شجعوني للعناية بامي المريضة

السلام عليكم..

ترددت اكتب موضوعي لكن الايام الي فاتت مزاجي متعكر بزيادة ونفسيتي ضاايقة وصايرة اعصب وماثر على علاقتي حتى بأمي ..

من فترة مو بعيدة امي الله يشافيها صابتها جلطة بالدماغ وانشلت بعيد عنكم الشر والممرضات شرحو لي وضعها وان مابتقدر تعتمد على نفسها يعني تحتاج من يخدمها ويقوم فيها ..

طبعا بما اني البنت الوحيدة لها فصرت انا المسئولة عن رعايتها ..وماتتخيلون قد ايش كان صعب جدا بالبداية

صعب انك تكون مسئول بشكل كامل عن شخص اخر بالاضافة لنفسك وخصوصا كان اخر ترم دراسي لي

فكنت اروح الجامعة وارجع وانا تعبانة ولكن اقاوم التعب وابدأ بشئون امي من تبديل وادوية ومع الاسف اخواني مش متعاونين فارجع الاقيها مااكلت حتى وجوعاانة مسكينة وبسبب اوقات الدوام الطويل اثر سلبا عليها بديت الاحظ طفح بمكان الحفاظ ونتو بكرامة بسبب بقائها فترة طويلة فترة وانا في الدوام وغير

ان تمل بسبب كونها وحيدة لكن الحمدلله وبفضل دعواتها لي نجحت رغم الصعوبات رغم قلة النوم والتعب
والبنات مايرحمون في البروجكت الجماعي فكنت اضطر اقصر من وقت نومي او الاكل واخليه للدراسة يعني كان قمة التعب لكن حمدلله عدت هالايام

ولاانسى ايضا نفسية امي باول الايام كانت كله تصيح وتقول ليش ياربي خصوصا انها موكبيرة بالعمر لكن قضاء الله وقدره ..الحمدلله حاليا تاقلمت شوي لكن تظل فترات تتضايق وتمل وتصيح واصبرها واقولها يمه هذا اختبار من الله وبتحصلين اجر تعصب وتقول مابي الاجر استغفر الله وهي موقصدها لان بعدين تقول الحمدلله واستغفر الله بس وقت الي تتضايق تقول هالكلام خصوصا انها تشوفني صغيرة الحجم وهي ماشاءالله وزنها ضعف وزني فتحس اني اتعب وهي ماتحب تثقل على احد

احاول اواسيها واضحكها لكن احس الظروف صعبة حاولت ااطلعها برا البيت بكرسي المتحرك لكن تتعب وتقول رجعوني لان عودت نفسها على السدحة واحيانا ترفض ومرات تقول لابطلع طلعوني وبس اقولها ها بتطلعين تغير رايها ...ماني عارفة شو الحل

وكمان تطلع لي ناس تغثني بكلامها وحدة منهم قبل فترة بسيطة تقولي انتي ماتفكرين تتزوجين قلت لها شلون اتزوج وانتي تشوفين حال امي قالت امك ماهي دايمة لك ولازم تزوجين والقهر انها وصلت الاربعينات وللحين ماتزوجت ..وحدة ثانية متزوجة وعندها بنت وحدة تقولي لوصادني مثل امك بقول لبنتي تزوجي مابعطل نصيبها.. يعني هذا كلام تقوله ؟؟قلت لها الله لايبلاك وبقلبي اقول الزمن دوار ولابنتك رمتك دار العجزة بشوف شتقولين .. يعني ناس ماتحس صراحة

وغير موضوع الوظيفة يقعدون يحنون علي روحي قدمي واشتغلي الي يسمع هم يصرفون علي وانا حاليا مابي اشتغل لان موحابة مجال دراستي وثاني شي لان مابي اعيد ايام التعب ايام الدراسة

بالنسبة لفكرة الخدامة مرفوضة تماما من قبل اهلي وظروفنا المادي ماتسمح يقولون اذا تبين خدامة اشتغلي وجيبيها فصار الكرف علي طبعا اذا مانظفت محد يراعي وياكلوني بلسانهم ..ايام الدراسة كنت ماالحق على شغل البيت كنت يادوب اغسل ملابس المهمة وانظف على السريع ايام الاجازة .. حاليا امي صارت كله

تبيني اقعد معاها وبس اروح انظف او اسوي شي تناديني واعصب واحيانا اهاوشها :frown: ادري اني غلطانة بس والله تعب علي ان قابلتها طول اليوم مابسوي شي في البيت وماحب اشوف الوصاخة خصوصا اخواني معنهم كبار بس ماابالغ ان قلت لكم تجي شغالة الساعة تنظف بنفس اليوم ينزل اخوي الاصغر وياكل ويرمي عظام دجاج او لحم والرز بكل مكان اجي الا نمل مالين المكان واعصب ولا ياكل ويرمي القراطيس كلمته مليون مرة مايسمع الكلام ويعصب يقول كله تحنين وانتي مزعجة

تعبت معاهم مافي فايدة كاني عايشة مع اطفال حتى الاطفال اهون مدري كيف امي كانت مستحملتهم وغير اني صرت اهمل صحتي وتغذييتي اغلب اوقاتنا غذانا من مطاعم او اشياء خفيفة ومااكل اخليه لامي حتى لايقصر عليها وتجوع وصايرة اعتمد على الخرابيط وغير ان تنسد نفسي من التعب والكرف وماحب اكل

وباخر مرة مرضت وكرهت عمري وتمنيت لو اموت لان حتى لو مريضة لازم اهتم بامي والبيت طبعا البيت ماتعب نفسي معاه لكن امي كل شوي تناديني وتبي اجلس معاها وانا اكون تعبانة ابي انام يعني احس صعب وضيقة خلق

اكيد احب امي واتمنى الله يطول عمرها لان والدي متوفي وبعد موتها بعد عمر طويل بتشتت وماعرف اش بيكون حالي لكن مادري شالحل لهالحالة انصحوني وواسوني واعطوني تشجيع حتى اتشجع للاهتمام فيها وشكرا لكم