زوجي وعياله بيجيبون لي الجلطه والجنان

السلام عليكم ورحمة الله وبركاته
انا ياجماعة الخير متزوجه ولي مشاكلي وهمومي وجيت اقول لكم شي منها لعلي القى كلمه حكيمه او راي سديد ينفعني
انا ياخواتي متزوجه من سنه ونص رجل متزوج وعنده اربعه ابناء 3اولاد وبنت طبعا يوم جاء وخطبني اهلي شرطو عليه بيت شرعي وان عياله مايسكنون معي لكنه قال انه مايقدر يفتح بيت ثاني ويبعد عن عياله قالوله اهلي خلاص تسكن بنتنا مع عيالك بس مهي ملزومه تخدمهم وبنكتب في العقد ان لها بيت شرعي يعني اذا عيالك مااحترموها او اذوها انت ملزوم تحطها في بيت لحالها ووافق وقال عيالي عندهم شغاله وهي تسوي لهم كل شي وعيالي ولا لها الا الاحترام مني ومن عيالي
وبعد الزواج ياحبيباتي بصراحه شفت تصرفاتهم وطباعهم مرره ماعجبتني مررره اتكالييين ومايعتمدون على انفسهم و بس يوصخون ويهزؤن في الشغاله ويسبونها ويطفشونها بس انا سكتت قلت مالي شغل فيهم اخاف اتكلم وانصحهم يغلطون علي او يزعل ابوهم قلت يابنت طالما الشغاله اللي قايمه فيهم انا مالي شغل ومامر شهر على زواجنا الا وهربت الشغاله ولاتنلام بصراحه وجبنا وحده غيرها وبرضو هربت اقسم بالله يابنات تقريبا 4 شغالات اندونيسيات جبناهم وهربو بسبتهم واخرتها صار الشغل كله علي الطبخ والتنظيف والغسيل وطلبات زوجي هذا غير اني اذاكر للولد الصغير اللي ثالث ابتدائي والبنت عمرها 14 ماتعرف تمشط شعرها وانا اللي استشور لها وامشطه حتى مريولها ماتعرف تكويه وانا اللي اكويه لها وهم بس يوصخون ويرمون ويبعثرون الدنيا ويتركونها وابوهم لايهش ولاينش بس ساكت ويتفرج فيهم وينتظرني اسوي كل شي كل هذا وانا كنت حامل ومتوحمه وتعبانه وحالتي حاله الله لايوريكم ودايم اقول لنفسي معليش مالهم احد لاتجورين عليهم انتي والزمن محد علمهم ومرت سنه وولدت بولدي وخلاص
تعبت وقرفت مهي حاله زاد الضغط علي وقررت اني اعلمهم يعتمدون على انفسهم موعشانهم عيال زوجي بس والله والله يابنات مااحب الاتكاليه ومااحب الوصاخه وعندي قاعده ان اللي يخرب شي او يوصخه لازم هو بنفسه اللي يرجع ينظفه او يصلحه عشان يحس بتعب غيره حتى كنت اسوي كذا مع خواتي وحتى مع اخواني الاولاد يوم كنت عندي اهلي وناويه حتى عيالي اربيهم بنفس الطريقه عشان يحسون فيني وفي تعبي
المهم صرت كل مايخربون شي او يبعثرونه اقولهم يرتبونه وصرت اقول للبنت تساعدني في امور البيت بس المشكله انهم صايرين يعاندون ويحاولون يستفزوني بحركاتهم وبكلامهم خصوصا البنت صايره مره وقحه تتعمد انها تنرفزني بحركاتها او لما اقول لها تسوي الشي ماتسويه الا بعد مااعيد الكلام اكثر من مره واحسها تحاول تخليني اعصب يعني كانها تبي تسوي مشكله لكن انا الحمدلله من النوع اللي لو مهما اتنرفز احاول اضبط نفسي ومااعصب ودايم اكلمها بهدوء ومع هذا ترد علي من راس خشمها ولا ودي اغلط عليها
لان لسانها طويل مررره دايم اسمعها لما تتخاصم مع اخوانها وحتى مره تخاصمت مع عمتها اخت ابوها ومدري كيف اتعامل معها صحيح اخوانها يعاندون من تحت لتحت بس لما اكلمهم يستحون مني ويسوون اللي اقولهم عليه وفيهم شوية حيا لكن هي قلة ادبها ووقاحتها عيني عينك وماعليها من احد لان ابوها مدلعها عشانها البنت الوحيده ماهمها احد وفوق هذا اكتشفت انها تكذب وتقول عني كلام موزين لانها مره كانت تلعب مع بنت وحده من جماعتنا وتكلمت عني والبنت قالت لامها وامها خبرتني والله اني انصدمت وانقهرت
وياليت الكلام صدق لكنه كذب قلت هذا وانا طيبه معها اجل لو اني اخاصم زي العمات وش كان قالت عني
والله يابنات انا تعبت وانقهرت ومدري وش اسوي وكل محاولاتي اني اعدلهم ماني شايفه انها جايبه نتيجه بالعكس صارو يتعمدون يطفشوني ولو اني من النوع اللي اخاصم واتكلم كان صارت مشاكل اكبر من كذا واللي قاهرني ان زوجي ماينصحهم اذا شاف الغلط ولايتكلم معهم ابدا مخليلهم الحبل ع الغارب ويبيني اسوي كل شي وانا ماقدرت اناقشه في هالموضوع لانه حساس مره من ناحية عياله واخاف يفهمني غلط واخر شي قلت له يدور لي شغاله لاني الحين حامل بطفلي الثاني ومرررره تعبت وعياله ماقصرو زادوني تعب على مافيني وجاب وحده صوماليه وقالو له مانبيها ********** ومشاها وانا ماباقي الا انفجر
فكرت اقوله يحطني في بيت لحالي بس ظروفه مررررررررررره ماتسمح حاليا وقلت اناقشه في موضوع عياله لكني متاكده انه راح يزعل ويقلب الموضوع علي وبيقول اني اكرههم .........ومدري وش اخرتها

معليش طولت عليكم بس سامحوني والله من زود القهر اللي فيني
والله لايحلل ولا يبيح اي وحده ترد رد يجرحني او يكسر خاطري والله لايسامحها