زوجي شرقي شمالي.. ساعدوني او ادعولي

السلام عليكم حبيباتي

مابي اطول عليكم كثير .. قصتي طويله جداً وبختصر قدر المستطاع

اهم نقطه ان شخصيته (شرقي شمالي) ياليت اللي تفهم بهالشخصيه تعطيني نصيحتها .. و اللي ماعندها جواب اتمنى تدعي لي ان ربي يسخره لي و لعيالي و يرده لنا رداً جميلا

زوجي كريم بالمال بخيل بالعاطفه و الرومنسيه و الكلام الحلو
يظهر حبه لي بالفراش فقط
وسواسي نظااافه .. يعني البيت يلق لق ومع ذلك يدور وين النقطه الوسخه عشان يعلق عليها

بيني وبينه مشااااكل كبيره مؤخراً .. عيوبه تفاقمت و اصبحت اخافه جداً جداً

حملت ببنتي الثانيه .. و طلب مني اسقطهاااا هذا وانا عندي ولد!! ..
يدعي عليها تموت قبل لا يشوفها
بدأ يعاقبني
حرمني من زيارات الأهل اللي طول عمري اروح لهم
مهما اسويه له من طبخ واهتمام ما يعجبه و لازم يحط عيوب
يقول عني اني مهمله ووسخه (ويشهد الله ان بيتي يلق ولله الحمد) طبعاً يمدح ريحتي الحمدلله و دايخ عليها مو تجي وحده تشك بنظافتي!!
يهدد بالزواج الثاني بالسر لين اتفاجأ على كلامه عشان يكسر راسي عند الناس
يشتمني يا حيوانه و يا و يا
ما يحترم اهلي قدامي نهائي


وعيوب كثيره جداً غيرها
و كل هالعيوب استفحلت وزادت في آخر شهرين .. يوم عرف ان اللي ببطني بنت!

المهم

وداني زياره لأهلي .. على اساس ساعتين وياخذني.. و اخبرت اهلي بكل حياتي معاه .. تفاجئو كثير .. وكيف انا صابره و كاتمه ١٠ سنين
و لما جى ياخذنا اعتذر له ابوي عن طلعتنا انا و عيالي معاه .. قال اشوف بنتي تعبانه وجهها فيه شي .. بنتي مو طبيعيه ((ابوي ما وضح له اني تكلمت)) قال ابد ياعم مافيها الا الدلع !!
قال ابوي خل ترتاح كم يوم و حنا نجيبها

ثاني يوم ارسل يعايد و سألني وينكم؟! يحسب برجع البيت .. قلت له انا تعبانه نفسياً واحتاج ارتاح عند اهلي

قال لي انتي من حملتي و انتي تعبانه نفسياً و لازم تتحملين الضغوط.. وانا آسف عن كل ما بدر مني لأني كنت بضغوط و بسوي عمليه رابع العيد و كنت خايف منها و الحين بكنسلها و انتي و عيالي اغلى ما املك

ما رديت عليه .. لأن مادري شي عن هالعمليه اذا صادق او يكذب .. كم مره يقول بيسويها و يأجل!

ثاني يوم ارسل رساله يعايد و يسأل عن نفسيتي!!
رديت الحمدلله

والحين صار له يومين لا دق و لا ارسل

اهلي قالو لي اتركيه كم يوم عشان يعرف قيمتكم و يفكر بأخطائه اللي سواها
بعدين ابوي بيناديه و يجلس معاه ويكلمه
ويوضح له كيف زوجته حفظت بيته ١٠ سنين وعمري ماشكيت .. بس لما طفح فيني الكيل تكلمت و انهم ما يرضون بهالشي لبنتهم .. و يطلب منه امساك بمعروف ويصلح من نفسه او تسريح بإحسان


انا ابي بيتي وزوجي .. ومازلت متمسكه و ادعي ربي ليل نهار يرده لي رداً جميلا .. لكن هو الله يهديه انهبل الفتره الأخيره و طفشني و خوفني منه و من العيشه معاه.. خفت على مستقبلي انا و بناتي معاه

اختي اللي تفهم بهالشخصيه .. اش تتوقع ردة فعله ؟! هل يعقل و يحافظ على بيته و عياله ؟! او يكابر و يغلبه ابليس و يهدم اللي بنيناه سنين طويله ؟!


ادعوا لي الله يوفقكم يرده لي رداً جميلا و يسخره لي ربي و لعيالي و يجعلني الوحيده في قلبه و عقله و حياته






ياااارب رد زوجي لي و لأطفالي وجنيني رداً جميلا