ردت فعلي تجاهه اتعبتني كثير

ردت فعلي تجاهه اتعبتني
ابوي قبل اسبوعين كانت ملكته وبلغ امي بنفس يوم الملكة وانا و اختي وصلنا خبر ملكته بعدها بيوم بصراحةما انصدمت كثير بس بكينا كثيرررر انا واختي لانه تملك وانتهى فكان الصدمة بسيطة
الان الصدمة الكبرى زواجه بعد اسبوعين والله ناكل في انفسنا اكل انا واختي وامي
وقوع العذاب ولا انتظاره <<< هذا هو بالضبط
ليت زواجه يجي فجاءة ويخبرنا بعدها بيوم او ايام انه تم الزواج
نفسيتي انا واختي تعبت اللقمة ما اتهنى فيها ريقي مو قادرة ابلعه متخيلين !!!
زوجي شاف كثرة سرحاني يسولف معاي ومو فاهمة ايش يقول
ضربات قلبي زايدة زايدة
نزل وزني كثير مافيه اي لذه للاكل او التمشيات انام وانا بليت مخدتي دموع
اختي ما اقدر اكلمها واشكي لها اللي حاصل لي لانها ببيتها وانا ببيتي مابغى يتكدر خاطرها امام زوجها
ما اخفيكم :: ابوي ماقصر مع امي يوم الملكة
طلب منها تحضر الملكة وما كنا ندري انها راحت للمشغل والسوق مع ابوي عشان تحضر ملكة ابوي !! كان منعناها خوفا على نفسيتها لكن مادرينا .
ابوي خذاها لافضل مشغل وداها لافضل مجمع تاخذ لها فستان فخم يليق بجمالها خذاها سوق الذهب اختارت افضل ذهب عروس لها وطلب منها ابوي تختار طقم صغير جدا لخطيبته امي اختارت وقالها احضري وقابليها واعطيها بيدها وقولي منك انتي
طبعا امي خذت ذهب خطيبته وضمته لذهبها ومن حقها .. ولا تبرد قلبها. ومهما قدم لها مايبرد قلبها شي لان بجد دخلت زوجة ثانية بالحياة شي مؤلم ولا يجبر بشي .
طبعا حضرت امي الملكة رافعه راسها وقبل العشا قامت تسلم على ام خطيبة ابوي وقالت لها عرفتيني ؟ قالت الام لا ! امي قالت انا ام فلان زوجة فلان والله فزت قدام امي ماتوقعت امي بعالشكل وهالثقة وبهالجمال قالت الام طيب اذخلي عند فلانه قالت امي ما جيت اسلم عليها ولا جيت اتعشى مع السلامة وخرجت طبعا اكثر شي برد قلب امي ان الحضور جدا محدود وكل اللي يعرفون امي منهم من نفس جماعة خطيبة ابوي فصارت اخبار هالعيلة دايما توصلنا من صديقات امي انو تفاجوا من حضور و جمال امي وظنو انها عجوز وقالو ان ابوي خذى شقة لها قريب من اهلها جالس يرمم فيها طبعا احنا عرفنا انها شقة جدي ابو ابوي اللي كانت ذكريات الطفولة السيئة لنا ولامي فيها وهذا اللي برد قلبها حبيبتي .
نرجع لنفسيتنا انا واختي <<< كيف نفسية امي وهذي نفسيتنا دمااااار والله كل ما اتذكر امي ابككككي قهر وحسرة
حتى اخواني الصغار جاهم الخبر صدمة وماكنا ندري ليش ذاك اليوم جينا نصحيهم لصلاة الجمعة وصرخو علينا مو عادتهم ابد يرفعو اصواتهم ..
قديما ابوي كان مقصر مع امي طبعا قريب تغير مالها شهرين ،
كان لا مصروف يعطيها ويتمنن عليها بالبيت الملك اللي من واجبه يقدمه لنا ولها للسكن
امي نحفت كثيرررررررررر يبنات وجهها مافيه اي ابتسامه او بشاشة
على فكرة امي عمرها نفس عمر ابوي بالضبطططططط
امي جاها الضغط في وقت مبكر من عمرها بسبب مسؤوليات تحملتها ماقدر ابوي يتحملها
راتب ابوي عالي جدا 30 ووقت المناسبات والاعياد يجيه نفسه يعني 60 .. عمل ابوي كان قريب جدا من بيتنا مسافة5 دقايق
قبل 5 سنوات قرر ينقل عمله نفسه الى مكان نائي يجيه مبلغ اضعاف منه .. ترك امي واخواني الذكور تحملت مسؤلية تدريسهم وتاخرهم عن البيت و تربيتهم ودائما مشاكل امي مع ابوي بهالموضوع انت الرجال قوم ربي عيالك الذكور خلاص بعد البلوغ ما اقدر عليهم لقيت عندهم مرة شمة ومرة دخان ومرة مقاطع سيئة وننتظر فضيحة تسود الوجه والسبب انت عجبتك ملذات الدنيا .. يرد عليها يقول النار خلقت لامثالهم !!!!! يعني انسي اربي وش عندك انتي غير تربيتهم !!!!
المهم ابوي عنده سيارة عائلية حقتنا وقبل الملكة باسبوع شرى سيارة صغيرة فززز قلبي من شفتها وعرفت دخلت هالسيارة ابد مو خير لنا قلت لابوي الله يعطينا خيرها ومشيت ..
نرجع لليوم اللي بعد الملكة
حصل اجتماع عائلي لنا اخواني واختي وامي في مخيم وانضم مؤخرا ابوي ..
دخل وقلبي فزززز مو قادرة اسلم عليه ولا ابغى اناقشه بالموضوع اخاف اغلط بالكلام مهما كان له احترامه .
سلمت ومشيت خارج المخيم جاء وقت العشا تجمعوا ورفضت اتعشى معهم
ينادي وينادي ابوي وانا ارفض الاكل تماما
جاء عندي وبيده لقمة رفضتها تماما وبكيييييييت تخيلت هاللقمة لخطيبته
بحياته كلها ماقد قدم لي او لاخواني بهالطريقة ولا حتى لامي دايما يرفع صوته على امي دايما بوجوده دموع امي ماتجف بسبب مشاكله
فصارت حياتي مقارنات كل ما سوى شي قلت بيسوي لذيك
تعببببت صار كلامه لنا كلام دلع وينادي بنات اهتي بالعروسة اكرررره هالكلمة اللي ماقد سمعته منه الا بعد ملكته
طبعا رجعت لبيتي وعند زوجي وباقي الهم بوجهي طلعنا نغير جو ووقتي كله دموع مو متخيلة بتشاركنا بحياتنا وحدة غير امي
المهم لقيت بالصدفة واحنا ماشيين نفسسسس سيارة ابوي واببكككي وارتجف مكاني ومو قادرة اتنفس ونبضات القلب تزيييد ف خفت من ردت فعلي هل لو فعلا ابوي قابلني بيوم بيصير ردت فعلي كذا او ب اتحسن ؟؟ هذا وانا ما شفت الا سيارة نفس سيارة ابوي الجديدة واللوحة نفس اسمه ...
عندي كلام كثيررررر بقلبي ما قلته وعارفة اني طولت كثير بالكلام وعارفة ان ماحد بيقرا كلامي كامل بسبب طوله ...
بس ادعوووووو لقلب امي وبناتها بسسسس ..