ساعدوني كيف اتعامل مع خطيبي

السلام عليكم
وحشتوني يا حوائيات
المهم ادخل في الموضوع على طول
بنات انا مملكة من تقريب 4 اشهر وخطيبي الحمدلله فيه الصفات اللي ابغاها بس المشكله احسه احيانا يا انه مايحبني يا بارد ومايعرف للاهتمام هو ابوه وامه متوفين يعني يتيم الابوين وعنده 6 اخوان رجال واخت وحيدة تصدقو ان ماسوا شي معايا غير انه مسك يدي وبس من يوم ما ملكنا مع انه كذا مرة جات فرصة بس مادري ايش فيه يعني انا اللي اعرفه ان الرجال مايصدقو الخبر انهم يملكو عشان يبوسو زوجاتهم مثلا واسفة على جراءتي بس هو ولا شي
وكمان شي تاني كذا مرة طلعت انا وياه واهله نتمشى وزي كدا وانا لاحظت انه اذا التقى باهله ينساني نهائيا ويتجاهلني ولا كاني موجودة ويحب اهله بجنووون خاصة اخته ودايما يوصيني عليها ويقولي اتصلي عليها واتواصلي معاها وبالفعل دايما اكلمها واتصل عليها بس هي ماتتصل بس هي حبوبة وطيبة واخلاقها تمام بس يقهرني تجاهله لي لمن يشوف اهله واخر شي قالي بصريح العبارة وحرفيا { انا انساكي عند اهلي } قسم بالله ما تتصورو قد ايش زعلني كلامه وبعدها انا قلتله كلنا نحب اهالينا وانا عن نفسي احب اهلي مرررة وانت كمان احبك زي ما احب اهلي ما احب احد اكتر من التاني كلكم عندي زي بعض قام قالي وانا كمان بس قصدي ان الاخوان مايتعوضو بس الزوجة اقدر اتزوج وحدة واثنين وثلاث هذا واحنا مملكين يقول كدا اجل بعدين اذا اتزوجنا وخلفت ايش راح يسوي وانا متأكدة اذا اخته قالتله طلقها وازوجك اللي احسن منها راح يطلق واذا قالتله ارمي نفسك في النار راح يرمي نفسه هو يسمع كلام اخته في كل شي اووف يقهرني
بس بالامانة هو طيب ويكلمني كل يوم مرة وحدة ع الجوال ويقولي كلام حلو بس انا مو فاهمته مادري ايش يبغى بالضبط ايوة نسيت اقول ان هو يتيم الابوين من لمن كان عمره 15 سنة ودايما يقوللي ان فاقد حنان امه
راح اذكر لكم موقف مررة زعلني منه انا مسجلة في النادي وكل يوم ابويا يوديني ويجيبني بس في اليوم الوطني بنشرت سيارة ابويا واتصل علي وقالي بنشرت سيارتي اتصلي بخطيبك خليه يرجعك قلتله طيب وكانت الساعة 10 ونص الليل واتصلت على خطيبي وقلتله اللي صار وقالي دحين ما اقدر مررة مشغول وبعدها قالي شوي وادق عليكي قلتله طيب
اتخيلو يا بنات النادي قفل وانا جالسة استنى برة وشباب رايحين جايين ويعاكسو كانت الساعة 11 الليل واخيرا اتصل وقام قالي ما اقدر اجيكي مشغووول وزحمة وما اعرف ايش وقالي دقي على ابوكي خليه يرجعك لو بتاكسي قلتله ما اقدر ادق عليه قام قالي تبغيني انا ادق عليه قلتله لا خلاص انا حاتصل وبعدها سكر وقبل لايسكر قالي بكل وقاحة طمنيني عنك
وبعدها جلست في الشارع افكر ايش اسوي لاني ما اقدر اتصل على ابويا عشان خطيبي مايطيح من عين ابويا هذا اولا
وتانيا ابويا ماتصل وقالي دقي على خطيبك الا لانه من جد مايقدر يرجعني ولازم يودي السيارة الورشة عشان المدارس
وانكسرت واتحطمت وحزنت وزعلت واخيرا حسيت اني كرهته خاصة وهو قالي قبل كدا ان اذا اي احد من اهله صارتله مشكلة مهما كان مشغوول يسيب كل شي ويروح يشوفهم وانا احتجته وما كلف على نفسه انه يجي ويرجعني للبيت مشوار ماياخذ ربع ساعة واخر شي قلت مافي حل غير التاكسي ودخلت تاكسي لحالي بالليل ولاول مرة بحياتي كانت الساعة 11 ونص وانا في الطريق للبيت جلس يتصل بس انا مارديت عليه لاني زعلانة وفي نفس الوقت ما اقدر اكلمه بوجود رجال غريب واتصل يمكن 6 مرات بس مارديت ولمن وصلت للبيت خلاص رديت عليه وقام قالي انا جنبك في الطريق قلتله لا خلاص وصلت قام قالي كيف وصلتي قلتله وصلت وخلاص وانت ايش هامك خليك في شغلك قام قال ايش الاسلوب هذا وقام قالي تقوليلي ولا ادق على ابوكي واسأله قلتله بالتاكسي ولحالي وقالي ويف تركبي تاكسي ومدري ايش وماعندنا بنات يركبو تكاسي المهم ان هزأني وطلعني انا الغلطانة
بالله ايش رأيكم وكيف اتعامل معاه انا مو فاهمته ما اعرف ايش يبغى بالضبط
اسفة اني طولت عليكم
انتظر رأيكم