صديقتي في ازمه

السلام عليكم

اول شي ياليت ما ينحذف موضوعي لاني كتبته في منتدى و حذفوه...ابغاكم تنصحوا صديقتي و تدلوها على الطريق الصحيح

انا صديقتي هادي من اعز صديقاتي، هي اخت ليه

كلمتني قبل كم يوم تبكي تبغى حل لمشكلتها ولاني اثق في رأيكم ، ساعدوها و حاولوا تحلوا المشكله معايا

اول شي هيه اتعرفت على واحد اكبر منها ب 10 سنين على ما اظن و من خلال معرفتي بيهم هو يحبها مووووووووووت و يخاف عليها كثير و هي نفس الشي

مر على معرفتهم ببعض 4 سنوات و كلها كانت كلام بالتليفون و ما شافوا بعض غير مرات تنعد على الاصابع خلال 4 سنوات

و هو بيشتغل و عنده شهاده جامعيه و كمان الان بيدرس من جديد علشان يرضي اهلها

صار لهم مشكلتين قبل كدا انه امها عرفت و عملت مشكله كبيره ، لكن عدت على خير و هدأت الامور

وخالها هو اللي كبر المشكله قال عنه كلام غلط و ماله اي صحه و امها طبعا صدقت اخوها ، خالها كان من اعز اصدقائها لكنه خان العلاقه، لما الشاب كان قريب انه يتقدم لها هو خرب الموضوع

قبل كم يوم كانت صديقتي خارجه و بالصدفه شافته و جا سلم عليها ، و كمان الصدفه الاكبر انه امها كانت ماره من هناك و شافتهم

ام صديقتي ما كلمتها ، بس راحت لبيت اهل الشاب و هزئت امه و اخته و سب شتايم و اتخبطوا الاثنين في بعض

واليوم الثاني جابوا اشاب عندهم في البيت هو واخوه و امها مسحت فيه البلاط وهو ساكت ما قال

و امها قالتلها هو قال عنك كلام مو كويس ومن دا الكلام علشان تكرهها فيه و صديقتي عملت نفسها مصدقه علشان تهدي الامور

لكن صديقتي اليوم كلمتني و هيه تبكي و قالت انه تقريبا قبل اسبوع كانت عنده و الشيطان شاطر و صار اللي صار

و الشاب ندم و صار يبكي و هيه كمان و قالها انه اول ما ابوها يرجع من السفر راح يكلمه

و الان الدورة متأخره عليها يومين و هيه مرعوبه

وما تبغى تنفصل عنه لانه هما الاثنين يعشقوا بعض ، و الراجل مررررررة طيب و يحبها من جد لكن امها اتهورت في تصرفها ، و اهله الان يبغوا يخطبولوه و يزوجوه بالغصيبه

هيه بتحاول تكلموا لكن ما رد عليها

الله يخليكم ساعدوها هيه دحين ندمانه على اللي عملته معاه و بتصلي طول الوقت و بتستغفر ربها ، وكمان تبغاه ما تقدر تعيش من غيره و هو نفس الشي

سامحوني على اسلوبي