دعوة للتقارب بين .....

السلام عليكم يا بنات كيفكم ان شالله مناح الله يحميكم
دايما بنسمع عن التقارب بين الاديان بدهم يقربوا بيننا وبين المسيحيين والشيعة و كل التناقضات بس ولامرة حاولنا نقرب بين بعض العرب
معظمنا ما بعرف اشي عن بعض المناطق حتى بنفس البلد ما بعرفوا اشي عن بعض شو رايكم نحن كل واحدة تحكي عن المنطقة اللي هي اصلها والمنطقة اللي عايشة فيها و منطقة زوجها ازا زوجها من منطقة تانية والهدف انه نتعرف على بعض اكتر ونعرف عادات بعض مع اني بشوف انه معظم العرب عاداتهم فيها شبه خلينا نخلي اللي اخدوا نظرة سلبية عن حدا تتغير هالنظرة
ورح ابدا بحالي انا مخلوطة ماما الله يخليها اتراك اجوا على سوريا ايام الدولة العثمانية وعاشوا فيها لحد ما تزوج جد الماما اجا على فلسطين عشان يشتغل كان زمان ما فيه حدود وجوازات سفر وعش فيها وجاب جدي الله يحفظه وبعدين صارت حرب 48 واجوا على الاردن وعاشوا فيها وبابا من منطقة بفلسطين اسمها نابلس وهلا قرات عالمنتدى انه معناها جبل النار كنت افكره اسم تاني طبعا ما بعرف كتير عن بلدي الاصلي لانه ولا مرة شفتها ورحت عليها بس اكتر شي مشهور عنا طبعا الكنافة النابلسية والجبنة البيضا النابلسية لهجتنا حلوة بس بضحك شوي انا ما بعرف احكي فيها بس الناس بحكولي ببين عليكي انك نابلسية ما بعرف ليش ولباسنا اكيد التوب الفلسطيني بتعرفوه منطقتنا جبلين واحد منهم اسمه عيبال احنا من هالجبل وبس ما بعرف اكتر
انا مولودة في الاردن وعايشة طول عمري فيها وبحبها كمان اكتر شي مشهور في الاردن المنسف والعادات والتقاليد بتشبه تقاليد العرب المحافظين وكمان كريمين كتير كتير شمال الاردن مناطق زراعية اكتر الجنوب لا بشبه طبيعة السعودية وفي تداخل بالعشاير كمان انا زوجي من الكرك بالاردن اصولهم من السعودية وهي كمان منطقة جبلية بيجوها السواح يوفقوا عالجبل يتفرجوا عالمنظر حلو كتير في جبلين وبينهم سد يعني زي بحيرة منظر كتير حلو هلا انا عايشة باليمن من 4 اشهر اطيب ناس شفتهم بحياتي وبلد طبيعتها وجوها ماشالله بجنن الله يحميهم وازكى اكلة حبيتها كتير هي اسمها السلتة بس ما بعرف كيف بتنعمل وزوجي بضل يتغزل باكلة تانية اسمها بنت الصحن كمان شوي زوجي رح يغنيلها من كتر ما بحبها ان شالله ما اكون زهقتكم بس بتمنى تعرفونا على شغلات حلوة عنكم وعن بلادكم واكلات زاكية ولباسكم وهيك والله يحميكم جميعا