زوجي ناوي يجيب لي الجلطة بعدين يقول لي انتي تدورين النكد

السلام عليكم
بنات انا زوجي بطبعه اذا صار رايق يحب يمزح
يعني من تزوجته وهو كذا..
وقبل كل حركاته على قلبي عسل..
لكن الحين صرت ام وصار عندي ولد..
وصار يستهبل على حساب مشاعري كأم..
وانا مستحيل اضحك او اتقبل هالشي..
وهو مستنكر هالشي ويقول تدورين النكد!!!
لانه يحب يمزح بالطلعات والمشاوير الحلوة
واحيانا نرجع متنكدين ونقول ياليتنا مارحنا ولا جينا..


من اسبوع مثلا طلعت معه نتمشى ونتسوق..
وكنت اقلب في البضايع.. وولدي بالعربية وراي..
قام هو دف العربية لداخل شوي.. وجا يقول: يوووه وين الولد؟ وين وراح؟
وانا التفت مفجووووعه ومالقيت عربيته بمكانها..
وعلى طوووول نزلت دموعي وجلست اتلفت.. ولقيت طرفها عالجنب..
بدون شعور اخذت ولدي وضميته.. والولد يبتسم مو فاهم..
وانا دموعي غرقت النقاب.. ارتعت قسما بالله عليه..
وقلت لزوجي خلاص ما ابي اشري شي من المحل وطلعت..
وهو جلس يضحك ويقول كنت امزح.. ماينمزح معك..
وانا سااااكته طول الطريق.. واحس راسي مصدع من الروعه..
بالاخير قال: يا حبك للنكد!!
ورجعنا البيت.. نزلت انا اخذت بندول ونيمت ولدي ونمت..
وهو طلع يسهر مع اصحابه..


يوم الخميس رحت بسوي الغداء.. وخليت ولدي عند زوجي في الصاله..
طلعت شوي من المطبخ بتطمن اذا الولد نام..
الا ألقاه طايح في الصاله عالارض ويصيح ورقبته مايله على الكرسي..
لان زوجي العزيز حطه على الكرسي الهزاز بدون مايقفل الحزام..
والولد باسم الله عليه بيدخل الست شهور.. فمع الهز مال وطاح..
ولما شافني هز راسه وضرب راسه الارض وصااااح..
اخذت ولدي وضميته وجلست اقرأ عليه وافرك رأسه..
وزوجي جاء من الغرفه وهو يقول: عاااادي يابنت الحلال.. كل الاطفال يصير لهم كذا..
وانا بداخلي حابه اقول: من اهمالك والله يصير لهم كذا.. لكني سكت..
ورجعت اكمل طبخ وانا متضايقه.. وحطيت له الاكل.. ومشى الحال..



لكن الموقف الصدمة صار اليوووووم..
انا اليوم مرووووقه ماشاءا الله فطبخت له الغداء وسويت له الحلا اللي يحبه..
ولما جاء استقبلت زوجي احلى استقبال وضحك ودلع ووناسه الخ..
بعد المغرب قال لي قومي البسي ولبسي ولدك نتمشى شوي..
انا فرحت مرررره.. اعرفه اذا راضي علي ومبسوط يحب يمشيني..
وطلعت تمشينا وغيرنا جو وماشاءالله رجعنا مبسوطين..
ورحت انا المطبخ اسوي العشاء.. وخليت ولدي عنده..
بعدين رتبت له السفره وناديته.. وقلت له خلي الولد بالصاله دامه ساكت..
الا القاه شايل الولد بالكرسي حقه.. وحاطه فوق طاوله المطبخ العاليه..
وترى كرسي ولدي خفيف..
وهو نفس الكرسي اللي طاح منه ذاك اليوم..
المهم..
قلت له يا ابو فلان نزل الكرسي عالارض احسن.. لاسمح الله مع الهز ممكن يطيح..
قال: ماراح يطيح ماعليك انتي بس..
قلت له: كيف ماعلي.. تكفى نزله ما اقدر اروح اغرف الاكل وهو كذا..
قال: خلاص ماعليك انا ابجلس عنده.. خلاص روحي اغرفي..
قلت: ابروح بس بنزله عالارض احسن.. معليش خذني على قد عقلي..
قال: يووووه لا تعاندين.. قلت لك روحي خلاص وخليه..


بنات انتو متخيلين كيف بيبي صغير على طرف طاوله ارتفاعها حوالي متر..
وتحته رخاااااام.. وسبق وطاح من نفسي الكرسي مع الهز..
رغم انه طاح عالارض وقتها وبرضو تعور.. وزوجي كان يقول ماعليك وراح وتركه..
والحين يبي يكرر نفس السالفه بس بخطوره اعلى..

المهم طالت السالفة وهي قصيرة..
وانا سحبت كرسي وجلست وقلت ماني رايحه اغرف وابجلس اقابل ولدي..
قال: ياحبك للنكد!
قلت له بصوت عالي: حرام عليك لاتعور قلبي..
وقسما بالله حسيت بألم اسفل بطني ودار راسي وشفايفي جفت..
بالاخير قمت وشلت الكرسي ونزلته بالقوه..
قال: انتي ماتستحين ترفعين صوتك علي!!

ورحت غرفت له الاكل.. وحطيته ومشيت ارضع ولدي وانيمه..
يعني ما اكلت.. انسدت نفسي فجأة مع اني كنت جوعانه..
وهو اكل كل الصحن ماشاءالله!! وراح يناظر التلفزيون.. ولاهمه..
رجعت المطبخ عشان انطف وارتب واغسل الصحون..
وطلعت ورحت سريري ونمت وتركته.. بدون ما نكلم بعض..




بنات انا تعبت.. ولدي خط احمرررررر.. ألف مره اقول له..
يعني بالمزح امزح بعيد عن ولدي.. وبالعناد وفرض الرجوله ابعد عن ولدي..
وهو يحبه بس مايراعي سن الولد.. حتى اذا لعب ولده يلعبه بقوه..
وانا قلت له مره بهدوء: يا ابوفلان انا ام.. قدر مشاعري كأم..
جفاسه وجدل وعناد على شي انا ادرى انه بمصلحة ولدي..
وهو يقول: الشرهه علي اللي طلعتك وقابلتك اليوم.. تحبين النكد!
وانا يابنات ماندمت عاللي صار اليوم..
لان يصير بينا زعل اهون عندي من ان ولدي يصير فيه شي لاسمح الله..



بس ليتكم تعطوني رايكم.. وش الحل مع هذا الرجال :(