شورن علي ....

السلام عليكم ورحمة الله وبركاته
يابنوتات انا عندي ولدي عمره تسع سنوات ونص رايح صف رابع
ذبحن مناشبن ع جوالي يقلب بتويتر وانستقرام ويتفرج طبعا قدام عيوني اعرف وش يشوف وش يتابع لدرجة ان الي يتابعهم يسويلهم فولو من جوالي🙁🙁
يعني انا ام ركون مسويه فولو لمجرم قيمز ومستر شنب ومادري بعد اطفال يسوون تحديات
المهم ذبحن وموتن قمت عطيتوه جوال قدييم وحملتله انستقرام وشفت من يتابع وهو طول اليوم عندي يعني مايغيب عن عيني وتحت نظري واراقبه مراقبه من غير مايدري ودايما عيالي ازرع فيهم الخوف من الله مو يخافون مني ودايما اقولهم ان الله يشوفكم اذا سويتو شي غلط يعني هو الي يعاقبكم فاحس انهم صارو يراقبون الله ع صغر سنهم الحمدلله...
وابو ركون ناشبن يقول هالوغد معطيتوه انستقرام ليش قلتلوه مو هو طول الوقت جالس ع جوالي وبعدين عيالي انا اراقبهم ماخليهم يجلسون بلحالهم وممنوع يقعدون بغرفه لحالهم ويتفرجون يوتيوب او اي شي ثاني...
انا يابنات هذي سياستي مع عيالي ما احرمهم من شي طالما انهم تحت نظري وعندي بالبيت مابي عيالي يصير عندهم الممنوع مرغوب مابي كل شي عندهم شفحه ويسوونه من وراي....
مدري انا الي سويتوه صح ولا لا خاصه انه دايما يعاتبني اخوياي بالمدرسه عندهم جوالات بشريحه وعندهم انستا وعندهم وعندهم..
شورن علي يالحكيمات اشيل الانستا ولا اخليه...