ضاع عمري مع زوج مايرحم وأهل كلهم قسوه

أنا نزلت قبل كذا موضوع وطلبت منكم انكم تدعون لي

وكنت خلاص في يأس وكربه وهم مايعلم فيه الا رب العباد

وكان الشيطان يوسوس لي اني انتحر وكنت ساخطه والعياذ بالله

لكن لما قريت ردودكم ودعواتكم ونصحكم استحيت من ربي العظيم الكريم

وايقنت ان مايصيب الانسان من هم وغم يكون له اجر عظيم عند رب العباد

طبعا راح اقولكم قصتي انا انسانه عشت طول عمري خدامه لاخواتي واخواني اهتم فيهم وفي عيالهم

ولما كبروا عيالهم ماعاد احد يسأل عني او حتى يسلمون ويزوروني

كبرت ووصلت لل35 وبعدها تزوجت انسان كنت اظن انه رجل ولكن للأسف مايحمل من الرجوله الا اسمها عشت معاه 3 سنوات كلها ضيم وبخل وامه هي اللي تحركه وتحرضه علي وفي الأخير ماقدرت استحمل ظلمه لي وطلبت الطلاق لكن هو رفض وهددني بالفضيحه وباشياء ماسويتها وانه راح يخلي سيرتي على كل لسان وانا يشهد الله علي ماقد قصرت معه بشئ وحفظته وحفظت بيته لكن الظلم طبيعته وهذا انا معلقه لي سنه مالي لاحول ولاقوه و لاوظيفه اصرف فيها على نفسي


طبعا امي موجوده وعايشه ولكن مالها دور في حياتي لانها قاسيه ولاعمرها حنت علي والله والله انها تدعي علي بالمصيبه وبالسرطان واشياء ماتنقال وانا صابره ومحتسبه لكن لامتى لا ام ترحم ولازوج يحن ولا اخوان يدرون عني ولا اخوات يسالون ذبحني التفكير وصابني الوسواس اعوذ بالله من الشيطان

وفوق هذا كله والله يااخواتي اني مسجونه في البيت ما اشوف الشارع الا اذا مرضت حتى السوق والله ما اروحه الا خمس دقايق تعبت من السجن اللي معيشتني فيه امي وياويلي لو قلت ابغى اطلع اشوف الناس والا اروح عند صديقاتي

ضاع عمري والله راح العمر وانا محلك سر ماتغير شئ من يوم عرفت نفسي وامي بقسوتها ماتغيرت دايما زعلانه وغضبانه علي مع اني احاول ارضيها لكن مافي فايده

تكفون ادعولي وادعوا لاختي ان ربي يفك اسرنا ويعوضنا خيرا كثيرا ولايجعل ظالم يتولانا ويحنن قلب امي علينا ونطلع من السجن اللي احنا عايشين فيه ويغير حالنا للاحسن يارب