ساعدوني الله يوفقكم..اللي عندها خبرة..طفلتي كيف أنظم نومها؟ (3شهور)

السلام عليكم

بأدخل في الموضوع مباشرة....

السالفة و ما فيها.. إن بنتي بتكمل 3 شهور بعد أسبوع تقريباً و بتدخل في الرابع إن شاء الله.. طول الشهر اللي فات كنت أحاول أخليها تكتسب عادات النوم الصحيحة (تنام لوحدها بدون مساعدة و أهم شي تنام في وقت مبكر من الليل).. بالنسبة للنوم بدون مساعدة كانت أحياناً قليلة تنجح لما تكون شبعانة و نعسانة و أحياناً كثيرة تفشل معي ثم تبدأ المعارك الطاحنة من أجل النوم و الله لا يوريكم.. صياح وتلوي عشان تبغى تنام و لا هي قادرة و بعد ما لا يقل عن ساعة بالعادة تنام بعد أن أجرب كذا محاولة ما بين هز و أناشيد و سوالف و مصاصة (أكره المصاصة.. أعطيها لها عند الضرورة القصوى فقط!)... المشكلة الحين قربت من الشهر الرابع و هذا الشهر هو شهر اكتساب العادات للطفل و هو شهر بدء تعلم الكلام و اكتشاف العالم و التعرف على ما هو مألوف و غير مألوف....و إذا فشلت في البدء من هذا الشهر فسيكون صعب علي في الشهور القادمة تعويدها و بعدين عندي أشغال مهمة أبغى أخلصها و ودي أرتب لها نظام و روتين معين من الآن عشان أتفرغ لعملي بعدين و أقدر أنظم وقتي حسب النظام الجديد.. (ما ابغى لخبطة مثلي الحين!)...

الحين هي ما تنام إلا في وقت متأخر من الليل.. قريب من الفجر... و تصحى الضحى ترضع ثم تنام الظهر أو بعد الظهر و تصحى بعد ساعتين أو ثلاث ثم تاخذ غفوة المغرب... و بعد كذا.. تبدأ تشتغل ما بين لعب و ضحك و بكاء و تشكي... و أحياناً غفوات نص ساعة.. حتى قريب من الفجر!!!! يعني نومتها الطويلة و العميقة تبدأ آآآآآآآآخر الليل لحد الضحى.. ودي تبدأ على الأقل من الساعة 12 بالليل...

لا تقولون خليها في السرير تبكي لين تنام!!! حرام توها صغيرة و بكاها يقطع القلب.. ما أقدر أصبر عليه!...

هذي بكري و لا عندي خبرة في هالأمور.... اللي جربت تقول لي... هل أصبر شوي عليها... و لا أبدأ أعودها من الحين؟ و ماهي الاستراتيجيات اللي تستخدمونها عشان ينامون أطفالكم في مثل هذا السن؟ ترا بنتي ما هو أي شي ينفع معها... لأني ما عودتها على الهز ولا أستعمل معها المصاصة كثير (و لو انها أكثر شي يسكتها! بس ما هو شرط ينومها!)...حتى لما آخذها في يدي و أحضنها ما ترتاح!


آسفة طولت عليكم!!!

تجاربكم يا أمهات العصافير الحلوين.....


و تكفون شوروا علي....تعبت معها...لازم معركة قبل كل نومة أو غفوة....