_< دايما يقولون لي ياحظك بقلبك > دعوه لكل حاره ( تعلمي فن البرود )

لو كنتي راجعه من ( زواج ، منتزه ، ملاهي، جمعه عائليه ) وكنتي مبسوطه وقابلك زوجك بالصراخ والهواش

مو راح يضيق صدرك ،، وبتكرهين نفسك ،، وبتكرهين الطلعه اللي طلعتيها

طيب
لو أقول لكم أنو أنا صحيح اتضايق من الهواش واذا خلص اكون مازلت محتفظه بمشاعري الحلوه وبسعادتي يعني هواشه ماأثر عليها وانام مروقه بعد

او

لما تكونين في رحله عائليه وضاع او انسرق منك شي ثمين ( خاتم ذهب ، ساعه ، لاب توب ، جوال ..الخ )

مو بتتنكدين وتقولين ليتني ماطلعت

طيب انا لما يصير لي مثل هالموقف اروح ادور ع الشي الضايع بسرعه وافتش واسوي كل اللي اقدر عليه
واذا استنفذت جميع الوسائل اقول الله يخلف علي

وارجع اضحك واسولف عادي ومازلت محتفظه بسعادتي
ودايما ينتقدوني كثير في هالشي يقولون انتي ماتحسين ::angry2:



طبعا اتوقع ان الاغلبيه وهم يقرون ردات فعلي فيساتهم صايره كذا :o

ويقولون وش هالقلب الميت


بس انا بقول لكم شغله هالقلب الميت داخله يشتعل لكن أنا بإرادتي قدرت اغيره وقدرت اتحكم بمشاعري متى مابغيت أنبسط انبسطت ومتى مابغيت أزعل زعلت ومتى مامليت من هالحاله صحيت قلبي شوي وخليته يتفاعل مع العالم :22:ههههه:22:




وهالشي مو صعب لا ابد اي وحده تقدر تسويه



اول شي لازم يكون عندك ايمان بفعالية عقلك الباطن

واتوقع انو الاغلبيه تعرف انو فيه جزئين للعقل باطن وظاهر


والفرق بينها انو العقل الظاهر او الواعي

هو اللي يعي ويدرك اللي يصير

وتركيزه محدود

يتحكم ويبرمج العقل الباطن او اللا واعي

اما العقل اللا واعي
مخزن العواطف والمشاعر وينظم الذكريات

يصنع العادات ولتثبيت العاده يحتاج لتكرار من 6 الى 20 مره
يصير انشط كل ماآمنا فيه اكثر ووثقنا فيه
وهو اللي يتحكم بالطاقه الجسديه والنفسيه ويوجها

وهو اللي راح نشتغل عليه اليوم


بعد التوضيح للعقل الباطن راح نبدا بالشغل عليه
بس اول شي انتي لازم تكونين واثقهه وموقنه بالشي اللي نسويه لانو بغير الثقه ماراح تستفيدين شيي
لانك ماراح تشغلينه


طيب حبيباتي انتو اللحين واثقات انو لكل وحده عقل باطني وهي اللي بيدها تحركه وتصنع مشاعرها بنفسها

حلو
اللحين كل وحده تككرر انا سعيده أكثر من مره وهي مقتنعه بسعادتها

وقفه :

مهما كان زوجك يخونك ، يكذب عليك ، مقصر معك ، مهملك ، مطنشك ، بخيل .. الخ ) فهذا ماله شغل بسعادتك

صح انو زوجك جزء اساسي بحياتك بس هو مو كل حياتك

وماله حق انو يلغي سعادتك ويعيشك بتعاسه

لا انتي غلطانه لو تحسبين انو السعاده زوجك هو من يصنعها فيك لا ياحبيباتي

سعادتك بيدك أنتي وبس

ولو انتي حاطه ببالك هاليوم بتنبسطين مافيه قوه بالعالم بتقدر تخليك ماتنبسطين ليه ؟؟

لانك انتي اللي تصنعين السعاده لنفسك مو زوجك ،، مو اولادك ،، مو اهلك


انتي دامك تصلين وقايمه بحقوق ربك كامله خلاص معناته انتو اسستي صح لسعادتك ولازم تكملين هالأساس


أنا كنت بالشهور الاولى من زواجي لما يصير بيني انا وزوجي خلاف ونزعل كان يضيق صدري بشكل موطبيعي واتنكد

وهو كنت اشوفه مايهمه عايش حياته مبسوط وانا مقطعه نفسي صياح وحالتي حاله ومااسولف مع احد وحتى النت مالي خلق عليهه ولاالي خلق حتى اضحك

وكانت خلافاتنا كثيره في هالشهور وكنت اتعب من وضعي لااني كنت عند اهلي فرفوشه ووسيعه صدر وماتوعدت انو اعيش ضايق خلقي اسبوع ولا عشره لما يرضى المحروس :arb:

وانا كنت دايما مطلعه على العقل الباطن وعلم الطاقه وأبحرت في هالعلوم بس ماكنت اطبق ولاشي

ولااني مليت من هالوضع ففكرت بعقل وتركت مشاعري شوي على جنب

اللحين هو عايش حياته عادي وبعد ايام بيجي ويراضيكي او انا بجي اراضيه المهم انو بعد فتره بيطيح اللي بروسنا ونتراضى وبرتاح يعني ليه هالجو الكئيب ؟ هل هو بيغير شي بحياتي ؟ لا بالعكس انا كذا ضيعت وقتي بدون ادنى فائده

في هالللحظه اكتشفت اني كنت مغفله ( لاني اعطيت اساس سعادتي لزوجي وخليته يتحكم فيها متى ماصار طيب وحبوب انا اصير سعيده ومتى ماصار العكس صرت بائسه وحزينه

صرت كأني دميه يحركها متى يشاء

صحيت من هالوضع اللي انا عايشته وصحيت عقلي الباطن معاي

وقلت بنفسي أنا دايما راح احاول اكون مبسوطه وماراح اخلي زوجي او اي احد يتحكم في سعادتي

وكنت مقتنعه بداخلي انو انا لازم استغل اي وضع ظاهره سئ لشي ينفعني

مثلا زعلي مع زوجي أخذه اجازه ترويحيه كل واحد مننا راح يمارس هوايته بعيد عن الاخر ومنها بعد لاتراضينا نشتاق :heart:


طبعا البدايه مثل ماقلت لكم اكرر دايما أنا سعيده ومااحد يقدر يتحكم بسعادتي

يعني في كل يوم 6 مرات

لحد ماصار هالشي عندي قناعه

وبكذا تخلصت من هالقوقعه الحزينه اذا تزاعلنا
وصار لما نزعل اتفرغ لنفسي ولبشرتي غسولات وخرابيط

واجلس اقرا كتب

وافتح مواقع تفيدني

واوسع صدري

واذا كنت عند اهلي انبسط مع اخواني والعب معاهم واسولف مع امي وابوي واضحك وافرفش



والحمد للله هالشي حققته بدون عناء مجرد افكار حاولت تثبيتها ووفقت


طيب الشي الثاني هو اي ظرف مفاجئ يثير غضبك

مثلا ضاع جوال ،، ضاعت ساعه ... تكنسلت سفره ،، كنتي مخططه لطلعهه وجوكي اهل زوجك يقيمون عنك :mad:

..... الخ من هالشغلاتت

حبيباتي مثلا كنتي مخططه ومرتبه كل شي لسفره للنمسا مثلا ومجدوله كل شي

بس باقي ابو الشباب يحجز :time:

وجاك قال لك انا عندي شغل ،، او جت امه عندك وبتبات كل الاجازه او اي ظرف ماتقدرين تغيرينه

الاغلبيه لما يصير لها هالموقف تبوز ويضيق صدرها وتقابل خالتها بنفس شينه وزوجها كل ماشافته رمت عليه بكلمه تسم البدن

طيب هي ايش استفادت سافرت ؟؟ انبسطت ؟؟

لا
زعلت وزعلت زوجها
وعاشت اجازتها متضايقه ومقهوره

بس لو احنا نتعايش مع الوضع ونرجع نقول انا سعادتي بيدي سافرت ولاجلست بنبسط

واذا جت ام زوجك استغلي وجودها باسعادك واسعاد زوجك

اكرميها واطلعو تمشو سوا ودوها مطاعم شعبيه خليها تسولف عليك سوالف الاولين

وبكذا بتروح الاجازه وانتي مبسوطه


وكمان لما يضيع جوال او اي شي ثمين

أنا لما عملت بالاسباب ودورت وماحصلت وماعاد بيدي شي خلاص
ليش اجلس عشرين يوم اقول

ياخساره كان فيه كذا وكذا

ياحرام شاريته ب3000 وضاع

وتعيشين ايامك متنكده

ليش طيب ؟ مايسوى عليك

لاتنكدين على نفسك بسبب الضضياع وش بتستفيدين يعني لو عشتي بحزن ؟؟

لاضيقتي صدرك بتكسرين خاطره ويرجع ؟ لا طبعا

اجل خلاص ادعي ربك بالخلف

وانبسطي وعيشي حياتك



وهالشي في جميع امور حياتكم صغيرها وكبيرها ( انتم فكرو بعقولكم وبعدو عن مشاعركم

لما يصير اي شي يدعو للحزن
فكري اول
لو بضيق صدري وانكد ع عمري واصيح بيغير شي ؟ لا


اجل اتمنى من كل وحده قرت موضوعي تاسس سعادتها ، وتصير بارده لابعد حد وتنبسط لان النكد ماراح يجي من وراه الا المرض


والله يسعد الحوائيات
واشكر لكم قرائتكم