شعرج كشه وضعيف ومتقصف ومايطول؟؟ تعالي جربي هالدهن

السلام عليكم بنات

اليوم انا يايبتلكم طريقة دهن تسوونها اذا كنتوا تعانون من مشاكل بالشعر سواء كان شعركم كشه او متقصف او ضعيف او مايطول

وطبعا نتيجة الدهن ماتبين الا عند الاستمرار والالتزام
والطريقة سهله جدا ومفيدة
اا سمعت فيها بالمنتدى بس زدت عليها وخبصت لين طلعت معاي جذي
واستعملتها فترة طويله والحمدالله شعري واااااايد تسنع
بس لازم قبل ماتبدون تستعملونها انكم تقصون اطراف شعركم المتقصفة
لاتقولون ماتبون تقصرون طول شعركم
ترى الشعر التعبان يمص عافية الشعر الزين يعني الوصفة مامنها فايدة اذا شعركم متقصف ومخلينه على حاله
لازم تقصون الاطراف لانه انسوا الاطراف المتقصفة ترجع تتلزق
خلاص مامنها فايدة


عقب ماتقصون اطراف شعركم زهبوا هالاغراض حق الخلطة

نوى تمر محمص ومطحون ناعم جدا
يعني تجمعون نوى التمر وتغسلونه نظيف وتنشفونه من الماي وتحمصونه مثل ماتحمصون البن بالضبط
اصلا هو راح تصير ريحته نفس ريحة البن
وعقبها لما يصير اسود ومحمص تطحنونه بالمطحانه مالت البن ويصير عندكم رماد نوى التمر المطحون
احنا نبي منه تقريبا 5 ملاعق كبيرة
يعني من الحين كل وحدة تترس صحن تمر وتوكل اهلها وتاخذ النوى
وكل يوم جمعوه وخشوه تحتاجونه حتى حق باقي الخلطات لانه معروف انه ينبت الشعر ويقويه

المهم 5 ملاعق كبيرة من رماد نوى التمر
علبة زيت باراشوت الكبيرة او مايعادلها من اي زيت جوز هند تفضلونه
بس انا احب باراشوت لانه طبيعي حتى مكتوب عليه صالح للاكل
علبة زيت دابر املا المعطر اللي ريحته مو خايسة
تبون بوريحة كيفكم بس انا رحمتكم من الريحة
اللي عادي عندها تحط بوريحة واللي ماتبي تحط المعطر اللي مكتوب عليه انه من مكوناته حنا وزيت زيتون وشي مادري شنو
كأسين كبار زيت ذرة عافية
قشر موزتين بس القشر مانبي الموز تاكلونه بالعافية وتخلون القشر حق الخلطة
كأس زيت خروع
كأس زيت لوز


الطريقة:
تاخذون كأسين زيت الذرة عافية وتحطونهم في قدر على النار وتحطون معاهم قشر الموزتين وتخلونهم على نار هاااااادية بس شوي لين يذبل القشر
مو يحترق الدهن لا بس شوي كم دقيقة
وبعدين تشيلونهم من النار وتحطون معاهم باقي الزيوت كلها ورماد نوى التمر وتخلونهم بالقدر وتغطونه عدل عدل وتخلونه 4 ايام منقوع على هالحالة
يعني سكروا القدر بقصدير او شي بحيث مايدش فيه غبار ولا شي
واذا تبون حطوه بعلبة كبيرة وسكروها وخلوه 4 ايام
بعد الاربع ايام تحطون كل هالخبصة بالخلاط عشان ينخلط قشر الموز وكل المقادير مع بعضها
وتحطونه بعلبه بلاستيك كبيرة تكفيهم
وتسكرونه عدل وتخلونه عندكم وتستعملونه كل يوم للشعر عالاقل 3 ساعات
واذا ماتقدرون كل يوم سووها 3 مرات بالاسبوع
واذا قدرتوا تنامون بالخلطة هم بعد احسن يعني تحطونها بالليل وتتسبحون الصبح
بس اذا ماتقدرون خلوها 3 ساعات عالاقل
وانا اسوي شغله تزيد من مفعولها
وهي اني احدد يوم او يومين بالاسبوع لما اجي احط الخلطة
اخذ منها بصحن واحط معاها ملعقتين كبار خميرة مالت الاكل بس مذوبتها بماي واخلطهم عدل واحطهم بشعري 3 ساعات
هالشي اسويه بس مرتين بالاسبوع وباقي الايام احطها من غير خميرة
لانه الخميرة معروفه تكثر الشعر
بس انتبهوا مو تنامون وانتوا حاطين الخميرة ترى موزين تطول بالشعر
بس 3 ساعات كافي
واذا بتستعملون الدهن من غير الخميرة اوكي ناموا فيه عادي
طبعا تستمرون على هالوصفة لين تخلص العلبة او عالاقل شهرين عشان الشعر يتجدد ويتقوى ويتحسن من جميع النواحي
بس انتوا راح تلاحظون من 3 او 4 استعمال ان التساقط خف بشكل كبير اذا مااختفى
وتحسون الشعر فيه حيوية ولمعه وراح يطول اسرع
لاتسألوني شكثر يطول لانه شعر عن شعر يختلف
بس عموما بتلاحظين شعرج طال اسرع من كل مرة
وبتلاحظين ان الكثافة زادت بفضل الخروع ورماد نوى التمر

ويفضل الاهتمام بالاكل بهالفترة وخصوصا الاكثار من الفواكة والخضروات الورقية لانها غنية بالحديد المفيد للشعر

اتمنى انكم تجربون الوصفه وترى هي صالحة لجميع انواع الشعر
واذا جربتوها ردولي خبر وبشروني بالنتيجة
ولاتنسون الالتزام لافضل النتائج