شوفوا وش صار معي بمستشفى الامير سلمان

السلام عليكم ورحمة الله وبركاته

صلوا على من بكى شوقا للقانا ( اللهم صل على محمد وعلى اله وصحبه تسليما )

بنات بسولف لكم عن مستشفى الامير سلمان واللي صار لي فيه وعادي أتقبل وجهة نظركم بس بليز لا تتحول وجهة نظركم لهوشه نتناقش في ما بيننا بدون زعل وكلام يجرح وماله داعي لان اللي صار لي امس كفاني :unhappy:
المهم : أمي امس الله يخليها لي تعبت علينا الساعه 12 في الليل ومافي احد يؤديها غيري بالتاكسي رحت وانا قلبي مع أمي لان حالتها خطيره كانت واقرب مستشفى كان حق الامير سلمان وندخل ويسون لمي تحاليل وكشوفات ويوم خلصوا حطوا له المغذي وطول وفي يدها المغذي وبداء يعور يدها والأكسجين خلص وما جت الممرضة حسبي الله عليها المهم وتوخر أمي الاكسجين عنها واحنا جلسنا محد جانا لا حس ولاخبر عاد انا بدئت اتعب كان فيني النوم المهم قلت فدووه لمي واروح للممرضة اسألها في الممر وكانت تكلم وحده ووراها وحده ثانيه حرمه المهم كلمت الممرضة قلت لها وش وضع أمي قالت وهي تنافخ في وجهي أستني الين يجئ الدكتور ورجعت سألتها مره ثانيه قلت لها ومتى بيجي ماردت علي سفهتني سألتها مره ثانيه قالت وهي معصبه وتنافخ كانها تكد علي
مدري عنه اناخلاص ماتشفون وجهي مره تفشلت عند الحريم جلسوا يطالعون فيني واروح عند أمي وتسالني وش فيك واقول له كذا وكذا قالت خليها يمكن ماتقصد وسكت انا عديت واللحين نجي للمره الثانيه طولنا في المستشفى وفضى السرير اللي جنب أمي اصلا مؤ بس اللي جنب أمي كل السراير فضت المهم انا كنت واقفه قالت لي أمي اجلسي على السرير اللي جنبي هنا بدال مانتي واقفه اربع ساعات قلت طيب وافتح الستارة اللي بين السرير وأمي واجلس في السرير وبدون مااحس بنفسي نمت تقريبا ربع ساعه واصحى فجاءه الا أشوف الممرضة فاتحه الا ستاره علي ناظرتني وراحت فزعت انا وقمت وفتحتها وياليتها سكرتها لا خلتها كل يشوفني المهم سكرتها انا وفتحت اللي عند أمي شوي وجلست على السرير الا وتجي ذي الممرضة من بعيد وتقول لي انتي انتي بااعلى صوت انا خلاص خفت قالت قومي من السرير قومي ولا تشوفوني انا وجهي كذا :unsure:
واجلس جنب أمي بس اقسم لكم بالله اللي خلقني وخلقكم ان السراير كلهافاضيه مافيها احد بس كذا جت على هالسرير قلت لي أمي ها شفتي قالت أمي لا يمكن عشان الضمادات تبيها قريب بس والله الضمادات بعيده أمي تقول كذا عشان تهدني المهم جلسنا شوي وجت تركب لمي المغذي الثالث وانا كنت وراها وتقوم تطق رجلي وتناظرنئ بستحقار مدري وش فيها علي هالدميه وتروح عند المريضة اللي جنبنا اللي توها جايه وانا جالسه اسولف مع أمي قالت لي أمي ذا المستشفى خايس مافيه نظافه ولا عنايه قلت انا مثل اللي يشتغلون فيه ينافخون عليك وبس كذا وبسم الله نجلس شوي الا ذي اللي تجئ تصارخ فجاءه من بعيد وتقول لي انتي بذات ماابيك هنا بتطلعين وغصب من ورأى خشمك ( طبعا هذا الممرضة نفسها ) قلت انا لها ماني طالعه اذا كان مستشفى أبوك طلعيني جايه تطلعيني باي حق قالت لأنك غلطتي علي قلت انا لها لا ماغلطت عليك ولا اللي على راسه بطحا يتحسس عليها قالت والله لاطقك وقربت من عندي بتمد يدها شفتوا وين وصلت الوقاحة وتمسكها صديقتها وقلت انا تعالي مدي يدك اذا فيك خير مدي جربي وعصبت انا وصرت أتكلم بدون مااحس تعرفون شعور الواحد اللي يكتم يكتم وفجاءه ينفجر خلاص معاد قدرت وقالت صديقتها اللي متلثمه وحاطه مكياج الزواج روحي نادي لها البوليس قدمي ورقه عليها قلت لها لو يجئ اللي يجي ماقمت من مكاني وغلطت علي وسبتني وقعدت تنطز على جزمتي وانتم بكرامه مع والله ان جزمتي عاديه جداً مافيها شي يدل على انها تطنز وجلست تقول روحي انتي وجزمتك ويا لونها المدري وش يبي ( جزمتي لونها لحمي ومدري وش دخل جزمتي بالموضوع )
وقالت لي والله لجيب الشرطي يطردك يسحبك بكشتك في الممر المهم وتروح ويا الممرضات اللي معها ينادون الشرطي ويجي الشرطي وربي كلامه معي مره هادي وقال انا عارف انك اخلاق وانك محترمه وكل واحد ويبان أخلاقه وأسلوبه ومن هالكلام ويجي مدير المستشفى بعد نفس الكلام وتجي ممرضه ثانيه تهديني وتقول لي تعالي اطلعي برا بس عشان يكملون علاج امك وانا اقول لها لا ماني طالعه مؤ هي اللي تمشيني وتجي حرمه ناطه وربي توها جايه ( بس قسم بالله ماراح احلله على كلامها ) قالت تراكي ازعجتنا في المستشفى واني ترى شايفتك انتي اللي غلاطنه على الممرضه من اليوم وانتي تتكلمين عليها وهي شايفه شغلها قلت انا حرام عليك لاتشهدين زور وانتي توك جايه ماتدرين عن شي قلت لها
روحي يا شيخه وربي راح ادعي عليك انتي وياها وماراح احللك لادنيا ولا آخره قالت بكيفك وسكت معاد قالت شي وشوي قالت انا قلت اللي شفته وبعدين شهدت معي حرمه ثانيه الله يجزاها خير يارب المهم واطلع عند الباب في الاستراحة عشان أمي بس وجلست أبكى عند الممرضه الثانيه الطيبه وعندي الشرطي وهي تحاول تهديني وطلعت أمي بسلامه .....
بس اللي حبيت أوصله الله لا يسامح اي ممرضه سعوديه شايفها نفسها على ايش تشوفين نفسك وعلى ايش تعاملين الناس كذا مؤ انتي اللي تصرفين علينا العلاج وربي الله يحلل الممرضات الفلبينات عليهم وربي اسلوب ياليت ذا السعوديات يتعلمون في كل القطاعات الحريم كذا لزم هذا أسلوبهم كأنهم يكدون عليك وينافخون وحنا اللي ماكلينها حسبي الله ونعم الوكيل ( طبعا البعض مؤ الكل ):ohwe:


والله العظيم ان قبل ما تصير الهوشه كانت جالسه تقهوي حريم جاينا مع امهم كل بناتها وعيالها جالسين مع امهم وهي بغرفة ملاحظه وفاتحين السرير اللي جنب امهم وجالسين عليه بس اتحدا كم قالت لهم شي وربي انها جابت الحلى والقهوه وجلست تقوهيهم واتحداكم قالت لهم قوموا وحتى وصلت انها تعطيهم عبايتها وربي يوم راحوا هالعايله اسمع الممرضه تتكلم مع صديقاتها تقول لها وهي اصلا ماتعرفهم بس عشانهم صاروا من نفس المنطقه اللي هي منها وربي ما كذبت ولا بحرف كل شي شفته وسمعته .....
سامحوني على الاخطاء جالسه اكتب بالايباد ..........
رجاء خاص يامشرفات وربي تعبت وانا اكتب وانا فيني حره لا تحذفون الموضوع تكفون