ضايعه ما بين زوجي و اهلي .. و نفسيتي تعبانه .(تم .

السلام عليكم ..

كيف حالكم خواتي ؟؟ ان شاء الله كل شي تمام ؟

خواتي انا نفسيتي مررره تعبانه و مو عارفه ايش اسوي ؟؟

انا و زوجي نعاني من تاخر في الانجاب .. و السبب من زوجي ...

السنه الماضيه ابوي عرض علينا نعمل انابيب على حسابه في الاردن . و قال ترجعون لنا المبلغ و بعدين قال خلاص مو لازم .. قال انا عني ما ابغاكم ترجعون المبلغ بس عشان زوجك و كرامته رجعوه ... قلنا طيب .. العمليه ما نجحت و لله الحمد

المهم خلال هالسنه كان عندنا مصاريف .. نقلنا لبيت جديد و مصاريف النقل و كدا و بعدين عملنا اطفال انابيب على حسابنا .. و الحمد لله نجحت .. حملت بتوأم ولد و بنت و لما وصلت الشهر الخامس صار فيه ثقل في الرحم و اجهضتهم .. كانت ولادتي قبل كم يوم .. و انا لسه في نفاس و متاثره من فقداني لاحبتي ..

المهم انا امي كل شوي تسالني عن الفلوس .. قبل كم شهر و قبل ما احمل قالت لي انتوا متى ناويين ترجعون الفلوس .. لانه احنا نبي نعفش المجلس و محتاجينها .. بعدين قالت لي خلاص رجعوها على راحتكم شوي شوي مو لازم ... قلت طيب ..

قالت لي اسالي زوجك بطريقه ما تكون فيها احراج .. انا ما عرفت كيف اساله .. سالته و حسيته مضغوط ماديا .. فقلت لماما ما نقدر دحين ... قالت مو مشكله .. و انا حامل لما كنت في الشهر الثاني .. كلمتني امي و قالت لي متى تقدروا ترجعوا المبلغ عشان اخوكي ملك و نحتاجها عشان مصاريف زواجه .. مو عارفه ايش اقولها .. المهم زوجي عرف انه امي بس تسالني عن الفلوس و عصب علي و بكاني و انا حامل .. و نفسيتي تدمرت و رحت طواريء ..

و تاسف مني و قال لي الله ياخد الفلوس .. المهم .. انا طفشت كل شوي امي تفتح معاي الموضوع .. و انا اشتغل .. صحيح راتبي بسيط بس قلت خلاص بجمع من عندي .. خلاااااص ابي افتك من الموضوع هدا و اساعد زوجي ... زوجي عصب و قال انا يلي برجعها .. قلت له انا و انتي و احد و مو مشكله ما تفرق ..

فعلا صرت اجمع من عندي و ما اصرف و لا هلله من راتبي و تقريبا وصلت للمبلغ المطلوب .. قبل كم يوم اجهضت و امي جت عندي عشان تقعد عندي كانت مسافره و حسيت زوجي متغير على امي مع انه يحبها و هي كمان و علاقتهم حلوه مع بعض .. اليوم توه يكلمني و معصب و يقول انا ناوي اسوي مشكله عند اهلك .. ليش يرجعوا بكلامهم مو هم قالوا خلاص مو لازم تعطون فلوس و مدري ايش ليش رجعوا بكلامهم ... انا نفسيتي تعبانه بسبب الاجهاض و الحين زوجي قعد يقول كدا تعبت زياده ..

و مو ناقصه و الله .. قلت له خلاص تجمع المبلغ من عندي .. الله يخليك لا تسوي مشكله مع اهلي و قعدت اترجاه .. و قالي خلاص رجعي لهم نص المبلغ من عندك دحين و على نزول الراتب برجع لهم النص الثاني و خلاص يا دار ما دخلك شر و ما راح اسوي مشكله .. بعدين قلت له ليتني ما قلتلك و جمعت المبلغ و رجعتلهم الفللوس من غير ما تدري .. قالي اصلا لو سويتي هذي الحركه من غير ما تقولين لي كان وديتك عند اهلك و تركتك ... :06:

و الله انا نفسيتي تعبانه .. لا و يقولي كمان انا كنت ناوي اسوي مشكله .. الحين راح افش خلقي فيكي .. قلت له يعني انا ناقصه .. مو كافي يلي صار لي ..

مو ضوع الفلوس كله مو زاعجني .. بس يلي مضايقني احس باني انا السبب في خراب العلاقه بين امي و زوجي ... بس ما كان فيه حل ثاني لانه امي كل شوي تسالني عن الموضوع ايش اسوي .. و انا طفشت و صرت لازم ارجع لهم الفلوس و افتك .. ما احب يبقى علي دين ..

خواتي كيف ارجع علاقة زوجي بامي .. ؟؟؟؟

و الله انا تعبانه .. حتى امي ملاحظه علي .. تقولي ايش فيكي اقولها ما فيني شي و الدمعه في عيني ..

لا حول و لا قوة الا بالله العلي العظيم ..

و انا زعلانه على امي و على زوجي .. انا قلت لزوجي انه اهلي دووم يمدحوك و يحبوك .. و امي ما تدري انه زوجي معصب و فيه مشكله ابدا