صديقتي..زوجها اجبرها ان تحلف يمين على القران وكان يمين كاذب ارجو المساعدة

السلام عليكم ورحمة الله وبركاته

اخواتي مثل ما كتبت بالموضوع لي صديقة تعيش بقلق ثلاث شهور ولا يغمض لها جفن خوفا من عقاب الله وتقول ان حياتها تكدرت ورزقهم قل خائفة لدرجة فعلا انا حزنت عليها هي تائبة مما فعلت ولكنها تقول انها اجبرت على هذا الحلف..


للاسف كل مواقع الافتاء مغلقة ومكتوب انه لايوجد متسع لفتوى جديدة وكل يوم يمر عليها عذاب حابة ترتاح وتعرف ما لها وما عليها ..

القصة:


للاسف هي وقعت بخلاف مع زوجات اخوان زوجها يعني السلفات مع بعض صار بينهم مشاكل ونقل كلام

يعني هي القصة كانت عادية وما الها داعي بحيث كانوا بيوم مجتمعين سوا وقامت صديقتي بتقشير برتقال للضيوف وما قشرت برتقاله لسلفتها وعلقت وقالت لقريبة زوجها انه سلفتها لا تستحق انه حد يحترمها ويعبرها...

بعد فترة البنت هذي وهي بتكون قريبة زوجها بنت عمه بيوم اجتمعت بالعيلة وكانوا بحكوا بسيرة صديقتي فقامت بنقل كلامها وهذا خلا مشكلة كبيرة تقوم ما تقعد وصار زعل بين الاخوان وقام زوج سلفة صديقتي بالاتصال على اخوه يلي هو زوج صديقتي وخبره انه لازم نحل المشكلة لانها بدت تكبر ووصلت لتهديد النسوان بين بعضهم طبعا صديقتي من خوفها انكرت انها حكت لانه بنت عم زوجها كانت بهرة القصة واضافت كلام وحكي ما حصل وما صار فلو اثبتت انها فعلا حكت عن قصة البرتاقالة معناته انه البنت صادقة بنت عم زوجها يعني وانه صديقتي الكذابة اعترفت من الخوف بقصة وحدة فانكرت كل شيء..

المهم زوج صديقتي اتصل على صديقتي وخبرها انه بالطريق الان للبيت مع اخوه زوج سلفتها اللي بينهم مشكلة وانه زوجها جاي يحلفها على القران انها ما حكت هذا الكلام صديقتي حكت لزوجها ما راح احلف حكالها بدك تحلفي غصب او بتكوني فعلا حاكية كل هذا الكلام وكل هذي المشاكل منك مع العلم سلفت صديقيت قوية وراعية مشاكل من يوم يومها...

سكرت التلفون مع زوجها توضأت وصلت صلاة الحاجة ودعت لله انه يساعدها ويبعد عنها اصرار زوجها انه تحلف يمين ويختارلها الافضل..


وصل زوجها وهي بترتجف وكان معصب لدرجة كبيرة وكان اخوه معه... دخلت عليهم ومعها القران وطلبوا منها تحلف يمين انها ما حكت شيء من الكلام كله وبتقول انا حلفت يمين انه ما حكيت الكلام كله لكن الحقيقة انه فقط موضوع واحد حكيته من ضمن يلي حلفت يمين ما حكيتهم وهي قصة البرتقاله...

كان لو ما حلفت يومها ممكن توصل بينها وبين زوجها للانفصال وزوجها رجل صعب عصبي كتير وخبرتني انه لو صار بينا انفصال ورجعني ما راح اسمحه ولا انساله هذي الشغلة فحكيت بحلف يمين وبختصر المشكلة قبل ما تطور بيني وبين زوجي...

طبعا بعد حلف اليمين راح زوج سلفتها وخبر بنت عمه انه صديقتي حلفت يمين انه كلامها كذب البنت كان عرسها بعد شهر حكت اقسم بلله انها كذابة ولو انا كذابة يارب يتنكد علي عرسي..!!!!!!

اجا عرس بنت عم زوج صديقتي وكانت صديقتي حاضرة بتحكيلي سبحان الله بعد ما دخلت الصالة كانت في اغاني وبرقصوا ومبسوطين اول ربع ساعه وفجئة اجاهم خبر وفاة قريبة للعريس اضطروا يوقفوا العرس ويجلسوا بهدوء لاخر العرس وصار كانه عزاء... صديقتي بتقول حسيت انه ربنا انتقم منها وبنت عم زوجها كانت على الكوشة خجلانة وبنتظر لصديقتي كانها عارفة هذا انتقام ربنا...


صديقتي بتقول هي صامت ثلاث ايام متتالية واخرجت صدقة وتااابت الى الله وكل يوم تستغفرة مئات المرات نادمة لدرجة انها تبكي يوميا وصابها زي حالة نفسية خايفة جدااا من عذاب الله تشعر بتانيب الضمير وبتشعر انه الفترة يلي رزقهم قل هو عقابهم من الله..

خايفة انه يمينها يكون غموس او يكون ربنا ما غفرلها او يكون عليها كفارة او انه لها عذاب يوم الحساب؟؟

ماذا اخبرها؟؟

لو حد لدية خبره يخبرني ويريحها ولكم منها دعاااء من قلب تقطع من التوبة...

جزيتم خير الجزاء هذي القصة امامكم بالتفصيل وننتظر منكم التعليق...