السلام عليكن ورحمة الله وبركاته أخواتي
اليوم جايبة لكم طريقة حلا راقي وشكله كأنه جاهز ولما اخذته معاي كانوا يظنون انه جاهز وطريقته سهله وممتعه
وانا ماخذه طريقته من منتدى ثاني وطبقته وصورته لكم
واعذروني عالصور اذا كانت مب واضحة لاني صورته بالسياره
نسيت اصوره فالبيت وتذكرت وقلت لاااااازم اصوره
وطبعا انا سميته حلا الخشب لان كأنه خشب
هذي صورته بعد ما صفيته بالصينية وغلفته ..
يلا الطريقة ::
شايفين اللي كأنه سويسرول هذا اللي بكتب طريقته الحين
المقادير:
باكتين بسكوت مطحون
اصبع زبدة
حليب نستله
تعجنينهم مع بعض لين ما تصير لينه وتقدرين تفردينها
تجيبين قصدير وتفردينه وتدهنينه بشوية زيت وتفردين عليه البسكوت بالرول وتقصين الاطراف بحيث تكون متساويه يعني تصيرالعجينه كأنها مربع او مستطيل
وبعدها تجيبين كاكاو نوتيلا وتذوبينه بحمام مائي وتدهنين عجينة البسكوت المفرودة فيه وتدخلينها الثلاجه بس شوي عشان يبرد الكاكاو وتلفين البسكوت رول لما تخلصين من لف البسكوت تلفين عليه القصدير وتدخلينه الفريزر لما يجمد قصيها قطع متساويه
وبس ...
للأمانه : انا ما استخدمت كاكاو نوتيلا لان ماكان عندي وحطيت هذا
ماي ونشا وكاكاو بودرة وشوي زبدة وسكر وانا حطيتهم من غير مقادير جذي فوق يعض
