زوجي والحبوب< الله لايخليني منكم ياارب علموني

مساءكم ورد...


الله يوفقكم بنات والله إني محتاجة لكم حيل
أحسها والله سالفة حياة أو موت..

طقيتها يمين طقيتها يسار مالقيت أحد يفيدني
قلت مالها إلا بنات حواء...

السالفة زوجي يمر من كم سنة بظروف نفسية سيئة

طبيعته عصبي ونكدي وجت عليها

ظروف مادية من إنهيار أسهم / عمار بيت من كم سنة مدري متى يخلص/ ناس أكلوا فلوسه في العقارات وللآن ماشم ريحتها/ عمل متعب وتركيز وقلق وقبلها كان في إدارة مستقعدين له وأنواع النشبة

طبعاً الرجال بخير بس فيه غبنه أتمنى فهمتوا علي


النتيجة رجال عصبي
يهاوش حتى الجدار
مكتئب
حتى الجنس مايمارسه إلا بطلعة الروح وتأدية واجب ماعاد فيه رغبه!
نفسياً تعبان
من النوع اللي إذا شال هم تجيه دوخه خطر عليه من جلطة:(
وينفر جسمه تطلع حبوب هذي كل مازعل والا تمشكل أو تعب تطلع معه

الأكل كنه نسو ويتشرط ومايرغب أي شي

وهالشهرين متوتر لشغلة يمر فيها وأحسه تعب خلاص
وأنا بعد تعبت يحط حرته فيني ويهاوش على لاشي


طبعاً الرجال يطلع كعادته ويسهر وماخذ راحته مو انطوائي

بس يقول ودي بحبوب تخليني اروووووووووووووق

تعبت ودي أنبسط وأرتاااح

ويقول ياليت فيه حبوب أخذها وتخليني أرووق

عاد أنا ذكرت قريبة لي تأخذ سيبر اليكس
بس مدري لو تناسبه؟
وضع اللي أخذتها تختلف عنه

وهو رافض يروح لطبيب نفسي أصلاً مايحب يعالج من أي مرض فما بالكم بطبيب نفسي:42:

وقالي جيبي أسم الحبوب وأنا خذتها بس جيت أستشيركم

أو ممكن تساعدوني برقم إستشاري ينفعني بس أهم شي يرد علي

الله يوسعها عليها دنيا وآخره اللي تفزع لي وتساعدني والله لأدعي لها في صلاتي وسجودي وإن شاءالله مايرد لي ربي دعوة:26: