دمي الحار و طليقه زوجي و بناتها/ استوفى الرد

بسم الله الرحمن الرحيم وبه نستعين


أول مرة في حياتي أحس إن فيه شي مضايقني و مالي حيلة :angry2:

زوجي عنده بنات ما شفتهم الى الآن لأن أمهم ما تبيهم يطلعون معه مو هنا المشكله

المشكله إن زوجي على وجهه و طيب بزياده وحساس أنا لما خواته قالوا لي ما صدقتتهم

قلت أكيد يمدحون أخوهم بس لما عاشرته تبين لي ان كلامهم صح

أنا علمتكم عن طبيعته عشان تعرفون وش اللي مضايقني هو يحب بناته بجنون

و أمهم مو بس مكرهتهم فيه و تخوفهم منه ومخليتهم يطولون لسانهم عليه

وحتى لما كانت معه كانت تتفشل منه اذا طلعوا مكان وما تخليه يمشي معهم و تقعد في أي مكان

بعيد كنها ما تعرفه وبعد الطلاق هم لهم نفقه و بعد يطلبون أشياء منه انا ما همني انهم يطلبون

همني أسلوب الطلب يطلبون بوقاحه وكأنه أمر وصلني من حمولتي انها ما تدخله البيت أصلا

تخليه برا يجيب الأغراض و يروح وطبعا هو ما قال لي

وطفح الكيل معي أمس كنت في دورة المياه وهو يكلم بنته و حاط السبيكر المهم كنت أسمع

النبرة وقحه و يوم طلعت الا اسمعها تقول تجيب اللي قلت لك اليوم اليوم مو بكره

قمت سألت زوجي من هذي قال هذي الصغيره قلت الحين هذي الصغيره و سمعت صوتي

وقفلت الخط .. وهاوشت زوجي قلت له لا عاد تحط سبيكر انا ما اتحمل قله الادب

وطول أمس وهو متضايق مشتاق لهم و مستعد يتحمل حتى صراخهم عليه بس وده

يطلعون معه و يقعد معهم زي أي أبو حاولت أونسه ما فاد طول الوقت يقول أخاف

ينسوني أخاف ما يحبوني ومن هالكلام فهمته وقلت العيال مهما كان يفضلون الأم ويسمعون

كلامها أكثر وقلت إن شاء الله عوض اللي تبيه في عيالي و من هالحكي بس ما خفف عنه شي

أنا احترت مدري وش حيلتي مابي زوجي يضيق صدره ولا أقدر أحل الموضوع

بتقولون تفاهمي مع طليقته أقول لكم مقدر اذا خواته و اخوانه شالوا يدهم لأنها و العياذ بالله

سليطه لسان وما يهمها شي و أنا مقدر على هالناس


ما أقول لكم عطوني حل بس ودي أقول لكل وحده تطلق لا تسوي كذا لا تربي عيالها

على الحقد وشفت كذا نموذج يونس العيال يحبون أمهم و أبوهم رغم الانفصال

الله يردهم الى ابوهم ردا جميلا