صايره علطول متضايقه وكارهه حياتي

صايره علطول متضايقه وكارهه حياتي



كيف حالكم بنات
والله انا مو عارفه ايش اقول بس احس ملل حياتي صايره روتينيه لدرجه لاتطاق استغفر الله
مع اني متزوجه من سنتين وشهرين وعندي بنت صغيره عمرها سنه واشتغل من الصباح للساعه 4
ايش رايكم
القصه كلها اني اتزوجت من سنتين بواحد شفناه وسالنا ومدحولنا فيه جامعي ويشتغل وراتبه كويس اي نعم اقل من راتبي با3 الاف لكن في النهايه راتبه كويس بس انا في منصب مرموق
اهله لمن جو يشوفوني مااقالوالنا عن وضعهم انهم ناس بسطاء مره وعايشين في بيت شعبي هدا اول شي انصدمت فيه انا واهلي بعد ماكان عندهم ظروف ورحنا نواسيهم حتى خالاتي كانوا يبغوا يزوروهم قلتلهم لا خلاص وصلتلهم سلامكم عشان لايروحوا بيتهم
المهم اتزوج وعمره في ال30 كان يشتغل قبل ب 4 سنين وتخيلوا ماجمعله اي شي من فلوس دخلها كلها بالاسهم وخسر خساره فادحه وعلى فكره عمره مااشترى سياره قبل الزواج كان عنده سياره حقت اخوه كابريس قديييييييييييمه اخوه اشتراها مستعمل ايام الجامعه يعني لمن كان عنده بس المكافاه
المهم اثثنا البيت وسوينا الفرح بعد مضاربات على الكروت وكم دفعنا وكم دفعتوا ومضاربات الفرح والبيت فرشنا غرفة نوم وصاله وصالون والمطبخ طبعا بدون الاكسسوارات واهلي ساعدوه كتير فيها وعلى كل شي يعترض لا غالي لا ماله داعي . ولا تلفزيون بعد مااتزوجنا انا صرت اشتري اشياء واحط في البيت والتلفزيون انا اشتريته المهم
دحين قبل الزواج سيارته خربت وقلي كلها اديني شهرين وخلاص حاشتري سياره بعد الزواج بشهرين والى نشتري وحده نمشي حالنا بسياره ابويا طبعا ماكنت اعرف ايش السياره اتاريها ونيت والى يومكم دا واحنا نركبها طبعا فلوس الاسهم اللي كان بيشتري السياره بيها طارت صرنا في كل مكان لازم نوقف بعيد عشان لحد يشوف السياره والعزايم اخلي سواق اهلي يوديني والعمل اوقف بعيد وامشي وعلى اساس نكمل البيت بعد الزواج ولا كمل في شي
لا وطلع كمان عليه قرض من البنك ماخده ويسدده على عشر سنين وكل شهر يسحبه من راتبه 3000 ريال ويدي اهله 1000 ريال طبعا كل ملابسي وملابس بنتي انا اللي بشتريها ماعمره اشترالي ملابي وتصدقوا من بعد الزواج للان عمره مااهداني شي على الرغم اني انا اهديه
مؤخرا خلاص صرت مره طفشانه من مواضيع كتيره واولها البيت احسه صاير ضيق وكل مارحنا ندور على بيت اكبر يدور شوي ويقول خلاص نرجع البيت وكم مره اقترح عليه نستاجر كباين او نسافر لو مصر نغير جو
ادن من طين وادن من عجين. خلاص احس صايرلي اكتئاب بس اشوفه واشوف البيت مالي نفس اتكلم ولو اتكلم مافي ارد عليه واقل شي يسوي ينرفزني واحيان افكر بيني وبين نفسي اقول شكلي استعجلت لمن وافقت على الزواج من اساسه وافرح واكون مرتاحه لمن يخرج أي مشوار وصرت اسهر كتير لوحدي.

احس صرت انا في وادي وهو في وادي . لا وكمان شي مره مزعجني يتضارب مع كل الناس ياالله يبغى كل الناس تمشي على مزاج ومع كل جمله يقولها لازم يسب
متلا لو بيتكلم على واحد لازم يقول الغبي دا – شوفي الحمار دا
الزباله – الوسخ ماادري من فين يجيب الكلام دا وعلى فكره مو بس هو حتى اهله كدا
احس نفسي ليه عشروميه سنه متزوجه مو سنتين


مني عارفه اساسا هو في مشكله ولا انا مكبره المواضيع ولا ايش
هل فيكم وحده ترضى تمشي بونيت ودايما اقوله قلتلي شهرين ودحين لينا سنتين وطبعا علطول يقفل الموضوع وطبعا طول الوقت يقولي خلاص احملي بنتك صار عمرها سنه جيبيلي 4 مبدايا ووقفي كم سنه وكفايه علينا 6 او 7 قلتله نعم انا اذا انخبطت في عقلي بجيب اقصاهم 4 وقلتله من النهايه محاحمل لين تغير السياره في حملي تعبت السياره ابدا مو مريحه وفي المطبات كانك بتطيحي فوقها
حتى مااحب اروح هنداهله لو روحت نص ساعه او ساعه وابغى امشي مااحب اقعد معاهم كتير وهم طبعا مو عاجبهم انو مني داخله فيهم زي سلايفي ولا اسال عنهم كل شويه بس انا مطنشه هما كمان مره مزودينها يعني امه لو زكمت تبغى الواحد يتصل يسال عنها كل شويه
رمضان اللي فات رحنا الحرم وقال حاخد امي وسكت وجات امه واخته لمن وصلنا عندهم ناخدهم يقولي اركبي ورا عشان تجلس امي قدام لاتسويلنا سالفه .. ايش فيها لمن تقعد ورا لو امي كانت قعدت ورا المهم رحنا الحرم وخرجنا على الصباح لانه رحنا متاخر امه تعبت وكانت دايخه مره وصلناهم ورجهنا البيت نمنا الين المغرب ورحنا نفطر فيبيت اهلي لانه بنتي هناك وخلاص ماجات في بالي امه تتصل عليه في الليل عشان ايش تقوله مرتك شافتني تعبانه في الحرم مافكرت تسال عني ياسلا ماكلنا كنا تعبانين وانا انكتمت واطريت اجلس اريح ليش ماسالوا ان شاء الله والله ومن بعدها صاروا يقولولي فلانه تعبانه مااعلق واطنش ولا كاني سمعت شي غير كدا عما يدخلو ويخرجوا ويتجمعوا ولا يقولولي واخر مره سلفتي سوت عيد ميلاد بنتها في بيت اهله ولا عزمتني زوجي كان رايحلهم وقلوله ها جبت البنت عشان العيد ميلاد هو انقهر وقلهم ليش قولتولي
و مره اهله كانوا يبغوا يجوا كلمت سلايفي الاهي قامت امه كلمتها وقالتلها تعالي معانا بس هي كانت عند اهلها.
وكمان زوجي في صفه اكرهها وهو يعيد ويزيد في المواضيع ويدقق في كل شي تدقيق يخليكي تكرهي حياتك وقبل مااشتري اي شي يتفحصوه عشروميه مره شي يطفشك
اي نعم هو طيب واذا زعل ينسى بسرعه بس ممل بصراحه وعمري مااشتكيت لأحد دايما ساكته بس طفشت
احس انه حياتهم عالم اخر ومني قادره اتاقلم معاهم واحس زوجي تفكيره غير تفكيري ومو راضي يفهمني ولا يفكر يسوي اي شي يغير حياتنا فيها
قولولي وجه نظركم في الموضوع حاسه بملل مميت حتى بنتي مهملتها :44::44: