زوجي واخوي ... والهم والحزن اتعبني

مساءالخير 
كيفكم جميعآ 
ادري كتبت لكم كثير بس ان شاءالله اخر استشاره 
وراح اسمعها ع طول وانفذها منكم بس انتبهو وشوي شوي علي ابي قرار نهائي اتعبني التفكير والهم الناس رمضان وانا من اول يوم مو حاسه بطعمه مثل كل سنه 

افكاري متناقضه 
انا اللي زوجي كان مدمن ورفع علي سلاح اكيد كلكم مرت عليكم مواضيعي من كثر ماكتب 

المهم زوجي يحلف انه من اليوم اللي تركته ماطبت فمه الحبوب 
الكبتاجون انا لي تسع شهور في بيت اهلي 
ويحلف انه تغير  وانه تاب ((زوجي ضعيف شخصيه ))
المهم كثير الحلف وكثير الكذب هو
للعلم اول مابدا ب العلاج حلف لي انه ترك كل شي وقال انه ترك الدخان ويدعي ع نفسه ب الحادث والموت لو كذب علي 
يعني انه صادق المهم من شهر اكتشفت انه يدخن ولاتركه ولايوم 
وله الان يمكن اسبوع ترك الدخان من كلامه هذا 
ويحلف ويبكي انه يبيني ويقولي ادعي علي اموت عشان تفتكون مني لانه مايقدر يتركنا 
اهلي كلهم يقولون ماندري عنك ولانقدر ننصحك ب اي شي 
انتي قررري مع نفسك ... اخوي الكبير يقول انتي ادرى حنا مانعرف شي ابوي متوفي ااااه 
واخوي ابو 18 سنه يقول لاترجعين ابد وانه يعرف كل شي 
وبعد ماعطيت زوجي كلمه البارح اني برجع ورحت معه اشوف البيت 
ورجعت اخوي مره ضايق صدره ويقولي ليه سويتي كذا 
ووجهه مو زين يقولي انه هذا زوجك ماتغير لو ترك المخدرات 
وبعد ماحلفته يقولي اي شي لو يعرف عنه قام قالي 
ان زوجك الاسبوع اللي راح ماخذ الجهاز جوالي ومعطيه واحد يقوله ابغاك تطلع كل شي فيه مكالمات واشياء قديمه يعني يبحث وراي 

 ((زوجي قبل كم شهر جاب لي جوال جديد واخذ جهازي القديم ))

بس انا الحمدلله ماخفت منه ربي فوق ويعلم 

وانا مشكلتي معه هو يشك واليوم الاخير اللي انحشت منه 
كان ماسك سلاح وساطور ويقولي اعترفي وين الرجال وكان زي المجنون يطق الارض ويصرخ يقول خله يطلع ويروح يركض منا ويجي منا ويقول اللحين بيطلع وتنتهي الدنيا ....

هو الان يقولون اكيد تاب وهو يحلف انه رجع يحافظ ع الصلاة 
وترك كل شي ويقول مستعد احللل واقابلك ب المحكمه واخذ تعهد عادي بس ترجعين وانا خايفه ماحس انه بيتوب ابد ماحس بيتغير 
ومابي اتطلق ومابي شي تعبت ومدري شسوي 

اقول لاخواتي خلو ازواجكم يسألون عنه يقولون ماندري 
ووحده من خواتي تقول زوجها يقول خليها ترجع بس وتتعوذ من الشيطان مافيه شي للعلم هو ماشك بغيري ماضر غيري ماحد عاشره غيري هو خلقته موسوس 
وزياده ادمن 
وهو جالس يقولي الان كلمني صديقي الفلاني قالي ارجع معنا وهاوشته والثاني عطاه حبه وطحنها برجله  وقالهم اللي هداني يهديكم  
واللي يقول مسكني ب المحطه وووو وبس يمدح نفسه 
وانا بين نارين ياناس خوف وتفكير وكل مابدا ارتاح واقول خلاص برجع يجيني خوف 
وفسرت لي ثلاث احلام كلهم مافيهم خير 
وتقول لي لاترجعين الرؤيا 
واللي يفسرهم استشاري اسري وموظف بلجنة الاصلاح 
ويقول مانصحها ترجع ابد الا لو متأكده مره 
او بس تستخير واذا مارتاحت لاترجع 
اصدق الاحلام واتركه والا اصدقه هو وارحمه 
وارجع يقطع قلبي هو 
مع ان في شي بداخلي يقولي لاترجعين 
انا معي ثلاث اطفال منه 
ومليت ابي الاستقرار وودي ابوهم فوق راسهم يشوفهم 
ماني قادره عليهم 
وابوهم مايصرف حتى عليهم ابد ويقول انتي السبب 
ولو تعرفين الحرام ماضيعتيهم وفرقتينا 
ويقولي لو مارجعتي ب اخذهم يوم قلت المحكمه هي تحكم لمين العيال قالي اذا جبتي دليل اني رافع عليك سلاح 
خوذيهم هو امه واهله معه وامه تقول بشهد معه 
الساطور هي معطيته امه يخبيه وانا تبليته وقالو عني مريضه اقرو عليها تبي علاج صرت انا اللي يتهيأ لي يارب رحمتك فيني 
انا والله مرضت بسببهم 
وحياتي انقلبت حزن دعواتكم 


انا اللي هو قررت امس وقلت له ننسى الماضي ونرجع خلاص 
بس ماش رحت معه مو حاسه براحه وزياده اخوي ضيق صدري 😭

يارب ارحم ضعفي وقلة حيلتي 
ابي قراركم انتم اتم ع قراري امس وارجع اجرب 
ولا خلاص اتركه واسلم امري لله 
للعلم اخاف منه واخاف لو رجعت وقلت له مابيك يسوي فيني شي وماستطيع ع تحمله اتعبني الهم واضعفني الحزن 
استغفرك ربي واتوب اليكك 
لاتنسونا من دعواتكم