جبنه وحلاوه @gbnh_ohlaoh

عضوة فعالة

ساعدوني زوجي بينقلوه للمدينه...

بسم الله الرحمن الرحيم

كيف حالكم ياحوائيات ايش الاخبار

حابه استشيركم بشغله مهمه بالنسبه ليا

انا مملكه وزواجي *****الله اذا اراد الله بالصيفيه وانا وزوجي كلنا من سكان جده واهله كمان بجده المهم امن نفسه وعمر شقه فوق بيت اهله واكتملت من الى مابقى فيها غير غرفه النوم حتى الاكسسوارات انتهى منها

وغير انه عليه قرض 63000 خلص ربعه وعليه تقسيط سيارة واخذ قرض من بنك التسليف هذا القرض بيسدد فيه القرض الاول اللي 63000 ويخلص منه يعني يصير عليه بنك التسليف حياخذوا منه بس 700 ريال شهريآ والسيارة وراتبه دحين 5000 ريال

كلمني انه بيترقى بيصير مساعد مدير بس الترقيه وراها نقل للمدينه ويرتفع راتبه لــ 9000 ريال

انا لمى كلمني بصراحه شويه تخوفت قلي انا كلمتك انتي واهلي كلهم مايدروا انا ابغى رأيك انتي لو وافقتي بننقل ولو قلتي لا نقفل على الموضوع واهلي كذا ولا كذا حيعرفوا بس انا ابغى رايك انتي لانك انتي اللي بتعيشي معايا

قلتله دامك مصمم على رأيي خليني اصلي استخارة وانت كمان صلي لان موضوع وقرار مثل كذا مو سهل الواحد يتخذ قرار سريع يتندم عليه وصليت استخارة وبصراحه احساسي مظطرب ماادري مرتاحه ولا لا
انا لمى افكر اني بروح المدينه ومااعرف احد فيها ومااعرف المدينه الا لمى نروحها زياره للمسجد بس غير كذا لا ولمى افكر ان هنا بجده اهلي جنبي وكمان اذا اراد الله وتزوجت اهله ساكنين تحتي والبيت ملك وغير كذا هو البكر وبصراحه لمى امه تزورنا اوتكلمني بالجوال احسها متعلقه فيه لدرجه فظيعه خايفه ابعد ولدها عنها بسببي

وانا ذحين بين نارين نار اهلي واهله وبيت الملك اقول احسن من شحططة الايجارات اقوله لا واكون وقفت بوجه نجاحه وترقيته وغير كذا تذكرت مره كلام ابويا قبل مايطلق امي كان يقولها انا كل ماقلتلك ننقل تقولي لا ولا اقولك ناخذ بيوت او ارضيات تفيدنا للزمن تقولي لا انتي مو زي الحريم اللي يوقفوا ويخلوا رجالهم يعيشوا ويشوفوا حياتهم ومستقبلهم ومستقبل عيالهم وانا مابغى اكون بصراحه مثل امي يمكن اوافق نروح للمدينه واتشحطط بالايجارات ويمكن ارفض ويقولي انتي وقفتي بوجه نجاحي ويجرحني بالكلام والله يعلم بالغيب

وبين نار اني اوافق ننقل للمدينه واحس اني بضيع فيها ومااعرف شي فيها وشحططة الايجارات وغير كذا انا اخطط لبعيد يعني ممكن لاسمح الله مرض او شي اهله جنبي وجده عارفتها وعارفه شوارعها اما بالمدينه فين ادور بشوارعها وانا مااعرفها يعني الحياه فيها المكروه الله يبعده وفيها السعادة ولو حصل مكروه مين بيوقف معايا وانا من النوع شخصيتي مو اجتماعيه مره

انا ابغاكم بعد الله تخرجوني من حيرتي اللي انا فيها ابغى كلام يقنعني ويريحني عشان مااتسرع واتخذ قرار مو حلو يمكن تكون وراه عواقب وخيمه علينا

يلزم عليك تسجيل الدخول أولًا لكتابة تعليق.

تسجيل دخول

ashouaaq99 • 13 سنة

الله يكتب لكم لي فيه الخير

ღ وهــــ»ــــج ღ • 13 سنة

والله ياليت اسكن المدينة احمدي ربك ياشيخة

ام رهوفة ا • 13 سنة

وافقي ورحي مع زوجك بعدين ترى اهل رجال بسرعه تتغير معاملتهم معك ام زوجي كانت تعامليني احسن معامله بعد زواج الله لا يوريك لي سوته فيني تسلط وغيره وتدخل بحياتي بشكل مو طبيعي

dalya119 • 13 سنة

ام رهوفة ا :

وافقي ورحي مع زوجك بعدين ترى اهل رجال بسرعه تتغير معاملتهم معك ام زوجي كانت تعامليني احسن معامله بعد زواج الله لا يوريك لي سوته فيني تسلط وغيره وتدخل بحياتي بشكل مو طبيعي

وافقي ورحي مع زوجك بعدين ترى اهل رجال بسرعه تتغير معاملتهم معك ام زوجي كانت تعامليني احسن...

توكلي على الله وروحي مع زوجك وأنت رايحة مدينة وليس قرية في آخر الدنيا
وحاولي تتعرفي على زوجات زملاءه في العمل أو الجيران بعد ما تتأكدي منهم
ويكون بينكم تزاور حتى ماتشعري إنك في غربة

وبالنسبة لبيتكم في جده خلوه مثل ماهو إذا جيتو إجازات
تستفيدون منه وخاصة في السنوات الأولى لاتفرطون فيه إلى أن تتضح لكم الأمور

مع الإستخارة الله يكتب لكم الخير وما فيه
والله معكم

كل الغلا والحب • 13 سنة

توكلي على الله وروحي معاه

والله يكتب لكم اللي فيه الخير