سؤال لكل من لديها خبرة بعمر الثلاثة سنوات

السلام عليكم

أخواتي العزيزات
عندي ابنة وحيدة عمرها ثلاثة سنوات وشهرين ونحن بالغربة يعني علاقاتها مختصرة بيني وبين الروضة وحتى والدها بتشوفه حوالي ساعتين باليوم ومعارف وزيارات ماعنا
أو قليييييييييييل أقصد أن أي شيء رح تتعلمه رح يكون مني أو من الروضة
ابنتي ما تعبتي كثير بصغرها يعني بقدر أقول طفلة مثالية ونضفت بسهولة ولوحدها والحمد لله
الروضة اللي هي فيها روضة خاصة وغالية يعني المفروض وحسب اللي أنا شملاحظته روضة جيدة جدا وفيها مربيات مؤهلات بنتي بتحب الروضة وحتى بأيام العطلة بتسأل إذا رح نروح ولا لا وبتزعل لما بجي أخذها وعلى فكرة هي ثاني سنة ليها بالروضة مو جديدة
إلى هنا كل شي تمام والحمد لله المشكلة هي
من حوالي الشهر تقريبا رجعت بنتي تعملها تحتها بالنهار في الروضة أولا وحاليا حتى في البيت ولعدة مرات
تغير طبعها بشكل غريب بعد ما كانت اللطيفة المحبة صارت الهمشرية اللي تنطنط على الكراسي وما بتخاف لا من أهل ولا من غريب
متعبتني جدا ولا بتسمع الكلام وخالف تعرف هو اسلوبها كمان بالبيت وبالروضة

أول شي أخذتها باللطافة والهدايا ما نفع وبعدها بالصراخ وما نفع ومن فترة بالضرب والزعل ( ضرب على الخفيف ) وكمان ما نفع
تناقشت مع مدرستها طلعت بتشكي أكثر منى خاصة أنه اللي معاها ما بيتصرفوا بهالطريقة أو ما بيوصلوا لمستواها بالهمشرة

ليش برأيكم والله انه عيشتها بالبيت كثيييييييييييييييييييييير هادية ومثالية وما في صراخ ولا مضاربة ولا بتشوف تلفزيون (برامج سيئة ) وغامرينها أنا وأبوها بالهدايا والدلال خاصة أنها اجتنا بعد عذاب وعمليات أطفال أنابيب .

أسفة لطول القصة بس ياريت اللي عندوا رأي يفيدني فيه وخاصة حكاية العودة للتبول لأنو المدرسة قالتلي رح نجرب التطنيش فترة وبعدها بيصير لازمها طبيب نفسي خاص بالأطفال وأنا ما حابة توصل لهالمرحلة .
وجزاكم الله ألف خير