سلام حوائيات
من فترة ما نزلت موضوع بالمنتدى بسبب ظروف صحية وحتى مشاركاتي قلت عن السابق
واليوم قررت انزل هالموضوع وهو عبارة عن اعداد بعض الأصناف في البيت وكلها طبعا من الدجاج ، وراح اعرض لكم طريقة همبرجر الدجاج ونجت الدجاج ومرقة الدجاج >>> ما قلت لكم كلها من الدجاج
نبتدي على بركة الله
أولا همبرجر الدجاج
نحتاج إلى 1 كجم صدور دجاج خالية من الجلد والعظم - 2 حبة وسط بصل - بقدونس وكزبرة وسبنت حسب الرغبة - ثوم وزنجبيل - بابريكا - ملح - فلفل احمر حار حسب الرغبة - 6 ملاعق اكل طحين >>> نسيت اصوره وحطيت بداله البقسماط
نفرم الدجاج والبصل بمفرمة اللحم اما البقدونس والكزبرة والسبنت يفضل فرمه باليد او بفرامة البروان افضل لأنه صار معي عصير
نضيف باقي المقادير وطبعا اني استخدم خلطة الثوم اسويها بالبيت وإن شاء الله مرة ثانية اعرض طريقة اعدادها
هذي صورة خلطة الثوم واني حطيت ملعقة اكل وانتي على حسب رغبتك بالثوم تقللين او تكثرين
بعد ما اضفنا كل المقادير نبتدي نعجن واذا حسيتين ان العجين لين اضيفي طحين حتى تتماسك << معليش انواع الحوسة واني اعجن
بعد ما تخلصين عجن اتركيها في الفريز مدة ساعة حتى تتماسك وبعدين ابتدي بتقريصها
انا طلع معي 13 قرص لأني سويت حجم الجامبو وتقدرون تسوون حجم اصغر ، وبعد ما كملت حطيتهم بحافظة وفصلت بينهم بورق زبدة علشان لا يلصقون مع بعض
ثانيا: نجت الدجاج
ويا عيني عليه الكل يحبه الكبار قبل الصغار ، وتقدرون تسوون منه كميات وتفرزنونها لأوقات الزنقة وطريقته جدا سهلة
صدور دجاج مقطعة اصابع طولية - طحين - بيض - بقسماط - بهارات
نتبل الدجاج بالبهارات ونتركها تتخمر شوي بعيدن نجيب كيس ونحط فيه طحين ونحط عليه الدجاج ونربطه بحيث نترك مجال للهواء ونبتدي نخض فوق تحت يمين شمال حتى تتغلف كل قطع الدجاج والصورة توضح الطريقة >> هذي الطريقة اخذتها من منال العالم وتوفر عليك وقت بدل ما تغلفين قطعة قطعة
بعدين نحطه بمشخال علشان نتخلص من باقي الطحين، وشوفوا ان كل قطعة تغلفت بالطحين من قلب بعد المعركة
نغمسه في البيض وبعدين البقسماط ونفس الطريقة اللي سويناها بالطحين نسويها في البغسماط وبعدين نغلف كل وجبة بكيس نايلون
يتبع بدون رد
كثر ما سمعت عن اضرار الماجي قررت مقاطعته وقلت ليش ما اسوي لي في البيت وطريقته
راح نحتاج عظم دجاج - بصل - ثوم - بقدونس - كزبرة - بهارات صحيحة - ورق غار - زنجبيل - فلفل حار - أي اعشاب ترغبين باضافتها مثل الزعتر
حطيت كل المقادير في قدرالضغط مع ماء وتركتهم على النار لمدة ربع ساعة
بعد الربع ساعة فكيت الضغط وعزلت العظم عن المرق
وصفيت المرق من البواقي باستخدام مصفاة ضعيفة مع الهرس بملعقة
بعد ما صفيته علبته في علب بلاستيك صغيرة وكل علبة تساوي مكعب واحد وحطيتهم بالفريزر
العظم طلع فيه لحم فحاولت اني انظفه وطلع لي مقدار من الدجاج عبيته بكيس وفرزتنه للسمبوسة او الشوربة
باقي الدجاج قطعته مكعبات وغلفته باكياس وراح استخدمه للمعكرونات او الرز
وهذي صورة جماعية لهم وهم في الفريزر
أتمنى موضوعي يعجبكم