زوجي جاف عاطفيا

السلام عليكم بنات
والله احترت مدري كيف ارتب لكم كلامي واشرح وضعي بصوره واضحه
لكن انا عندي مشكله مع زوجي وهو انه مايراعي شعوري بأي شي وجاف عاطفيا
ونقاشاته دايم يشتم الحريم ويسبهم وان السعوديات مامنهم فايده وماينفعون ويمدح بالاجنبيات *مع احترامي لجميع الجنسيات* لكن في كل بلد الصالح والطالح
ودايم هذا موضوع نقاشه وان الواحد المفروض مايتزوج وكل عزوبي يكلمه يقول له نصيحه شتبي فالزواج , طبعا لا طرح هالمواضيع اتنرفز واذا كملت نقاش تهاوشنا واذا سكتت يرتفع ضغطي وانفس غصب عني.
واخرتها اليوم يقول لو الزمن بس يرجع ورى انه يعني ماراح يفكر ف الزواج وان الزواج مسؤوليه, رديت عليه قلت: عاد ابتلاء من ربك الله يعينك.
قبل كنت ارد عليه ان الواحد يشوف النعم اللي عنده لا العزوبي مرتاح ولا المتزوج, لكن كل ماله يتمادى واي وحده فيكم لو زوجها هذا منواله بتحس انه كارهها ومو مبسوط معها


والله احيان احسن اني انظلمت بحياتي معاه لو انا مع واحد غيره كان امداه معيشني ملكه , الحمدلله جميله ومهتمه بشكلي ووسيعه صدر ولا احب النكد ومتفائله بشكل كبير لكن كلامه هذا محطم لي دايما , كل مابنيت احلام ورديه واننا بنكون عايله مبسوطه يهدمني.
قبل يومين يقول المفروض الواحد يسوي له بيت خاص فيه بدون زوجه وعيال,
والله ما اخفيكم اني افكر كثير بالطلاق وشاغل بالي هالفتره لكن مدري وش اقول ل اهلي, لانه محترم وسمعته طيبه لكن كلامه دايم تشائمي معي ولا عاجبه الاسره ولا المسؤوليه وجاف عاطفيا
كنت احس ان الوحده اللي من اهتماماتها تفكر تعيش قصه حب مع زوجها وتطلب الطلاق اذا ماتوفر لها انها فارغه والدنيا مو واقفه على حب وكلام فاضي, لكن لما انحطيت بهالموقف صرت احس مابقدر اكمل معاه ابغى واحد يهتم فيني يراعي شعوري يدللني, مو عالطالعه والنازله الاجنبيات افضل والحياه بدون زواج نعمه.
مدري شبتقولون عني ان ماعندي سالفه! لكن والله انك تعيشين مع شخص مو مقدر قيمه وجودك بالحياه شي يقهر . :( خصوصا اني اشوف اللي اقل مني كيف زوجها مدللها وانا احس اني بيموتني وانا حيه.
حاولت انشغل بعيالي واقول مو مهم اهالينا قبلنا عاشوا كذا بدون حب اهم شي واجباته مأديها. :( لكن ماقدرت اتجاهل :( يعني متى بنعيش المشاعر الحلوه ومع مين ؟ اذا ربي رزقنا بشخص كذا جاف.
وع فكره يقلب قيس بن الملوح لا بغى مني شي :( استغفر الله شي مستفز
لا تحسبوني مو مهتمه او نكديه والله اني اتجاهل كثير اشياء عشان ما انرفزه لدرجه حتى المصروف ما اطالبه فيه الا اذا هو سألني ناقصني شي. الطلعه يمر الشهر ما اطلبه طلعه عشان شغله وكرف ف اراعي ظروفه :(
انا اتمنى انه متزوج وحده من اللي ماتتنازل عن اي حق ومناشبته عالطالعه والنازله عشان يعرف يشتكي ويتذمر من الزواج وسيرته.
بصراحه احتاج مساعدتكم انا لو علي افكر ادور لي على وظيفه واتركه واريحه من هم الزواج ومسؤوليته :(
انا لاشعوريا صرت اقارن بين ازواج اللي اعرفهم :( حسبي الله بس