خليجي و خليجيه .. بس مش عاجبهم

السلام عليكم
انا اخت لكم ترددت كثير قبل لا اكتب .. داخله على الله ثم عليكم .. لا تردون اطلبي و تنصحوني بالي تجود به انفوسكم
ما دري انا اصلا طايحه بمشكله و الا هو شيطان يوسوس فوق راسي
السالفه و مافيها اني تزوجت قبل ثمان سنين .. زوجني ابوي بولد خويه .. ربيعه حتى قبل لا انولد انا و اكبر واحد من اخواني .. هم مهب من ديرتنا بس دوله شقيقه لنا .. هم عرب قبيليين مثل ما نحن قبيليين .. نحن ما نجوز من برع القبيله و هم المثل .. بس من كثر ما يعزون بعض صار النصيب .. كل الاهل عارضوا حتى امي .. و قالت بعدين يعايرون عيال بنتك ببوهم .. قال ابوي نحن مهب اخير منهم .. و المثل صار عند هل زوجي -قالي بعد العرس- .. و انا وافقت و ما تأثرت بامي او بحد خصه لما شفته .. الي تتمناه اي بنت فيه .. طول و عرض و جمال و اخلاق و مال .. عندهم خير و مال كثير .. و قبل كل شي الدين .. ما شاء الله عليه دين .. و خفت من ربي ارفضه و هو بكل ها النعمه
ثمان سنين عشته معه و عمره ما ازعلني و لا شفت منه الشين .. و لولا الخوف من الله كان قلت ملاك .. فديت قلبه .. كريم و ينحط على الجرح يطيب .. و مافي احسن منه ابو -عندي منه ولدين و بنت- .. شو اقولكم و الله لو اقعد اوصف فيه من اليوم يلين باكر عمري ما راح اوفيه حقه .. و هم حمياني مافي احسن منهم .. و هلي كنهم تقبلوه بس لابد من النغزات انه ماهو بمنا و لا نحن منهم .. كل ما احمل امي تدعي الي في بطني بنت .. تقول منهو بيجوزهم لما يكبرون -تقصد محد يبيهم من هلي- و البنت يمكن حد يتصدق و ياخذها .. اقولها جان ما بغيتوهم هلهم يبوهم .. وديات احاتي اقول معقوله حمياني يفكرون بنفس طريقة امي ؟
كل فترة زواجي ما تأثرت .. بس تقريبا من شهرين و انا عايشه بكابوس .. عايفه زوجي و احس اني ما ادانيه .. كل ما يقعد جنبي قمت عنه و صرت ما انام معاه .. قسما بالله ابكي ابكي بحرقه من الي اسويه .. غصبا عني .. الحين اقول ليش خذته .. حتى ابوي احس اني كرهته لانه هو السبب .. اشوف معاملة هلي غير لعيالي .. كل الي همني عيالي .. هم يحبونهم بس اشوف الفرق في المعامله عن عيال اخواني و دايم ينادوهم باسم قبيلتهم -كنه مالهم اسامي- و يقولون يا هل البلد الفلانيه .. يحسسون عيالي بالفرق و الله و الله ان عيالي اخير عن عيالهم في كل شي .. كل شي قسما بالله .. عجزت اسفه الناس .. ماشي فايده الا يفرقونهم عن العيال الباقين و ما اريد اقول شي العيال يحطون بخاطرهم او يحسون بشي
الحين لو خذت واحد من هلي ما كان افضل جان افتكيت من صدعتهم و من كلامهم و تنغيزاتهم الي ما تخلص .. اخاف عيالي يتأثرون بها التفرقه .. شا سوي
زوجي ماله ذنب بالي قاعده اسويهبه .. و لا حتى يدري بالي في بالي يسألني شفيج بس ما اقدر اعترفله اخافه هو الي يعافني و يهجرني و يقول ليش و انا اشبي
احس اني ضايعه و هب عارفه شا سوي .. اخاف الله ينتقم مني و انا عندي كل ها النعم وهب شاكرتنه و هب مقتنعه .. و احس اني مالي حق افكر في المستقبل و انغص على عمري و رجلي و عيالي و كل شي بيد الله حتى لو فكرت يلين ما اموت ما بيصير الا الي هو كاتبه
شا اسوي يا ناس .. عيالي و خايفه عليهم احاتيهم .. تهقون الناس بتعافهم لان ابوهم من ديره و امهم من ديره ثانيه ؟
يا ناس هل انا خبله و الا جاحده النعمه ؟ .. والله اني ضايعه .. كيف اشيل ها التفكير من بالي كيف .. كيف اصلح غلطي مع رجلي .. و عيالي شسوي بخصوصهم
و الله مني بعارفه شو قاعده اكتب .. انصحوني دخيلكم