورت بالتليفون وكانت للحين ما وصلت لمرحلة الحب كان يسال عني واسال عنه وصلنا لليوم قال انه يحبني حزتها قلت له انا ما ابي اغشك انا ما ادري محد في حياتي وبالي مركزته في درستي وبس المهم مع الوقت حبيته حبيت اسلوبه ومن خلال عشرتي معاه انسان مؤدب خلوق المهم ياه الوقت اللى يوم اللى قلت له انا بعد احبك بحكم انه للحين يدرس وقفت يمه شرط كان في ديره او في ديرة ثانية او بمعني اخر قارة ثانية حطيته على بالي غيرت اسلوب حياتي كله عشانه صج اهو مو وياي وما يدري شنو اسوي بس انا من النوع اللى احترم نفسي وما احب اجذب عليه بشي لاني خلاص ربط روحي فيه من البداية كان واضح وياي انه غرضه الزواج وانا ما شكيت في نيته

كنت ادري عنه اكثر ما بيتهم يدرون عنه اخته كانت تاخذ اخباره من عندي ونفس الشي كنت اوصل له اخبار بيتهم نسيت اقول ان اخته كانت معانا مشتركة بعد

مرت الشهور والحمدالله علاقتنا كانت تزيد خطواته كلها كان يقولها لي كنت ما اعرف انام الا لما اعرف انه وصل الشقة شرط انه بيني وبينهم فرق توقيت 3 ساعات يعني كنت ما ارقد شي

وصل السنة الاخيرة وصارت عليه 3 مواد رسب وقفت يمه وشجعته والحمدالله نجح في ثنتين ورسب في وحدة ورجع دولتنا شجعته قلت له ما عليه نصيب " طبعا خلال هالفترة كانوا ييوني معاريس وكلهم احسن منه وجاهزين كنت ساعات ما اقول له وساعات من القهر وبطت الجبد كنت اقول له كان يسوي روحه بيموت ومو قادر وروحه بتتطلع هذا غير الصراعات اللى مع الوالدة الله يحفظها ليش ما تبين تعرسين وليش وليش" خلال فترة علاقتي فيه كانت تصير بينا مشاكل وهذا شي طبيعي كان يرضيني وما يرضه على من اصيح احس روحه بتتطلع اكتشفت عقب انه كل شي تمثيل في تمثيل"

اكمل صارت عليه مادة ورجع قمت اقول له دور لك على شغل احسن لحد ما يي دور الاعادة وتروح وبعد الحنه حط على روحه اشوي وبواسطة حصل له شغله في مكان عدل قلت الحمدالله الله بيسر امورنا ويات حزت الاعادة وكان ما يبي يروح عليت جبدي وذبحت عمري وراح واخيييييييييييييرا نجح بعد طلعت روحي.

يومها عندي كان يوم عيد ما كنت مهتمه بدراستي كثر ما كنت مهتمه فيه كنت اقول في بالي النحاج هذا لي انا واهو كان يقول لي جذى بعد المهم انا بعد تخرجت واشتغلت سيدة عقبها واهو بعد حصل شهادته وترقى عليها وقلت يالله قرب حلمي وحلمه كان كل يوم الله يقدرني واسعدج وعوضج عن صبرج وياي كنت اساعده ساعات ومو ندمانه على هالشي لاني كنت ادري اني مو محتاجه واهو مو محتاج بس ما يبي يعتمد على ابوه في كل شي وانا شريكة حياته ليش ما اوقف يمه مو عيب

كانت تصير بينا مشاكل بسبب انه كله يبي يجوفني وانا ما ابي بسالفة او بدون سالفة اجوفه وقلت في بالي عشان يسعي ويي يتقدم بسرعة

المهم مر بظروف انه خذه سيارة يديدة اخر موضة على قولتهم وصادة حادث وتكنسلت وطبعا الحادث صار بره دولتنا وتامين الجسر مو شامل واهو الغلطان وراحت عليه قيمة السيارة قال لي حزتها انا ماخذ قرض عشان السيارة وجذى والحين ادفع على ولا شي ما بقدر اتزوج الحين روحي لحال سبيلج وجوفي نصيبج انتي تستاهلين كل خير قلت له لا انا الحين معاك 4 سنين اهدك الحين اصير عديمة اصل " ويا ريتني صرت عديمة اصل" ورجعنا تعدلت الاوضاع اشوي ابوه دفع له قيمة القرض اللى كان ماخذه وحزتها قلت له اذا تبي تاخذ قرض اخذه عشاني قال ان شاء الله طلع له سيارة صغيرة ويا زعم يمع حقنا وتميت يودني معاريس ويطنقر على الى اخره اخر مرة كان يبي يجوفني قلت له زين عقب اتصل اتصل مغلق جان عقب اتصل جان انا اطنقر جان يقول لي خلاص كل شي بينا انتهي وانتي اساسا ما تبيني تجوفين وانتي وانتي.......

صليت على النبي وقلت اهو يتهاوش ويرد يرجع وهذى مو اول مرة ولا اخر مرة نتهاوش كنا نتهاوش ونرجع سكت عنه جم يوم وعقب اتصلت فيه كان ما يرد

هالحجي كان شهر 2 هالسنة وعقبها بـ 3 اشهر

صادتني ظروف احتجت له وكان حاقرتني لحد ما وصلني خبر ملجته لا من وحدة خطبه امه تعبت طلعت روحي ليش سوه فيني جذى هذا يزاتي وقفتي معاه لو كنت وحدة زبالة احسن لي جان خليته يولي ورحت عرست من زمان ويبت عيال وعشت دنيتي عمري ما عرفت غيرة كان اول واحد في حياتي وعلى حد قوله اني اول وحدة حتى هذى قمت اشك فيها دامك مو جاد خلاص جان قلت لي على اقل جان قلت لي انك بتتزوج انا بخليك من نفسي انا نفسي ما برضها على روحي الحمدالله طول هالسنين كنت محافظة على روحي ندمت تحسفت يا ريته خذه له وحدة احسن مني في شي الا عادية انا احلى منها بمليون مرة ادري مو على الشكل بس خذها على اساس شنو واهو ما يعرفها حتى داخلها شنو ما لحق يعرفه ظلمني كسر ظهري الله ياخذ حقي منه

عشت ايام سودة اسبوعين وانا اصبح ضعفت 10 كليو كنت ما اكل ولما اشرب الماي ارجعه الحمدالله اشوي اشوي وبمساعدة خواتي الله يخليهم لي بديت ارجع مثل قبل الحين بيمر شهر على ملجته لا اهله اللى متكفلين بكل شي وانا كانت يقول لي انا ابي اعتمد على نفسي وانا وانا وانا الله ياخذ حقي منه

يومها طرشت له قلت له ليش سويت فيني جذى انا استاهل منك كل هذا كان رده انا قلت لج مو ماخذج حق لعبة ليش تعانديني الحين في احد يحب 5 سنين يبيع في 3 شهور كل سنة نسها في اسبوع ونص

الحين انا عمري 26 ادعو لي الله ينسيني ويعوضني ويعطيني على قد نيتي ويرزقني الزوج الصالح اللى يعوضني خير حسبي الله ونعم الوكيل فيه خلني اعاف الدنيا وما فيها

طولت عليكم بالحجي ادري

:)