زوجي والحشيش

السلام عليكم
اخباركم بنات
انا ع26 وزوجي33
متزوجه من سنه و 8 شهور تقريباً عندي بنت 7 شهور
ببداية بعد ماملكنا عرفت ان خطيبي يدخن
وانا اكرهه الدخان و ماحب اللي يدخنون
وهو ماقال انه يدخن و اهلي مدري كيف نسوو يسالونه،
المهم تجاهلت الموضوع بما اني ملكت
وبعد الزواج لاحظت ع زوجي تصرفات غريبه
يضحك ع اتفهه الاشيا ويعصب على اتفهه الاشيا
يجلس لوحده كثير، عنده مكالمات و الغاز
ضعيف جنسياً استغربت هالشي كثير و نحن بداية الزواج،
في يوم من الايام سبحان الله ربي اراد ان يكشف امره
رحت للمجلس اللي يجلس فيه دايم،
ولقيت علبه فيها حشيش و معه ورقات صغيره زي الدفتر،
انصدمت مره ورحت انام،، اليوم الثاني
كلمت زوجي انا شفت عندك حشيش وكذا
جلس يحلف كذب انه مو حشيش وانه دخان!
المهم في نفس الفتره طلعت حامل وسكتت
قلت يمكن يتغير مع الايام وبعد مايجي البيبي
لاكن للاسف لاحياة لمن تنادي،،
صار مايجلس بالشقه ابداً و يجي وقت النوم فقط
وانا لوحدي واحيان ينام عند اهله او بالمجلس!!
بعد الولاده اسبوع ينام بالمجلس و يوم عندي
وفوق هذا العلاقه هذيك بيننا منقطعه تماماً
اربع شهور مايلمسني ابداً استغربته كثير
وسالته انه هالشي مايجوز ومايصلح تتركني كل هالمده
قالي انتي ماتعطيني وجهه انتي ماتبين و انتي و انتي ،،،،
طبعاً قلب السالفه علي لانه حس اني طعنت برجولتها
وان هو يبي ينام معي بس انا اصده
وانا و الله كل يوم انتظره يجي، ولا يجي والله يعلم بالنيات
المهم هو بدا يتمادى علي
وكل اسبوع متمشكلين على شي!
تخيلو من تزوجت ماطلعني يمشيني بمكان غير بندة!
تجيني ضيقه بقلبي من حبسة الشقه


اذا سالت ليه تنام بالمجلس يقول بكيفي انتي مالك دخل انام وين مابي انتي ماتتحكمين فيني!!
اذا سالته وين طالع يقول هذا اللي ناقص تتحكمين فيني،
اذا وطيت ع المكيف او قفلت التلفزيون يقول هذا اللي ناقص تتحكمين فيني
وكل كلامه انا رجال و شوري بيدي!!
ويغلط بالكلام مالت عليك وعلى وجهك انا اوطي عليك وعلى راسك و ادوس عليك و اصفقك !! وانتي مريضه و كذابه وانا ودي اطلقك بس اشيا تمنعني وانتي عاله علي وبهيمه ،
وانا اقسم بالله ماعمري غلطت عليه بالكلام !!
كل هذا بدون سبب
رحت كلمت اهله ان ولدهم يغلط علي و يتمادى ،
قال اي انا بنام بالمجلس مثل مابي
لان هي ماتعطيني حقي ، وبالحقيقه هو اللي مايجيني!
وانا على كيفي وبيدي كل شي،،
وانا بصراحه ضاقت فيني بكيت لين تفقعت عيني
هو مريض الحشيش لاعب فيه
طبعاً انا للحين ماعلمت احد بالموضوع، عشان بنتي
بس ماقدر اتحمل مزاجيته،، تعبت
المشكله انا ساكته وكاتمه الموضوع مابي افضحه
وهو بكل وقاحه يقول بنتكم قليلة ادب تراددني باي وجهه!!
انا الحين رحت بيت اهلي
انا عن نفسي ودي بالطلاق بس خايفه على بنتي!!
عيشتي معه جحيم وكذاب بشكل لايطاق،
وهو مايهمه شي ابداً حتى الطلاق عادي عنده،
انا قررت ابقى عند اهلي لين يعالج نفسه
او اني ابلغ عنه لانه مسوود عيشتي ؟؟!
ماهو الحل برايكم؟؟؟